Thaburi 88 - ÎVUKU RÎA ÛVORO MWARO

Mavoya na macakaya vîndî ya thîna

¹ We Ngai-Mûnene, Ngai wakwa, ngûkayagîra ûtukû na mûthenya.

² Tiga îvoya rîakwa rîkinye kûrî we, thikîrîria kîrîro gîakwa.

³ Nînyitîtwe nî mathîna meengî, na nîrî vakuvî gûkua.

⁴ Nie mbîkariî ta mûndû ûrî vakuvî gûkua; nie nîrî mûthiru vinya.

⁵ Ta mûndû ûtiganîrîtue gatagatî ka arîa akuû; ta mûndû mûrage amamîte mbîrîrarî, ta arîa ûriganîrîtwe nîo viû, arîa watigire kûva ûtethio.

⁶ Ngai-Mûnene ûmbikîtie mbîrîrarî kûndû kûriku, kûrîa kûrikîru na kûrî na nduma nene.

⁷ Marakara maku nîmanditûvîrîte, marakara maku mangimanîtie ta makûmbî ma manjî îriarî.

⁸ Nîûtûmîte arata akwa mandiganîria; nîûtûmîte nduîka kîndû kîrî magigi kûrî o. Mvingîrîtwe nîguo ndikavote kûûra.

⁹ Metho makwa nî marathira vinya nî kîeva. We Ngai-Mûnene ngûkayagîra vîndî cionthe, nyambararagia njara ciakwa kûrî we.

¹⁰ Anga nîûringagîra arîa akuû ciama? Anga ciîruru nî ciûkagîra na igagûkumia?

¹¹ Wendo waku ûtathiraga nwa warue mbîrîrarî, kana wîvokeku waku warue îcuarî?

¹² Ciama ciaku nî cionekaga kûrîa kûrî nduma, kana wega waku ûmenyekane kûrî arîa ûriganîrîtwe nî o?

¹³ Nwatî we Ngai-Mûnene, nîwe ngaagîra; nîngûvoyaga wa kîraûko.

¹⁴ We Ngai-Mûnene ûndiganîrîtie nîkî? Ûriganîrîtwe nînie nîkî?

¹⁵ Kuuma nîrî mûnini ndwîre nthînîkaga na ngakuvîvîria gûkua, nî nthînîkîte na ngathira vinya viû nîûndû wa îverithia rîaku.

¹⁶ Nîrî mûcûkangie nî marakara maku, ntharîkîro yaku nene nîînjûkangîtie viû.

¹⁷ Manthiûrûrûkagîria ta mwîcûro wa manjî mûthenya mûgima, mandigicîrîtie na mîena yonthe.

¹⁸ Nîûtûmîte andû etû na arata akwa onthe mandiganîria, kûrîa kuonthe nthiîcaga kwîthagîrwa nduma ntheri.