Ruthu 4 - ÎVUKU RÎA ÛVORO MWARO

Boazu nîwavikirie Ruthu

¹ Boazu nîwathiîre kîvingorî gîa îtûûra na agîkara nthî vo. Nake mûndû ûrîa wa kuuma mbarî ya Elimeleku Boazu aarîtie ûvoro wake nîwavîtûkîrîre vau. Boazu nîwetire mûndû ûcio na akîmwîra atîrî, “Mûrata wakwa, ûka wîkare nthî ava.” Kwoguo mûndû ûcio nîwathiîre varî Boazu na agîkara nthî vo.

² Boazu nîwacokire agîîta athuuri îkûmi a îtûûra na akîmeera wanao mekare nthî vo. Nao nîmeekarire nthî.

³ Boazu nîwerire mûndû ûcio wa nyomba yao atîrî, “Naomi nîaracokire kuuma Moabu na nîarenda kwendia mûgûnda ûrîa warî wa mûndû wa nyomba yetû, ûrîa wîtagwa Elimeleku.

⁴ Kwoguo neciria ngûmenyithie ûvoro ûcio nîguo ethîrwa nîûkwenda ûûgûre mbere ya athuuri aya mekarîte ava. Na ethîrwa ndûkûwenda, ûtwîre nîûndû we nîwe wagîrîrwe nî kûvewa kamweke ga kûûgûra mbere yakwa.” Nake mûndû ûcio nîwaugire atîrî, “Nîngûûgûra.”

⁵ Nake Boazu nîwerire mûndû ûcio atîrî, “Ûkîgûra mûgûnda ûcio kuuma kûrî Naomi, nwanginya ûûgûranîrie vamwe na Ruthu, mûka wa ndigwa ûrîa Mûmoabu nîguo mûgûnda ûcio ûtûûre ûrî wa andû a mûciî wa mûndû ûcio wakwire.”

⁶ Nake mûndû ûcio nîwacokirie atîrî, “Ethîrwa ûguo nîguo gûgwîkara, nie tîngûra mûgûnda ûcio, nîûndû ûguo nî ta kuga ciana ciakwa itingîûgaa. Gûra mûgûnda ûcio arî we. Nî kava ndigane naguo.”

⁷ Vîndî îo ya tene, kûu Isiraeli mûtugo ûrîa warî kuo wîgiî kûgûra kana gûkûûranania indo warî atî, mûndû ûrîa ûrendia kîndû aarutaga kîratû gîake agakînenganîra kûrî mûndû ûrîa ûragûra. Ûguo nîguo andû a Isiraeli moonanagia naguo atî ûvoro nîmwîtîkîrîku.

⁸ Kwoguo rîrîa mûndû ûcio eerire Boazu atîrî, “Gûra mûgûnda ûcio arî we”, nîwarutire kîratû gîake na agîkînenganîra kûrî Boazu.

⁹ Boazu nîwacokire akîîra athuuri acio wa vamwe na andû arîa engî onthe maarî vo atîrî, “Mue mûrî aira atî ûmûnthî nînagûra kuuma kûrî Naomi indo cionthe irîa ciarî cia Elimeleku vamwe na irîa cionthe ciarî cia avîcî ake Kilioni na Mahaloni.

¹⁰ Vamwe na ûguo, Ruthu ûcio Mûmoabu, mûndûmûka ûcio watigirwe nî Mahaloni nîwatuîka mûka wakwa, nîguo ngagaa rîîtwa rîa ûcio wakwire, na rîîtwa rîa andû a mûciî wake rîthiî na mbere gatagatîrî ka andû ao na andû a îtûûra rîa kwao. Mue mûrî aira a maûndû mau mûthenya wa ûmûnthî.”

¹¹ Nao andû acio onthe maarî vau kîvingorî vamwe na athuuri nîmaaugire atîrî, “Tue tûrî aira. Ngai-Mûnene arotûma mûndûmûka ûcio ûgûûka gwaku mûciî atuîke ta Rakeli, wana ta Lea, arîa maaciarîre Jakovu ciana nyîngî. Nawe ûrothatûkwa ûrî mûvîrîgarî wa Efiratha na ûgîe îgweta kûu Bethilehemu.

¹² Nacio ciana irîa Ngai-Mûnene agaakûva na mûndûmûka ûcio irotûma nyomba yaku îtuîke ta nyomba ya Perezu, mûvîcî wa Juda na Tamarû.”

Boazu na njiarwa ciake

¹³ Kwoguo Boazu nîwavikirie Ruthu, nîwacokire akîmenyana nake kîîmwîrî, akîgîa nda na Ngai-Mûnene akîmûrathima na kaana ga kavîcî.

¹⁴ Nao aka acio engî a îtûûra rîu nîmeerire Ruthu atîrî, “Ngai-Mûnene arogoocwa! Nîûndû ûmûnthî nîakûvete kavîcî ga gûkûgaa na gûgûtethagia. Kavîcî kau karogîa îgweta gûkû Isiraeli!

¹⁵ Mûka wa mûvîcîguo nîakwendete na nîagwîkîrîte maûndû mengî gûkîra anake mûgwanja. Na rîu nîagûciarîrîte mûndû wa gûkûgaa ûrîa ûgaatûma ûcokwe nî vinya akûmenyagîrîre ûkûrûrî waku.”

¹⁶ Nake Naomi nîwocire kaana kau na agîtuîka mûreri wako.

¹⁷ Aka arîa maatûûranîrîte nao nîmaatuîrîre kaana kau rîîtwa magîgeta Obedi. Nîmaacokire makîra andû onthe atîrî, “Naomi nîaciarîrîtwe kavîcî!” Obedi nîke warî îthe wa Jesse, nake Jesse nîke warî îthe wa Daudi.

¹⁸ Ino nîcio njiarwa cia Perezu wata ûrîa irûmanîrîrîte kuuma kûrî Perezu nginya Daudi: Perezu aarî îthe wa Hezironi,

¹⁹ nake Hezironi aarî îthe wa Ramu. Ramu aarî îthe wa Aminadabu,

²⁰ nake Aminadabu aarî îthe wa Nahashoni. Nahashoni aarî îthe wa Salimoni

²¹ nake Salimoni aarî îthe wa Boazu. Boazu aarî îthe wa Obedi,

²² nake Obedi aarî îthe wa Jesse, nake Jesii nîke warî îthe wa Daudi.