Thaburi 118 - ÎVUKU RÎA ÛVORO MWARO

Îvoya rîa gûcokia ngatho nîûndû wa ûvootani

¹ Cokeriani Ngai-Mûnene ngatho nîûndû nî mwaro; nîûndû wendo wake ûtathiraga ûtûûraga tene na tene.

² Tiga andû a Isiraeli mauge atîrî, “Wendo wake ûtathiraga ûtûûraga tene na tene!”

³ Tiga andû a nyomba ya Aroni mauge atîrî, “Wendo wake ûtathiraga ûtûûraga tene na tene.”

⁴ Tiga arîa onthe metigîrîte Ngai-Mûnene mauge atîrî, “Wendo wake ûtathiraga ûtûûraga tene na tene.”

⁵ Nîrî mînyamaarorî nînavoire Ngai-Mûnene; nîwegwire mavoya makwa na akîmvonokia.

⁶ Ngai-Mûnene arî vamwe nanie, gûtirî kîndû nîngîtigîra; mûndû angîvota kûmbîka atîa?

⁷ Ngai-Mûnene arî vamwe nanie nîguo andethagie, na nîngoona nthû ciakwa ikîvootwa.

⁸ Nîkava kwîthitha kûrî Ngai-Mûnene gûkîra kwiga mwîvoko kûrî mûndû.

⁹ Nîkava kwîthitha kûrî Ngai-Mûnene, gûkîra kwiga mwîvoko kûrî atongoria a nthî.

¹⁰ Mavûrûri monthe nîmaanthiûrûrûkîrie, nwatî nînaamavootire na vinya wa Ngai-Mûnene!

¹¹ Maanthiûrûrûkîrîtie na mîena yonthe, nwatî nînaamavootire na vinya wa Ngai-Mûnene!

¹² Maanthiûrûrûkîrîtie ta njûkî, nwatî maavîre makîthira na îvenya ta mîgua; nînaamavootire na vinya wa Ngai-Mûnene!

¹³ Nînatharîkîrwe mûno na naarî vakuvî kûvootwa, nwatî Ngai-Mûnene nîwandethirie.

¹⁴ Ngai-Mûnene nîke vinya wakwa na nîke minagîra; nîke ûtuîkîte ûvonokio wakwa.

¹⁵ Mîgambo ya gîkeno ya ûvootani nîreguîka magemarî ma arîa athingu: “Njara ya ûrîo ya Ngai-Mûnene nîîkîte maûndû manene!

¹⁶ Njara ya ûrîo ya Ngai-Mûnene nîyo îretete ûvootani; Njara ya ûrîo ya Ngai-Mûnene nîîkîte maûndû manene!”

¹⁷ Nie ndigaakua, nwatî nîngatûûra mwoyo, ngîanagîrîra ûrîa Ngai-Mûnene ekîte.

¹⁸ Ngai-Mûnene nîamverithîtie mûno; nwatî ndaandekereria ngua.

¹⁹ Mvingûrîra mîromo ya ûthingu; nîguo ndonye kuo ngacokerie Ngai-Mûnene ngatho!

²⁰ Ûyû nîguo mûromo wa Ngai-Mûnene; andû arîa athingu nîo magaatonyerera vo.

²¹ Nîngûgûcokeria ngatho we Ngai-Mûnene, nîûndû nîûnjokeretie îvoya rîakwa; na nîûtuîkîte ûvonokio wakwa.

²² Îthiga rîrîa rîaregirwe nî atumi a nyomba, nîrîo rîtuîkîte rîa vata mûno gûkîra marîa mengî monthe.

²³ Nî Ngai-Mûnene wîkîte ûguo; naguo tûwonaga wî ûndû wa magegania!

²⁴ Mûthenya ûyû nî Ngai-Mûnene ûtûmîte ûgîe, nîtûkeneni na tûkûngûîre!

²⁵ We Ngai-Mûnene, twakûthaitha ûtûvonokie! We Ngai-Mûnene, twakûthaitha ûtûtethie kûvootana!

²⁶ Ngai arorathima ûrîa ûkîte na rîîtwa rîa Ngai-Mûnene! Nîtwamûrathima tûrî nyombarî ya Ngai-Mûnene.

²⁷ Ngai-Mûnene nî Ngai; nîatûvete ûtheri wake. Nyitani mathîgî na njara mûthiî kîrugorî mûrûmanîrîrîte, mûthiûrûrûke metha ya kîgongoona!

²⁸ We nîwe Ngai wakwa, na nîngûgûcokeria ngatho; we nîwe ngai wakwa na nîngaanîrîra ûnene waku.

²⁹ Cokeriani Ngai-Mûnene ngatho nîûndû nî mwaro; nîûndû wendo wake ûtathiraga ûtûûraga tene na tene.