Thaburi 102 - ÎVUKU RÎA ÛVORO MWARO

Îvoya rîa mûndû arî na thîna

¹ We Ngai-Mûnene, thikîrîria îvoya rîakwa, kîrîro gîakwa nîgîkinye kûrî we!

² Ndûkandiganîrie rîrîa nîrî mathînarî! Nthikagîrîria, na ûnjokagîrie narua rîrîa ngûkûvoya!

³ Ûtûûro wakwa ûrathira ta ndogo, mwîrî wakwa ûrakana ta mwaki.

⁴ Nthirîtwe nî vinya ta nyaki îrî nyûmû, nthirîte nginya ngumba ya irio.

⁵ Ng'înjîte ngatigwa rûûo na mavîndî, nîûndû wa gûcaa mbugîrîrîtie.

⁶ Nie mbîkariî ta ndiiû ya werûrî, mbîkariî ta ndundu îrî îganjorî.

⁷ Ndaraga ndarî toro, mbîkariî ta gîconi gîtigîtwe kîonga îgûrû rîa nyomba.

⁸ Numagwa nî nthû ciakwa mûthenya tuku, arîa manyûrûragia matûmagîra rîîtwa rîakwa makîrumana.

⁹ Ndîcaga mûu ta irio, ndukanagia methori makwa na kîrîa nyunyaga,

¹⁰ nîûndû wa marakara maku na mang'ûrîka, wambocire na ûkînanda kûraca.

¹¹ Ûtûûro wakwa wîkariî ta kîruru gîa kîvwaî, nîraûma ta nyaki.

¹² Nwatî we Ngai-Mûnene, wî mûthamaki tene na tene; njiarwa cionthe nîitûûra ikûririkanaga.

¹³ Nîûkaarûngama na wîguîre îtûûra rîa Zayuni ntha, kavinda nî gakinyu ga kûrîguîra ntha, kavinda karîa kagîrîru nî gakinyu.

¹⁴ Ndungata ciaku nîciendete îtûûra rîu, wana ethîrwa nî rîomomoku, nîirarîguîra ntha wana ethîrwa nîrîcûkangu viû.

¹⁵ Mavûrûri nîmagetigîra rîîtwa rîa Ngai-Mûnene; athamaki onthe a nthî nîmagetigîra riiri wake.

¹⁶ Nîûndû Ngai-Mûnene nîagaatuma rîngî Zayuni, nîakoonania riiri wake.

¹⁷ Nîakeegua mavoya ma athîni, na ndakaarega mavoya mao.

¹⁸ Ûndû ûyû nîwandîkwe nîûndû wa njiarwa irîa igaaûka, nîguo andû arîa matarî aciare magaakumia Ngai-Mûnene.

¹⁹ Ngai-Mûnene nîwaroririe nthî arî îgûrû kûrîa kûtheru, nîwaroririe nthî arî îgûrû.

²⁰ Nîwegwire gûcaa kwa andû arîa ove, na akîrekereria arîa maatuîrîrîtwe kûûragwa.

²¹ Kwoguo andû nîmakaanîrîra rîîtwa rîa Ngai-Mûnene Zayuni, ngumo yake nîkaanîrîrwa kûu Jerusalemu,

²² rîrîa mavûrûri makaagomana vamwe, na mothamaki magomane nîguo magooce Ngai-Mûnene.

²³ Ngai-Mûnene nîanyivîrîtie vinya nîrî mwîthî, nîanyivanyivîrîtie ûtûûro wakwa.

²⁴ We Ngai wakwa ndûgatûme ngua nîrî mwîthî, we Ngai-Mûnene ûtûûraga tene na tene.

²⁵ Tene mûno nîwaûmbire nthî, na îgûrû nî wîra wa njara ciaku.

²⁶ Îgûrû na nthî nîikaathira, nwatî we nîûtûûra kuo, ikaathira ta nguo ngûrû, na nîikaaûrîra.

²⁷ Nwatî we ndûgarûrûkaga, na ûtûûraga tene na tene.

²⁸ Ciana cia ndungata ciaku igaatûûraga irî ngitîre, nacio njiarwa ciao igaatûûra ciîkindîrîtie varî we.