Thaburi 7 - ÎVUKU RÎA ÛVORO MWARO

Îvoya nîûndû wa kîvooto

¹ Ûûi Ngai-Mûnene, Ngai wakwa, mbûkaga varî we ûngitîre, Mvonokia na ûndute kûrî arîa onthe manjaragia,

² nîûndû warega kûmvonokia, nîmandambururanga ta mûnyambû, na gûtirî mûndû wîngî ûngîndethia.

³ Ûûi Ngai-Mûnene, Ngai wakwa, ethîrwa mvîtîrîtie mûndû, ethîrwa njukanîrîrîte mûrata,

⁴ ethîrwa mbocete indo cia nthû yakwa na vinya gûtarî na gîtûmi, ethîrwa mbîkîte ûmwe wa maûndû mama,

⁵ tiga nthû ciakwa inûmîrîrie na inginyîrîre, tiga manginyange na mambûrage, matige mamîte mûtheturî nîrî mûkuû!

⁶ Ûûi Ngai-Mûnene, rûngama na marakara maku! ûûkîrîre marakara ma nthû ciakwa. Ûka we Ngai wakwa, ûka ûndethie, nîûndû wendaga kîvooto kîrûmagîrîrwe.

⁷ Îta andû onthe makûthiûrûrûkîrie, na wathane ûrî kûu îgûrû.

⁸ We Ngai-Mûnene, nîwe ûtucagîra andû onthe, Ngai-Mûnene, nduîrîra kûringana na ûthingu wakwa, nîûndû gûtirî ûndû mûcûku mbîkîte.

⁹ We wî Ngai mûthingu, na ûtucagîra ngoro cietû na meciria metû, thiria waganu wa eki naaî, na ûrathime andû arîa athingu.

¹⁰ Ngai nîke ûngitagîra, na nîavonokagia arîa mamwathîkagîra.

¹¹ Ngai atucanagîra na kîvooto, na nî arumaga andû arîa aganu vîndî cionthe.

¹² Andû mangîrega gûcenjia mîtugo yao, Ngai nîakaanoora rûviû rwake; nîakagucia ûta wake evarîrîtie kûratha.

¹³ Ocaga indo ciake cia mbaara irîa ciûraganaga, na akerekeria andû acio mîguî yake îgwakana mwaki.

¹⁴ Taroria, andû arîa aganu mavangaga maûndû marîa macûku; mecûrîtwe nî wîki naaî na maragia maveeni.

¹⁵ Menjaga marima nîguo andû arîa engî magwe kuo, nwatî o ene nîo magûcaga kuo.

¹⁶ Macokagwa nî maûndû mao marîa macûku, na makaverithua nî waganu wao o ene.

¹⁷ Nî ngaacokeria Ngai-Mûnene ngatho nîûndû wa ûthingu wake, na nîngaaina ngumie rîîtwa rîa Ngai-Mûnene, ûrîa ûrî Îgûrû Mûno.