Ruthu 2 - ÎVUKU RÎA ÛVORO MWARO

Ruthu nîwarutire wîra mûgûndarî wa Boazu

¹ Naomi aarî na mûndû wao wa nyomba ya mûthuuriwe Elimeleku wetagwa Boazu. Boazu aarî gîtonga na aarî îgweta.

² Ruthu ûcio warî Mûmoabu nîwerire Naomi atîrî, “Tiga nthiî mûgûndarî ngocanie cairi îrîa akethi maratigaria. Nîrî na ma atî nîngwona mûndû ûngîmbîtîkîria kûruta wîra gwake.” Nake Naomi nîwamûcokerie atîrî, “Îî thiî wîke guo mwarîwa.”

³ Kwoguo Ruthu nîwathiîre mûgûndarî na akiuma akethi vuva akîûnganagia cairi îrîa yatigagwa. Ruthu atanarî kûmenya, nîwathiîre mûgûndarî wa Boazu ûrîa warî wa mbarî ya Elimeleku.

⁴ Vuvarî Boazu nîwakinyire aumîte Bethilehemu. Nîwakethirie aruti wîra acio atîrî, “Ngai-Mûnene aroîkara namue!” Nao nîmaamûcokerie atîrî, “Ngai-Mûnene arokûrathima!”

⁵ Boazu nîwacokire akîûria ndungata yake îrîa yaigîtwe ya kûrûngamîrîra akethi atîrî, “Mwarî ûyû aumîte kû?”

⁶ Nake mûndû ûcio nîwerire Boazu atîrî, “Nî mwîrîtu ûrîa Mûmoabu ûrîa maaûkire na Naomi.

⁷ Anthaithire nîmwîtîkîrie aume aruti wîra vuva akîûnganagia cairi. Atinda akîruta wîra kuuma kîraûko tene, na rîu amba kûrûngama kîgunyîrî nîguo anogoke vanini.”

⁸ Boazu nîwacokire akîra Ruthu atîrî, “Tathikîrîria mwarîwa. Ndûkathiî kûngania cairi kûndû kwîngî tiga mûgûndarî ûyû. Îkara wa gûkû mûrî na aka aya mûndutagîra wîra.

⁹ Roragia wone kûrîa maraketha na ûmaumage vuva. Nînathana neera andû akwa matigakûthînie. Na ûngînyonda, ûthiî mûtûngirî ûkunde manjî marîa andû akwa matavîte.”

¹⁰ Ruthu nîwaturumithirie ûthiû wake nthî na akîûria Boazu atîrî, “Nîndûî gîatûma ûrûmbûyanie nanie na wambîka maûndû maro na nîrî mûûrûrîrî?”

¹¹ Boazu nîwamûcokerie atîrî, “Nîmenyithîtue maûndû monthe marîa wîkîte nyaciaraguo kuuma rîrîa mûthuuriguo aakwire. Wana nîmbicî ûrîa watigire aciari aku, vûrûri wenyu na ûgîûka gûtûûrania na andû ûtaaicî mbere.

¹² Ngai-Mûnene arokûva kîveo nîûndû wa maûndû mau wîkîte. Ngai-Mûnene, Ngai wa Isiraeli ûrîa ûkîte kûrî ke nîguo akûgitîre arokûva kîveo kîrîa Kîamgîrîrîte!”

¹³ Ruthu nîwacokirie atîrî, “Mwathi wakwa, we nîûmbîkîte maûndû maro mûno. Nîwatûma ngoro yakwa îvorere na wanyûmîrîria nîûndû wa kûmbarîria na ntha wana ethîrwa ndiîganeene wanarî na ûmwe wa ndungata ciaku.”

¹⁴ Rîrîa vîndî ya kûrîa irio yakinyire, Boazu nîwerire Ruthu atîrî, “Ûka ava tûrîcanîre irio nawe, na ûvokithie mûgate waku thuvurî.” Kwoguo Ruthu nîwekarire vamwe na aruti wîra, nake Boazu nîwamûnengererie mûgate. Ruthu nîwarîre nginya akîvaa na agîtigaria.

¹⁵ Rîrîa Ruthu aathiîre gûcaria cairi rîngî, Boazu nîwathire arute wîra ake akîmeera atîrî, “Tigani acarie wana kûu ikûmbwarî na mûtikamûgirie.

¹⁶ Rutani cairi imwe ikûmbwarî mûmîrekie nthî nîûndû wake na mûreke amîrorie na mûtikamûgûkie.”

¹⁷ Kwoguo Ruthu nîwathiîre na mbere kûngania cairi nginya kîvwaî. Na rîrîa aavûûrire cairi îrîa aaûnganîtie, yarî vakuvî kilo îkûmi.

¹⁸ Nîwamîocire akîînûka nayo kûu îtûûrarî na akîonia nyaciarawe cairi îrîa yonthe aaûnganîtie. Ruthu nîwacokire akînengera nyaciarawe irio irîa aatigarîtie avaa.

¹⁹ Nyaciarawe nîwamûûririe atîrî, “Waûngania cairi îno yonthe kû? Watinda ûkîruta wîra mûgûndarî wa û? Ngai-Mûnene arorathima mûndû ûcio wendire gûgwîka waro!” Nake Ruthu nîwamenyithirie Naomi atî aatindîte akîruta wîra mûgûndarî wa mûndû wetagwa Boazu.

²⁰ Naomi nîwamwîrire atîrî, “Ngai-Mûnene arorathima Boazu! Ngai-Mûnene atugaga waro andû arîa marî mwoyo wana arîa akuû.” Naomi nîwacokire akîîra Ruthu atîrî, “Mûndû ûcio nî wa mbarî yetû, na nî ûmwe wa arîa mangîtûgaa.”

²¹ Ruthu nîwacokire akiuga atîrî, “Ûndû ûrîa wa vata mûno nî atî ambîrire mbîkaranie na aruti wîra ake nginya rîrîa makaathiria gûketha cairi.”

²² Naomi nîwerire Ruthu atîrî, “Mwarîwa, nî waro mwîkaranagie na aka acio marutaga wîra mûgûndarî wa Boazu, nîûndû wavota kûthînua ûngîthiî mûgûndarî wîngî.”

²³ Kwoguo Ruthu nîwekaranirie na aka acio maarî ndungata cia Boazu wa akîûnganagia cairi nginya rîrîa maketha ma cairi na ngano maathirire. Nake Ruthu nîwathiîre na mbere gûtûûrania na nyaciarawe.