Zakaria 10 - ÎVUKU RÎA ÛVORO MWARO

Ngai-Mûnene nîweranîre kûvonokania

¹ Voyani Ngai-Mûnene amûve mbura vîndî ya mbura nini, Ngai-Mûnene nîke ûtûmaga kûgîe na matu maumaga mbura, akauria mbura na mîgûnda îkagîa na irio nîûndû wa andû onthe.

² Andû matuîragia maûndû kûrî ngai cia mana, na aragûri makoona cioneki cia maveeni; iroto ciao ciîthagîrwa irî cia maveeni, na kûmanîrîria kwao nîkwa mana. Kwoguo andû maûrûraga ta ng'ondu; mavinyagîrîrua nîûndû matirî na mûrîthi.

³ Ngai-Mûnene mwene vinya wonthe augîte atîrî, “Nîndakarîtue mûno nî arîthi, na nîngaaverithia atongoria nîûndû Ngai-Mûnene nî amenyagîrîra andû ake a Juda; nîakaamatua ta mbarathi ciake cia mbaara irî na vinya.

⁴ Juda nîgûkaauma athamaki a mîthemba mîîngî, atongoria mekariî ta îthiga rîa kona, kana gîkingi Kîam îgema, na marî na vinya ta ûta ûrîa ûvûthagîrwa mbaararî.

⁵ Andû a Juda magekara ta athigari njamba marî mbaararî, irîa irangagîrîria nthû ciao ta ndaka njîrarî. Makaarûaga nîûndû Ngai-Mûnene akethagîrwa arî vamwe nao, na nîmagaaconorithia athigari arîa mathiîcaga matwîte mbarathi.

⁶ Nîngaatûma nyomba ya Juda îgîe vinya, na nîngaavonokia nyomba ya Josefu. Nîngaamacokia kwao nîûndû nînîmegucagîra ntha, na nîmagekara ta andû ndanatiganîria, nîûndû nî nie Ngai-Mûnene, Ngai wao, na nîngegua mavoya mao.

⁷ Andû a Efiraimu magaatuîka ta njamba cia vinya mbaara irî vinya, makaagîa na gîkeno ta andû manyuîte ndivei. Ciana ciao nîigaakena ciona ûguo, ngoro ciao nîigaakena nîûndû wa Ngai-Mûnene.

⁸ Nîngaameta na nîmagaacokanîrîra vamwe, nîûndû nînîmakûrîte, na nîmakoongerereka na mengîve ta ûrîa meekariî mbererî.

⁹ Wana ethîrwa nînamanyaganîrîtie mavûrûrirî mengî, marî mavûrûrirî mau ma kûraca, nîmakaandirikana, na vamwe na ciana ciao nîmagaatigara na macoke mûciî kwao.

¹⁰ Nîngaamaruta Misiri na Asîria nîmacokie mûciî, nîmacokie vûrûrirî wa Gileadi na wa Lebanoni, nginya mecûre vûrûri wonthe.

¹¹ Makaavîtûkîrîra îriarî rîa mathîna, na makûmbî ma manjî ma îriarî nîngaatûma mavwe, na ndûme manjî marîa ma rûnjîrî rûrîa rûrikîru rwa Nailo mavwe. Mwîtîîo wa vûrûri wa Asîria nîngaaûthiria, naguo wathani wa Misiri ndûme ûthire.

¹² Nîngaatûma andû akwa magîe na vinya, na nîmakaambathîkagîra na mangoocage.” Nînie Ngai-Mûnene nauga ûguo.