Ruthu 1 - ÎVUKU RÎA ÛVORO MWARO

Elimeleku na andû a mûciî wake nîmaathiîre vûrûrirî wa Moabu

¹ Vîndî îrîa atirîrîri vûrûri maathanaga vûrûri wa Isiraeli, nîkwagîre na yûra vûrûrirî ûcio. Nake mûndû wa kuuma Bethilehemu vûrûrirî wa Juda nîwathiîre vûrûrirî wa Moabu gûtûûra kuo gwa kavinda kanini. Aathiîre na mûka vamwe na avîcî ao aîrî.

² Mûndû ûcio etagwa Elimeleku na mûka etagwa Naomi. Nao avîcî ake aîrî metagwa Mahaloni na Kilioni na maarî a mûvîrîga wa Efiratha kuuma îtûûra rîa Bethilehemu vûrûrirî wa Juda. Nîmaathiîre vûrûrirî wa Moabu na magîtûûra kûu.

³ Elimeleku nîwakwire, na Naomi agîtigwa arî wenga na anake acio ake aîrî.

⁴ Nao anake acio nîmaavikirie aka a Moabu; ûmwe eetagwa Oripa nake ûcio wîngî eetagwa Ruthu. Vuva wa gûtûûra kûu îvinda ta rîa mîaka îkûmi,

⁵ Mahaloni na Kilioni wanao nîmaakuire, nake Naomi nîwatigirwe arî wenga atarî na mûthuuri wana kana anake ake.

Naomi nîwacokire Bethilehemu na Ruthu

⁶ Vuvarî, Naomi nîwegwire atî Ngai-Mûnene nîwarathimîte andû ake na njîra ya kûmava maketha maro. Kwoguo Naomi nîwevarîrie nîguo aume vûrûrirî ûcio wa Moabu na acoke kwao marî na aa nyaciarawe acio maatigîtwe nî avîcî ake rîrîa maakuire.

⁷ Kwoguo Naomi nîwambîrîre rûgendo acokete vûrûrirî wa Juda marî wa vamwe na aka acio a avîcî ake. Nwatî marî njîrarî,

⁸ Naomi nîwamerire atîrî, “Cokani kwenyu mîciî wa mûndû agekare na ng'ina. Ngai-Mûnene aromwîka maûndû maro wata ûrîa mûmbîkîte waro na mûgeka acio marîkîtie gûkua.

⁹ Ngai-Mûnene aromûva athuuri engî na amûvotithie wa mûndû kûgîa na mûciî wake.” Kwoguo Naomi nîwamamumunyire na akîmaugîra ûvoro. Nao nîmaambîrîrie kûrîra

¹⁰ na makîmwîra atîrî, “Naarî! Tue nîtûthiî nawe kûrî andû enyu.”

¹¹ Nake Naomi nîwamerire atîrî, “Aarî akwa, cokani. Mûrenda tûthiî namue nîkî? Mûreciria nwa mvote kûgîa na ciana ciîngî cia anake ingîmûvikia?

¹² Cokani kwenyu mîciî, nîûndû nie nîrî mûkûrû mûno wa kûvika rîngî. Wana nîngîîra atî nîrî na kîîrîgîrîro na mvike ûtukû ta wa ûmûnthî na ngîe anake,

¹³ mwavota gweterera nginya rîrîa magaakûra? Mwarega kûvikîra andû engî nîûndû wao? Naarî, aarî akwa. Ngai-Mûnene nîatûmîte mbîgua kîeva mûno nîûndû wa maûndû marîa meekîkire kûrî mue.”

¹⁴ Nao nîmambîrîîrie kûrîra rîngî. Oripa nîwacokire akîmumunya nyaciarawe, akîmuugîra ûvoro na agîcoka kwao mûciî, nwatî Ruthu nîmaathiîre na nyaciarawe.

¹⁵ Naomi nîwerire Ruthu atîrî, “Ta roria, mwîruguo nîwacoka kûrî andû ao na kûrî ngai ciake. Wa nawe rûmîrîra mwîruguo.”

¹⁶ Nwatî Ruthu nîwerire Naomi atîrî, “Tiga kûningîrîria ngûtige, atî nîguo tûtikathiî nawe, nîûndû kûrîa ûkaathiî nîkuo ngaathiî; na kûrîa ûgaatûûra nîkuo ngaatûûra. Andû enyu nîo magaatuîka andû akwa, nake Ngai waku nîke ûgaatuîka Ngai wakwa.

¹⁷ Kûrîa ûgaakuîra nîkuo ngaakuîra na nwakuo ngaathikwa. Ngai-Mûnene aromverithie kûngîkaagîa ûndû ûngîtûma tûtigane nawe tiga gîkuû.”

¹⁸ Rîrîa Naomi oonire atî Ruthu nîwatuîte atî nîmakûthiî nake, nîwatigire kûmwîra acoke Moabu rîngî.

¹⁹ Kwoguo nîmaathiîre oîrî nginya magîkinya Bethilehemu. Rîrîa maakinyire kuo, andû onthe a îtûûra rîu nîmaamakire mûno, nao aka makîambîrîria kûrania atîrî, “Na kinthî ûyû nî Naomi?”

²⁰ Nake Naomi nîwamacokerie atîrî, “Mûtigacoke kûmbîta Naomi rîngî, mbîtagani Mara nîûndû Ngai-Mûnene, Ngai mwene vinya wonthe nîatûmîte ûtûûro wakwa ûtuîke mûrûrû.

²¹ Naaumire gûkû mbîcûrîtwe nî maûndû maro, nwatî Ngai-Mûnene anjokia ndarî wanarî kîndû. Mûrambîta Naomi nîkî rîrîa Ngai-Mûnene Mwene vinya wonthe ambîkîte maûndû macûku na akandetera mathîna?”

²² Ûguo nîguo Naomi aacokire kuuma vûrûrirî wa Moabu marî na nyaciarawe Ruthu. Maakinyire kûu Bethilehemu vîndî îrîa cairi yambagîrîria gûkethwa.