Thaburi 101 - ÎVUKU RÎA ÛVORO MWARO

Maûndû marîa mûthamaki erîîre Ngai

¹ Nîraina rwîmbo rwa wîvokeku na kîvooto, we Ngai-Mûnene nîwe ngwinîra rwîmbo rûrû.

² Nîngwîmenyerera ndûûre ndarî na ûcuke. Ûgaaûka kûrî nie rî? Nîngûtûûra nyombarî yakwa nîrî na ngoro ntheru,

³ na ndigeetîkîria ûndû mûcûku wîkwe mbere yakwa. Nînthûrîte ciîko cia andû arîa matarî evokeku, ndikaagwatanîra nao.

⁴ Ndigaatuîka mûndû ûtarî mwîvokeku, ndikaagwatanîra na maûndû macûku.

⁵ Nîngaacûkangia mûndû ûrîa ûkaaguta mûndû ûrîa wîngî, ndigeekarania na mûndû mwîtîi na mwaganu.

⁶ Nîngaamenyerera andû arîa evokeku vûrûrirî, nîguo ndûûranie nao, andû arîa evokeku nîo makaandungatîra.

⁷ Andû a maveeni matigaatûûra gwakwa mûciî; gûtirî mûndû mûthaani ûgeekara gwakwa.

⁸ Mûthenya wa mûthenya nîngaacûkangia eki naaî vûrûrirî. Nîngaathiria eki naaî onthe îtûûrarî rîa Ngai-Mûnene.