Zakaria 1 - ÎVUKU RÎA ÛVORO MWARO

Ngai-Mûnene nîwetire andû ake mamûcokerere

¹ Mwerirî wa kanana mwaka wa kaîrî kuuma Dario atuîka mûthamaki, Ngai-Mûnene nîwarîrie mûrathi Zakaria mûvîcî wa Berekia, Berekia mûvîcî wa Ido na akîmwîra atîrî,

² “Nie Ngai-Mûnene nînaarakarire mûno nî methe menyu ma tene.

³ Kwoguo îra andû Ngai-Mûnene mwene vinya wonthe augîte, ‘Njokererani nanie nîngûmûcokerera.’

⁴ Mûtigekare ta methe menyu ma tene arîa meerirwe nî arathi arîa maarî kuo mbere matigane na mîthiîre yao mîcûku na ciîko ciao njûku, nwatî matianthikîrîria kana mambathîkîra nie Ngai-Mûnene mwene vinya wonthe.

⁵ Arathi nîmatûûraga tene na tene? Methe menyu ma tene marî kû?

⁶ Methe menyu nîmaareganire na irîra na mawatho marîa namathire na njîra ya arathi ndungata ciakwa. Kwoguo nîmaaverire na makiuga atî nie Ngai-Mûnene Mûnene mwene vinya wonthe, nîmaverithîtie kûringana na mîthiîre yao na ciîko ciao wa ta ûrîa natuîte, na nîguo naamekire.”

Mûrathi nîwonire kîoneki kîa mbarathi

⁷ Mûthenya wa mîrongo îîrî na îna wa mweri wa îkûmi na ûmwe, (mweri ûcio nîguo wîtagwa Shebati) mwaka wa kaîrî kuuma Dario aatuîka mûthamaki Ngai-Mûnene nîwarîrie mûrathi Zakaria mûvîcî wa Berekia na njîra ya kîoneki. Berekia aarî mûvîcî wa Ido. Nake Zakaria nîwaugire atîrî,

⁸ “Ûtukû nîronire kîoneki Kîam mûndû athiîte ekarîrîte mbarathi ndune. Mûndû ûcio aarûngamîte gatagatî ka mîtî ya mîandathi vandû Kîamndarî. Vuva wake kwarî na mbarathi ciîngî, îmwe yarî ndune, îngî nthitu, na îngî ya rangi mûcerû.”

⁹ Nanie nînaamûririe atîrî, “Mwathi wakwa, mbarathi ino ironania atîa?” Mûraika ûrîa wambarîrîrie nîwanjokerie atîrî, “Nîngûkwonia ûrîa irenda kwonania.

¹⁰ Nîwaugire atî mbarathi icio ciatûmîtwe nî Ngai-Mûnene mwene vinya wonthe ikone ûrîa nthî îkariî.”

¹¹ Nacio nîciacokerie mûraika wa Ngai-Mûnene ûrîa warûngiî gatagatî ka mîandathi atîrî, “Nîtûthiûrûrûkîte nthî yonthe na tûkona atî nthî yonthe nî îvorerete.”

¹² Nake mûraika ûcio wa Ngai-Mûnene nîwaûririe atîrî, “We Ngai-Mûnene mwene vinya wonthe wîthîrîtwe ûrakarîrîte Jerusalemu na matûûra ma Juda mîaka mîrongo mûgwanja. Nîwîkara îvinda rîgana atîa ûtakûmeguîra ntha?”

¹³ Nake Ngai-Mûnene nîwacokerie mûraika ûrîa twaragia nake na ciugo cia ntha na cia kûmanîrîria.

¹⁴ Kwoguo mûraika ûcio nîwambîrire atîrî, “Anîrîra uge atî Ngai-Mûnene mwene vinya wonthe arî na wendo mwîngî mûno wa Jerusalemu na Zayuni.

¹⁵ Nîrîmûrakaru mûno nî mavûrûri marîa marî na thayû, nîûndû rîrîa narakarîrîte andû akwa vanini, mavûrûri mau maathiîre na mbere kûmanyamaria makîria.

¹⁶ Kwoguo, nînjokete îtûûrarî rînene rîa Jerusalemu nîguo nîrîguîre ntha. Hekarû yakwa nîgaatumwa îtûûrarî rîu rîa Jerusalemu na rîcoke rîtumwe rîngî.”

¹⁷ “Anîrîra rîngî uge Ngai-Mûnene mwene vinya wonthe augîte atî matûûra ma andû ake nîmagaacoka magacîre mûno, na Ngai-Mûnene aûmîrîrie Zayuni na athuure Jerusalemu.”

Kîoneki kîa mvîa

¹⁸ Nînaacokire ngîroria na ngîona mvîa inya.

¹⁹ Nînaûririe mûraika ûrîa twaragia nake atîrî, “Mvîa ino irenda kwonania atîa?” Nake nîwanjokerie atîrî, “Ino nîcio mvîa irîa inyaganîtie Juda, Isiraeli na Jerusalemu.”

²⁰ Ngai-Mûnene nîwacokire akîmonia aturi ana a cuuma.

²¹ Nînacokire ngîmûria atîrî, “Aya nao maûkîte gwîka atîa?” Nake nîwanjokerie atîrî, “Maûkîte kûmakia na gûcûkangia mavûrûri marîa maarangire vûrûri wa Juda na makîûnyagania.”