Tito 2 - ÎVUKU RÎA ÛVORO MWARO

Kîrîra kîa ma

¹ Nwatî we Tito, nwa nginya ûthomithanie maûndû marîa maringanîte na kîrîra Kîam ma.

² Îraga athuuri arîa akûrû mekarage meîguîte, marî na mîtugo mîaro, andû mangîvota kwînyitia maûndûrî, na methagîrwe marî na wîtîkio wa ma, marî na wendo na ûmîrîru.

³ Na njîra wata îno, îra aka arîa akûrû mekare na mîtugo îrîa aka arîa atheru magîrîrwe nî kwîthîrwa nayo. Matiagîrîrwe nî gûtuîka aka a gûcukanaga, kana matuîke ngombo cia ndivei. Meere atî nwa nginya mathomithanagie maûndû marîa maro,

⁴ nîguo mathomithie aka arîa ethî kwenda athuuri ao na ciana ciao.

⁵ Nîmagîrîrwe nî kwînyitagia maûndûrî na kwîthagîrwa marî atheru, na marî aka aro a mûciî. Nîmagîrîrwe nî kwathîkîra arûme ao, nîguo arûme matikagîe na ûndû ûngîcambithia ndûmîrîri ya Ngai.

⁶ Na njîra ta îno, îra anake wanao menyitagie maûndûrî.

⁷ Maûndûrî monthe, nwa nginya we wîthagîrwe ûrî kîonereria Kîam mîtugo mîaro. Vîndî îrîa ûrathomithia, onanagia ûgima na wîthagîrwe ûrî na gîtîîo.

⁸ Aragia ûvoro wa ma ûrîa ûtangîrutwa mavîtia nîguo arîa mareganaga nawe maconokage nîûndû matirî na ûndû mangîtûthitanga naguo.

⁹ Ngombo nacio nwa nginya ciathîkagîre athani acio na îmakenagie maûndûrî monthe. Itiagîrîrwe nî gûkararania nao,

¹⁰ kana kûmaîa. Vandû va ûguo, nwa nginya ciîthîrwe irî mbaro na ciîvokekete nîguo maûndûrî monthe marîa ciîkaga cionanagie wagîrîru wa ndûmîrîri ya Ngai Mûvonokia wetû.

¹¹ Ngai nîwonanîtie wega wake ûrîa ûretagîra andû onthe a nthî ûvonokio.

¹² Wega ûcio wa Ngai nîûtûtaaraga tûreganage na maûndû marîa matarî ma ûngai na tûtigane na merirîria ma maûndû ma gûkû nthî. Wega ûcio nîûtûtaaraga twîkarage twînyitîtie maûndûrî, tûrî andû arûngîrîru na twîtîkîtie Ngai rîrîa tûrî nthî îno.

¹³ Nîtwagîrîrwe nîgwîkaraga ûguo wa tûgîetagîrîra mûthenya ûrîa mûrathime twîrîgîrîrîte. Mûthenya ûcio nîguo riiri wa Ngai ûrîa mûnene na mûvonokia wetû Jesû Kristû ûkoonekana.

¹⁴ Ke nîwevecanire nîûndû wetû nîguo atûkûûre kuuma kûrî waganu wa mîthemba yonthe na atûtue andû atheru ake ke mwene, na andû meriragîria gwîka maûndû maro.

¹⁵ Thomithagia andû maûndû mama, makanagie na ûmekagîre vinya ûgîtûmagîra wathani waku. Ndûkanareke mûndû wana ûrî kû akwire.