Nthi 9 - ÎVUKU RÎA ÛVORO MWARO

Ûûgî na ûrimû

¹ Ûûgî nîatumîte nyomba yake, ke nîetûmîrîte itugî mûgwanja.

² Ke nîathînjîte nyama cia kîrugo, nîatukanîtie mînyamû mînungi waro na ndivei, na nîavarîrîtie metha.

³ Ûûgî nîatûmîte ndungata ciake cia aka igetane irî kûndû gûtûgîru gîcagirî ikiugaga atîrî,

⁴ “Andû onthe arîa matarî na ûûgî nî maûke ava!” Nao arîa aritu, ûûgî arameera atîrî,

⁵ “Ûkani mûrîe irio irîa nîmûvarîrîrîtie, na mûnyue ndivei mbaro îrîa mvarîrîrîtie.

⁶ Tiganani na andû arîa matarî na ûûgî, na nî mûgûtûûra mwoyo. Tiga ûmenyo ûkwonie mîthiîre mîaro.”

⁷ Mûndû ûrîa ûrutaga mûndû mwîtîi mavîtia nîkwa arumagwa, nake ûrîa ûrûngaga mûndû mwaganu, nîkwa aguraragua.

⁸ Kwoguo ndûkarute mûndû mwîtîi mavîtia, nîûndû nîagaakûmena. Nwatî ruta mûndû mûûgî mavîtia, nake nîagaakwenda.

⁹ Thomithia mûndû mûûgî, na nîakaaûvîga makîria. Thomithia mûndû mûthingu na nîakoongerera ûmenyo.

¹⁰ Gwîtigîra Ngai-Mûnene nîkîo Kîammbîrîria Kîam ûûgî, na kûmenya ûrîa Mûtheru Mûno nîkuo kûgîa na ûtaûku.

¹¹ Ûûgî nîagaatûma ûtûûre mwoyo îvinda îraca, na nîagaatûma ûtûûre mwoyo mîaka mîîngî.

¹² Ethîrwa ûrî mûûgî, we nîwe ûkaagunîka, na warega ûûgî, nwawe wenga ûkoona thîna.

¹³ Mûndûmûka ûrîa mûritu arî înegene rîîngî, ndarî ûmenyo na ndaconokaga.

¹⁴ Ke ekaraga nthî mûromorî wa nyomba yake, kana agekarîra gîtî vandû varîa vatûgîru thokorî.

¹⁵ Etaga andû arîa maravîtûkîrîra njîrarî, arîa marathiî maûndûrî mao.

¹⁶ Eraga andû matarî na ûûgî atîrî, “Ûkani ava.” Nao arîa aritu, akameera atîrî,

¹⁷ “Manjî ma kwîa marî mûrîo, na mûgate ûrîa ûrîcagîrwa nthithorî ûrî cama makîria.”

¹⁸ Nwatî andû arîa mathiîcaga gwake nyomba matimenyaga atî mathiîcaga kwa arîa akuû, arîa onthe matonyete gwake nyomba marî kwa arîa akuû.