Zakaria 11 - ÎVUKU RÎA ÛVORO MWARO

Kûgwa kwa mothamaki marîa marî vinya

¹ We Lebanoni, vingûra mîrango yaku, nîguo mwaki ûvîvie mîtarakwe yaku.

² Mue mîthithinda, rîrani nîûndû mîtarakwe nîmîgwîu nthî, mîtî îrîa îrî riiri nîmiunangîku. Mue mîvuru ya Bashani rîrani, nîûndû mîtî ya mûtitû ûrîa mûnene nîîragwîthua!

³ Tathikîrîriani kîrîro Kîam arîthi, nîûndû riiri wao nîmûthiru! Tathikîrîriani mûraramo wa mînyambû, nîûndû mîtitû îrîa îrî rûtere rwa rûnjî rwa Jorodani nîmîanangîku!

Arîthi aîrî

⁴ Ngai-Mûnene Ngai wakwa nîwambîrire atîrî, “Tuîka mûrîthi wa ng'ondu irîa ithiîte kûthînjwa.

⁵ Arîa maigûrîte maithînjaga na mativerithagua, na rîrîa megûciendia maugaga atî, ‘Ngai-Mûnene arogoocwa, nînatonga,’ na arîthi a cio o ene maticiîgucagîra ntha.”

⁶ Ngai-Mûnene augîte atîrî, “Ndigûcoka kwîguîra andû a gûkû nthî ntha rîngî. Nîndiganîria wa mûndû njararî cia mûndû ûrîa wîngî na nîmatiganîrie wa mûndû njararî cia mûthamaki wake. Nao nîmakaavinyîrîria nthî, na gûtirî mûndû ngaavonokia njararî ciao.”

⁷ Kwoguo, arîa magûraga na kwendia ng'ondu nîmaamandîkire na ngîtuîka mûrîthi wa ng'ondu irîa ciathiîte kûthînjwa. Nînaacokire ngîoca mîragi îîrî. Mûragi ûmwe naaûtuîrîre rîîtwa “Ûtugi,” na ûcio wîngî ngîûtuîrîra rîîtwa “Wîgucano.” Nînacokire ngîthiî kûrîthia ng'ondu.

⁸ Îvindarî rîa mweri ûmwe nînaûragire arîthi acio athatû acûku. Nînaaremirwe nîkwîguithania na ng'ondu icio na wanacio ikîmena.

⁹ Kwoguo nînaaciîrire atîrî, “Ndigûcoka gûtuîka mûrîthi wenyu rîngî. Ethîrwa nî gûkua, kuani. Ethîrwa nî kûragwa, ûragwani. Ng'ondu irîa igûtigara nîikûrîcana cio mene na ithiranie.”

¹⁰ Nînoocire mûragi ûrîa naatuîrîrîte rîîtwa Ûtugi na ngîunanga maita maîrî nîguo ntharûrie kîrîkanîro kîrîa naarîkanîrîte na andû onthe.

¹¹ Kwoguo kîrîkanîro nîkîatharûrirue mûthenya ûcio. Andû arîa maagûraga na makendia ng'ondu nîmaandoretie, na nîmaamenyire atî nî Ngai-Mûnene waragia kûvîtûkîra ciîko ciakwa.

¹² Nînacokire ngîmera atîrî, “Mûngîona arî waro ndîvani mûcara wakwa, narîo mûngîona atarî waro, îkarani naguo.” Nîmaandîvire mûcara wa mbeca cia sîlûva mîrongo îthatû.

¹³ Ngai-Mûnene nîwacokire akîmbîra atîrî, “Ciikie kîgînarî gîa hekarû.” Nînocire mûcara ûcio noonire nîguo ûmbagîrîrîte. Kwoguo nînoocire mbeca icio cia sîlûva mîrongo îthatû na ngîciga kîgînarî gîa hekarû ya Ngai-Mûnene.

¹⁴ Nînacokire ngiunanga mûragi wa kaîrî ûrîa natuîrîrîte rîîtwa Wîgucano, nîguo monanie atî nînatharia ngwatanîro gatagatî ka Juda na Isiraeli.

¹⁵ Ngai-Mûnene nîwacokire akîmbîra rîngî atîrî, “Tuîka mûrîthi rîngî nwatî vîndî îno wîtue mûrîthi ûtarî mwaro!

¹⁶ Nînthurîte mûrîthi gûkû vûrûrirî. Mûrîthi ûcio ndamenyagîrîra ng'ondu irîa igûkua, kana irîa ciûrîte, kana ova irîa munîku, kana arîthia irîa irî na vinya. Vandû va ûguo, athînjaga na akarîa nyama cia ng'ondu irîa noru na agaatûranga mavûngû ma cio.

¹⁷ Mûrîthi ûcio wakwa ûtarî mwaro arî na thîna, ûcio ûtiganagîria ndîthia ya ng'ondu! Arotinua njara yake na arokûrwa ritho rîake rîa mwena wa ûrîo. Tiga njara yake îtuîke kîonje vuru na ritho rîake rîa mwena wa ûrîo rîûre ûrû!”