Thaburi 9 - ÎVUKU RÎA ÛVORO MWARO

Gûcokia ngatho kûrî Ngai nîûndû arî kîvooto

¹ Nîngaacokeria ngatho Ngai-Mûnene na ngoro yakwa yonthe, ngaaragia ûvoro wa maûndû monthe ma magegania marîa wîkîte.

² Ngaakwinagîra na gîkeno nîûndû wa ûrîa wîkîte, nîngaaina ngîkumia rîîtwa rîaku, we ûrîa ûrî Îgûrû Mûno.

³ Rîrîa nthû ciakwa ciakwona nîicokaga na vuva, ikagwa nthî na igakua.

⁴ Nî ûnduîrîtie na ûgatua atî nîrî mûthingu, nîûndû ûnduîrîrîte na kîvooto.

⁵ We nîûkaanîtie andû a ndûrîrî, nîûcûkangîtie andû arîa aganu, na nîûtûmîte marîîtwa mao mariganîre tene na tene.

⁶ Nthû cietû nîithirîte na ikariganîra tene na tene, nîûcûkangîtie matûûra mau mao, na matikaaririkanwa rîngî tene na tene.

⁷ Nwatî Ngai-Mûnene nî mûthamaki tene na tene, na nîekarîrîte gîtî gîake Kîam ûnene nîguo atucanîre.

⁸ Atucagîra nthî na ûthingu, atucagîra mavûrûri na kîvooto.

⁹ Andû arîa avinyîrîrie mathiîcaga kûrî Ngai-Mûnene amagitîre, nîke vandû va kûûrîra vîndî ya thîna.

¹⁰ Arîa maicî rîîtwa rîaku nîmakwîvokete, nîûndû we Ngai-Mûnene ndûtiganagîria arîa magûcaragia.

¹¹ Inani nyîmbo cia gûkumia Ngai-Mûnene, ûrîa ûtûûraga Zayuni! Îrani andû a onthe ûrîa Ngai-Mûnene ekîte.

¹² Nîûndû arîa maûragagwa Ngai-Mûnene nîamarîvagîrîria, ndariganagîrwa nî kîrîro Kîam arîa maranyarirîka.

¹³ Mbîguîra ntha, we Ngai-Mûnene! Taroria ûrîa nîrathînua nî nthû ciakwa! Mvonokia ndigakue, we Ngai-Mûnene,

¹⁴ nîguo ngaarûngama mbere ya andû a Jerusalemu, na nîmere maûndû monthe marîa matûmaga ngûkumie. Nîngaakena nîûndû nîûmvonoketie.

¹⁵ Andû a ndûrîrî nî magwîte îrimarî rîrîa meenjire, nî manyitîtwe nî mûtego ûrîa maategire o ene.

¹⁶ Ngai-Mûnene nîemenyithanîtie na njîra ya gûtuîrîra andû na kîvooto, nao andû arîa aganu nî manyitîtwe nî ciîko cio o ene.

¹⁷ Andû onthe arîa aganu nîmakaathiî kwa arîa akuû, andû onthe arîa mariganagîrwa nî Ngai.

¹⁸ Ngai nîakeegua mavoya ma andû arîa marî na ûvatari, mwîvoko wa andû arîa athîni ndûkaathira tene na tene.

¹⁹ Ûka, Ngai-Mûnene! ndûkareke andû mavootane! Rete andû a ndûrîrî varî we na ûmatuîre.

²⁰ Tûma megue guoya, we Ngai-Mûnene; tûma andû a ndûrîrî mamenye atî, o nî andû.