Zakaria 12 - ÎVUKU RÎA ÛVORO MWARO

Jerusalemu nîkaavonokua

¹ Îno nî ndûmîrîri ndito îgiî Isiraeli kuuma kûrî Ngai-Mûnene ûrîa waûmbire îgûrû, na akîûmba nthî na akîva mûndû mwoyo. Ke arauga atîrî,

² “Taroria, nîngûtûma Jerusalemu îtuîke ta gîkombe gîa kîndû kîngîtûma mûndû arîwe ta ûnyuîte ndivei. Juda nîkaatharîkîrwa na Jerusalemu îrigicîrue.

³ Vîndî îo nîngaatûma Jerusalemu îtuîke ta îthiga rîrito kûrî andû onthe. Arîa makaageria kûrîûkîrîria nîmagaativua nîrîo. Mavûrûri monthe ma nthî nîmakaarîtharîkîra.

⁴ Vîndî îo nîngaatûma mbarathi igwatwe nî guoya, na andû arîa mathiîcaga maciîkarîrîte matuîke ta agûrûki. Nîngaagitîra nyomba ya Juda, nwatî nîngatûma mbarathi icio ciîngî cionthe ituîke ndumumu.

⁵ Nacio mbarî cia Juda nîikeranaga atî ‘Andû a Jerusalemu mavecagwa vinya nî Ngai-Mûnene mwene vinya wonthe, Ngai wao.’

⁶ “Vîndî îo nîngaatûma mbarî cia Juda ituîke ta mwaki ûgwakana mûtitûrî, kana ta mwaki ûgwakana mûgûndarî wa ngano îrî nyûmû. Nîikaavîvia ndûrîrî cionthe irîa iithiûrûrûkîrîtie na mwena wa ûrîo na wa ûmotho. Nwatî andû arîa matûûraga Jerusalemu magaatûûra kûu îtûûrarî na thayû.

⁷ “Nake Ngai-Mûnene nîakaavonokia mbere andû arîa matûûraga Juda, nîguo nyomba ya Daudi na andû arîa matûûraga Jerusalemu matikone takwa marî aro gûkîra andû a Juda.

⁸ Vîndî îo Ngai-Mûnene nîakaagitîra andû arîa matûûraga Jerusalemu, nîguo andû arîa matarî vinya gatagatîrî kao makaagîa na vinya ta mûthamaki Daudi. Nacio njiarwa cia Daudi nîigaatongoria andû a Juda ta araika a Ngai-Mûnene, ta arî Ngai ûramatongoria.

⁹ Na vîndî îo nîngaacûkangia vûrûri wonthe ûrîa ûkaatharîkîra Jerusalemu.

¹⁰ “Njiarwa cia Daudi na andû arîa matûûraga îtûûrarî rîa Jerusalemu nîngaamecûria roho wa kwîgucanîra ntha na wa kûvoya. Nao maaroria ûrîa maamundire, nîmakaamûcakaîra ta ûrîa mûndû acakaagîra mwana wa kîmomwe, na mamûrîrîre na ûrûrû mwîngî ta wa mûndû ûkûrîrîra îrikithathi rîakua.

¹¹ Vîndî îo Jerusalemu nîgûkaagîa na kîrîro kînene wata kîrîa Kîamrîrirwe Hadadi Rimoni vûrûrirî ûrîa mwaraganu wa Megido.

¹² Vûrûri wonthe nîûkaagîa na kîrîro. Wa nyomba nîkaarîraga îrî yonga. Nyomba cia mbarî ya Daudi nîikaarîra irî cionga, na aka ao marî onga. Nyomba cia mbarî ya Nathani nîikaarîra irî cionga na aka ao marî onga.

¹³ Nyomba cia mbarî ya Lawi nîikaarîra irî cionga na aka ao marî onga, wana mbarî cia nyomba ya Shimei na aka ao;

¹⁴ na mbarî icio ciîngî cionthe ciatigara vamwe na aka ao nîikaarîra.”