Ruthu 3 - ÎVUKU RÎA ÛVORO MWARO

Ruthu nîwagîre Mûthuuri

¹ Vuvarî Naomi nîwerire Ruthu atîrî, “Nî waro ngûcarîrie mûthuuri nîguo wîthîrwe ûrî na mûciî waku.

² Mûndû ûcio tî Boazu ûrîa mwene ndungata cia aka irîa mûrarutithanagia wîra nao nî wa mbarî yetû. Ûtukû wa ûmûnthî nîrîo akavûûrîra cairi îtîrirî.

³ Kwoguo îîthambie, wîvake maguta manungi waro na wîkîre nguo ciaku irîa mbaro makîria. Ûcoke ûthiî îtîrirî varîa aravûûrîra cairi na ndûkeyonithie kûrî ke nginya rîrîa akathiria kûrîa na kûnyua.

⁴ Nwatî rîrîa akathiî kûmama, ûgatuîria nîguo ûmenye waro varîa akamama, na rîrîa akanyitwa nî toro ûkathiî ûguûrie mûrengeti na ûmame vau magûrûrî make. Ke agakwîra ûrîa ûgwîka.”

⁵ Ruthu nîwacokirie atîrî, “Maûndû mau monthe wambîra mbîke, nîngûmeka.”

⁶ Kwoguo Ruthu nîwathiîre îtîrirî na agîka wata ûrîa nyaciarawe aamwîrîte.

⁷ Na rîrîa Boazu arîkirie kûrîa na kûnyua, nîwegwire eganîrîte na arî mûkenu. Nîwacokire akîthiî na akîmama vakuvî na kîrûndo gîa cairi. Nake Ruthu nîwathiîre acemete, akîguûria mûrengeti, na akîmama vau magûrûrî ma Boazu.

⁸ Rîrîa gwakinyire vakuvî ûtukû gatagatî, Boazu nîwavindûkire, nîwevûgûrire wa rîmwe na akîmaka mûno nîûndû wa kwona mûndû mûka amamîte magûrûrî make.

⁹ Boazu nîwaûririe mûndûmûka ûcio atîrî, “We nîwe û?” Nake Ruthu nîwamûcokerie atîrî, “Nî nie Ruthu ndungata yaku ya mûndûmûka. Tambûrûkia mûrengeti waku ûnguîkîre nîûndû we nîwe ûngîngaa.”

¹⁰ Nake Boazu nîwerire Ruthu atîrî, “Mûndûmûka ûyû, Ngai-Mûnene arokûrathima nîûndû nîwonanîtie wîvokeku mûnene makîria na njîra ya ûrîa ûreka rîu wana gûkîra ûrîa wekire nyaciaraguo. We nî ûngîathiîre gûcaria mwanake, arî mûthîni kana arî gîtonga, nwatî we ndweka ûguo.

¹¹ Rîu tiga kûmaka. Nîngûgwîkîra maûndû monthe marîa ûkwenda, nîûndû andû onthe a îtûûra rîîrî nîmaicî atî we ûrî mûndûmûka mwaro.

¹² Nîma, nie nîtûkuvanîrîrîtie nawe na nwa ngûgae, nwatî varî na mûndû wîngî ûkuvanîrîrîtie nawe mûno kûngîra.

¹³ Rara gûkû ûmûnthî, nîguo rûyû kîraûko tûkamenya kana mûndû ûcio nîagetîkîra gûkûgaa. Ethîrwa nîagetîkîra, nî waro; nwatî ethîrwa nîakaarega, nînevîta na Ngai-Mûnene ûrîa ûtûûraga mwoyo atî nîngakûgaa. Rîu mama nginya rûyû kîraûko.”

¹⁴ Kwoguo Ruthu nîwamamire vau magûrûrî ma Boazu nginya gûgîkîa, nwatî nîwaramûkire mbere ya kûthamburûkane nîûndû Boazu ndeendaga mûndû wanarî ûmwe amenye atî Ruthu aararîte kûu.

¹⁵ Boazu nîwacokire akîîra Ruthu atîrî, “Ruta cuka îo wîkîrîte na ûmîtambûrûkie ava.” Ruthu nîwekire guo; nake Boazu agîtûrûra vakuvî kilo mîrongo îîrî cia cairi vo na akîmûkuithia cio na Ruthu agîcoka îtûûrarî nacio.

¹⁶ Rîrîa aakinyire mûciî, nyaciarawe nîwamûûririe atîrî, “Mwarîwa, maûndû marekarire atîa.?” Nake Ruthu nîwerire nyaciarawe maûndû monthe marîa Boazu aamwîkîte.

¹⁷ Ruthu nîwamwîrire atîrî, “Boazu ambîrire atî ndiagîrîrwe nî gûcoka kûrî we njara ntheri, na kwoguo nîamveere cairi ino.”

¹⁸ Naomi nîwerire Ruthu atîrî, “Rîu kirîrîria wa ûguo nginya rîrîa ûkamenya ûrîa ûvoro ûyû ûkarîkîrîria, nîûndû Boazu ndangînogoka ûmûnthî nginya rîrîa akaarûtha ûvoro ûcio.”