Zakaria 13 - ÎVUKU RÎA ÛVORO MWARO

¹ Ngai-Mûnene augîte atîrî, “Vîndî îrîa kavinda kau gagaakinya, karûnjî nîgakaavingûrwa ga kûthambia nyomba ya Daudi na andû arîa matûûraga Jerusalemu mevia mao na maûndû mao marîa macûku.

² Nîngaatharia marîîtwa monthe ma ngai cia mîvuanano kuuma vûrûrirî, nîguo itigaacoke kûririkanwa rîngî. Nîngaathengutia arathi na nthirie maroho monthe macûku kuuma vûrûrirî.

³ Kûngîkaaumîra rîngî mûndû ûkaaratha maûndû, îthe na ng'ina arîa maamûciarire nîmakaamwîra atî, ‘We nîûgûkua nîûndû nîwarîtie maveeni rîîtwarî rîa Ngai-Mûnene.’ Angîkaaratha maûndû, îthe na ng'ina nîmakaamûmunda na kaviû mamûrage.

⁴ Kavinda kau gakinya, arathi nîmakegucaga nthoni nî cioneki ciao. Matigetîkîra gwîkîra nguo irîa irî guoya cia ûrathi nîguo maveenanie,

⁵ nwatî nîakaauga atî ‘Nie ndirî mûrathi, nîrî mûrîmi na ndûûraga ndutaga wîra wa kûrîma kuuma nîrî mûndû mwîthî.’

⁶ Na mûndû angîkaamûria, ‘Ironda ino irî mûrukuthu nî cia ndûî?’ Akaamûcokeria ‘Ironda ino nagurarîre kwa mûrata wakwa.’ ”

Watho wa kûraga mûrîthi wa Ngai

⁷ Ngai-Mûnene mwene vinya wonthe augîte atîrî, “We rûviû rwa njûra, ûkîra ûtharîkîre mûrîthi wakwa, ûtharîkîre mûndû ûrîa ûndungatagîra. Ûraga mûrîthi nacio ng'ondu nîikûnyagania; na nîngûtharîkîra irîa nini.

⁸ Vûrûrirî wonthe, icunjî igîrî cia ithatû cia andû nîmagûkua, gîcunjî kîmwe Kîam ithatû nîkîo gîgaatigwa kîrî mwoyo.

⁹ Gîcunjî kîu kîmwe Kîam ithatû nîngaagikia mwakirî, na nîmatherie ta ûrîa mûndû atheragia sîlûva na mwaki, na nîmagerie ta ûrîa thaavu îgeragua na mwaki. Nîmakaamvoya, nanie nîngaacokia mavoya mao; Nie nîngaauga atî o nî andû akwa, nao nîmakaauga atî, nî nie Ngai-Mûnene Ngai wao.”