Tito 1 - ÎVUKU RÎA ÛVORO MWARO

¹ Kuuma kûrî Paûlo ndungata ya Ngai na mûtûmwa wa Jesû Kristû. Nie naathuurirwe na ngîtûmwa ngatethererie andû arîa athuure nî Ngai ûvororî wa gwîtîkia na nîmamenyithie ûvoro wa ma, ûrîa ûthomithanîtue nî ndini yetû.

² Ûvoro wa gwîtîkia na kûgîa na ûmenyo wa ûvoro wama nî ûvecanaga kîîrîgîrîro Kîam Mwoyo wa tene na tene kîrîa Ngai ûrîa ûtaveenanagia aatwîrîre kuuma Kîammbîrîria.

³ Ngai mûvonokia wetû nîwatûmire ûvoro ûyû ûmenyeke kavinda karîa kagîrîrîte na nîguo nîîvokeretwe na ngavewa watho wa kûûvunjia.

⁴ Kûrî Tito, mwana wakwa wa ma wîtîkiorî ûrîa tûgwatanîrîte. Ûrogîa na wega na thayû kuuma kûrî Ngai Vava na kuuma kûrî Jesû Kristû mûvonokia wetû.

Wîra wa Tito arî Kirete

⁵ Tito, nie naagûtigire Kirete nîguo ûthondeke maûndû marîa maarî mavîtanu, na wa îtûûra, ûthuure athuuri a kanitha. Ririkana ûrîa naakwathire atî:

⁶ nwa nginya mûthuuri wa kanitha ethagîrwe atarî na ûcuke, na ethîrwe avikîtie mûndûmûka ûmwe. Ciana ciake nwa nginya ciîthagîrwe ciîtîkîtie Jesû Kristû, irî na ngumo mbaro na irî mbathîki.

⁷ Mûtongoria wa kanitha arutaga wîra wa Ngai, kwoguo ndagîrîrwe nî kwîthîrwa arî na ûcuke. Ndagîrîrwe nî kwîthîrwa arî mwîtîi, mûrakari narua, mûrîu wa njovi, mwendi mbaara kana mûkorokeru mbeca.

⁸ Mûtongoria wa kanitha agîrîrwe nîkwîthîrwa arî mûndû mûtugani, mûndû wendete maûndû marîa maro, mwînyitia maûndûrî, mûndû mûrûngîrîru, mûndû mûtheru na mûndû wîyathîte.

⁹ Agîrîrwe nî kwîthîrwa arî mûndû mwîkindîriu ûvororî ûrîa ûngîîvokwa, na wîtîkanîtie na ûvoro wama ûrîa tûthomithagia. Kwoguo, akaavotaga kûmîrîria andû arîa engî na ûvoro wa ma na akavotaga kwonania mavîtia ma andû arîa maûregaga.

¹⁰ Nama kûrî andû eengî, na makîria arîa maumîte ndinirî ya Ayahudi, arîa makararagia na makaveenia andû na maûndû mao matarî vata.

¹¹ Andû acio nîmagîrîrwe nî kûgirua marie nîûndû nî macûkîtie mîciî mîîngî na njîra ya kûthomithania maûndû marîa mataagîrîrîte. Mekaga ûguo nîûndû wa gûcaria mbeca na njîra îrîa îtagîrîrîte.

¹² Mûrathi ûmwe gatagatîrî kao na wanake aarî wa kuuma Kirete, augire atîrî, “Andû a Kirete nîmaveenanagia vingo cionthe na nî acûku ta nyamû cia kîthaka na nî igûta ngoroku.”

¹³ Arathi maarîtie ûvoro wa ma. Kwoguo nwa nginya ûmakaanie na vinya mûno nîguo magîe na wîtîkio mûkinyanîru,

¹⁴ na ûmeere matige kûthikîrîria ng'ano cia tene cia Ayahudi na maathani ma andû arîa mareganîte na ûvoro wa ma.

¹⁵ Indo cionthe nî ntheru kûrî andû arîa atheru. Nwatî kûrî andû arîa aganu na matetîkîtie gûtirî kîndû kîtheru nîûndû meciria mao na thamiri ciao nî ino nthûkangie.

¹⁶ Maugaga atî nîmecî Ngai nwatî ciîko ciao nîireganîte na ûvoro ûcio. Nîmathwîre andû arîa engî, matiathîkaga na matingîvota gwîka ûndû mwaro.