Thaburi 141 - ÎVUKU RÎA ÛVORO MWARO

Îvoya rîa kîvwaî

¹ We Ngai-Mûnene, nînîragwîta; ûka kûrî nie narua! Thikîrîria mûgambo wakwa ngîgûkaîra.

² Amûkîra îvoya rîakwa ta mûtararûko wa ûbani, na wamûkîre njara ciakwa, irîa mbûkîrîrîtie ta îgongoona rîa kîvwaî.

³ We Ngai-Mûnene, menyagîrîra kanyua gakwa, rangagîra mîromo yakwa.

⁴ Ndûkareke ngucîrîrua gwîka maûndû macûku, kana mbîka maûndû ma waganu. Ndûkareke nyitanîra na andû arîa mekaga maûndû ma waganu, kana ndîcanîra nao irugorî ciao.

⁵ Mûndû mûthingu nwa amverithie kana akangania arî na wendo mwîngî, nwatî ndingîtîkîra gûkumua nî andû arîa aganu, nîûndû vîndî cionthe mvoyaga matigane na ciîko ciao cia waganu.

⁶ Rîrîa athani ao magaaikua kuuma nguvarî ya îthiga, nîrîo makaamenya atî ciugo ciakwa ciarî cia ma.

⁷ Mavîndî mao manyagarûkîte mûromorî wa kwa arîa akuû, ta ûrîa ngû ciatûrangagwa ikîthendûkaga inuku inuku.

⁸ Nwatî we Ngai-Mûnene, Ngai wakwa, nîwe nîîvokete. Njaragia ûgitîri kûrî we; ndûkandiganîrie ngua.

⁹ Ngitîra kuuma kûrî mûtego ûrîa mandegerete, na kuuma kûrî mîtego ya arîa mekaga maûndû macûku.

¹⁰ Imaramari ironyitwa nî mîtego yacio cio mene, nanie nîîthiîre na thayû.