Zakaria 2 - ÎVUKU RÎA ÛVORO MWARO

Kîoneki kîa rûrigi rwa kûthima

¹ Nînaroririe na ngîona kûrî na mûndû warî na rûrigi rwa kûthima arûgwete na njara.

² Nînamûririe atîrî, “Wathiî kû?” Nake nîwanjokerie atîrî, “Nathiî kûthima îtûûra rîa Jerusalemu nîguo menye ûraca na wariî warîo.”

³ Nînacokire ngîona mûraika ûrîa warîtie nanie aumîra. Nake mûraika wîngî nîwaûkire kûmûtûnga

⁴ na akîmwîra atîrî, “Vinyûra ûthiî wîre mwanake ûrîa ûrî na rûrigi rwa kûthima atî ‘Îtûûra rîa Jerusalemu nîrîtuîka îtûûra rîtarî ririgîre na rûthingo nîûndû rîkethagîrwa na andû eengî mûno na nyamû nyîngî mûno cia kûrîthua.

⁵ Ngai-Mûnene nîke ûkethagîrwa arî rûthingo rwa mwaki rwarîo na ûtûûrage kuo arî na riiri.’ ”

Andû arîa maarî îthamîriorî nîmerirwe macoke mûciî

⁶ Ngai-Mûnene arera andû ake atîrî, “Ûkani! Umani kûu vûrûrirî wa mwena wa rûgûrû, kûrîa namûnyaganîtie mîena yonthe.

⁷ Mue mwatavirwe na mûkîvirwa îthamîriorî Babuloni, ûrani mûthiî Zayuni.”

⁸ Nîûndû Ngai-Mûnene mwene vinya wonthe ûrîa ûndûmîte nîûndû wa riiri wake augîte ûvoro wîgiî mavûrûri marîa maatavire andû ake atîrî, “Mûndû ûrîa ûmûvutagia nî ritho rîake aikagia Kîamra.

⁹ Ngai-Mûnene nîke ûkaarûa nao na nîmagaatavwa nî andû arîa maarî ngombo ciao.” Vîndî îo nîmûkaamenya atî Ngai-Mûnene, mwene vinya wonthe nîke ûndûmîte.

¹⁰ Ngai-Mûnene augîte atîrî, “Mue andû a Zayuni inai na mûkene, nîûndû nîngûka na ndûûranie namue!”

¹¹ Îvinda rîu ndûrîrî nyîngî nîigaacokerera Ngai-Mûnene, na nîigaatuîka andû ake, na atûûranie nao. Namue nîmûkaamenya atî nî Ngai-Mûnene mwene vinya wonthe ûndûmîte kûrî mue.

¹² Vûrûri wa Juda nîûgaatuîka îgai rîa Ngai-Mûnene kûu vûrûrirî ûrîa mûtheru, na nîakaathuura rîngî îtûûra rîa Jerusalemu rîtuîke rîake.

¹³ Andû onthe kirani mûrî mbere ya Ngai-Mûnene, nîûndû nîagûka aumîte kûndû gwake kûrîa kûtheru.