Thaburi 2 - ÎVUKU RÎA ÛVORO MWARO

Mûthamaki ûrîa Ngai athuurîte

¹ Atongoria a mavûrûri mavangaga kûregana na Ngai nîkî, na makagîa na mîvango ya mana?

² Athamaki a nthî nîmevaragîria, nao atongoria a nthî makathiî ndundu nîguo maregane na Ngai-Mûnene na maregane na mûthamaki ûrîa Ngai-Mûnene athuurîte makiugaga atîrî,

³ “Tiga tûtucange mînyororo îrîa matwovete nayo, na tuume wathanirî wao.”

⁴ Ûrîa wîkaragîra gîtî Kîam ûthamaki kûu îgûrû nîathekaga; Ngai-Mûnene nîamanyûrûragia.

⁵ Nîacokete akamarîria arî na marakara, na akameguithia guoya akameera atîrî,

⁶ “Nîmbigîte mûthamaki ûrîa nthurîte, nîmwigîte Zayuni, kîrîmarî gîakwa kîtheru.”

⁷ Mûthamaki arauga atîrî, “Nie ngaanîrîra ûrîa Ngai-Mûnene augîte. Ngai-Mûnene aambîrire atî, ‘Ûmûnthî nîwatuîka mûvîcîwa, nanie nînatuîka aguo.

⁸ Mbîtia mavûrûri monthe ma nthî na nî ngûkûva, nthî yonthe nîîtuîka yaku.

⁹ Nîûgaacûkangia mavûrûri marîa mengî mathire viû, ûkaamaûraga mavaragane ta nyûngû ya yûmba.’ ”

¹⁰ Kwoguo mue athamaki, tuîkani andû aûgî; mue atongoria a nthî, thikîrîriani ûrîa mûrakaanua:

¹¹ Goocagani Ngai-Mûnene na gîtîîo mûkinainaga,

¹² mûgooceni mwînyivîtie, nîguo ndakarakare na îvenya, mûkua mûtakinyitie. Kûrathimwa nî andû onthe arîa mathiîcaga kûrî Ngai amagitîre.