Nthi 7 - ÎVUKU RÎA ÛVORO MWARO

¹ Mwana wakwa, nyitia kîrîra gîakwa, na wige maathani makwa ngororî yaku.

² Rûmagîrîra maathani makwa nîguo ûtûûre mwoyo, mamenyagîrîre ta ûrîa ûmenyagîrîra ndongu ya ritho.

³ Manyite na ndûkamarekie, maige ngororî yaku.

⁴ Onaga ûûgî ta mwarwanyûkwe, na wonage ûmenyo ta mûrata waku wa vakuvî mûno.

⁵ Ûûgî na ûmenyo igaakûgitagîra kuuma kûrî mûndûmûka kîmaramari, na kuuma kûrî mûndûmûka ûrîa ûgucagîrîria andû na ciugo nyoroku.

Mûndûmûka ûrîa kîmaramari

⁶ Naaroririe nja nîrî ndiricarî ya nyomba yakwa, ngîrorereria mwanyarî wa ndirica yakwa.

⁷ Nînoonire anake eengî aritu, gatagatîrî kao, nînoonire mwanake ûmwe warî kîrimû.

⁸ Ke aavîtûkîrîrîte njîrarî yarî vakuvî na nyomba ya mûndûmûka ûmwe, na akîathûkîria gacîrarî karîa kathiîte gwake nyomba.

⁹ Kwarî kîvwaî kûrî na marundurundu, ûtukû kûrî na nduma.

¹⁰ Taroria, mûndûmûka nîwamûtûngire, ekîrîte nguo ta mûmaraa, na arî na wara.

¹¹ Aarî mûndûmûka wa înegene na ndûrîka, ndaakindagîria gwake mûciî.

¹² Vîndî îmwe ethagîrwa arî njîrarî, na rîngî thokorî, ekaraga akavîte ithiororî cionthe cia njîra.

¹³ Mûndûmûka ûcio aakumbatîrie mwanake ûcio, akîmûmumunya, na akîmûroria aûmîrîrîtie na akîmwîra atîrî,

¹⁴ “Nî ndutire îtega ûmûnthî, na nîmvingirie mîvîtwa yakwa.

¹⁵ Kwoguo nîraumîrîte nthiîte gûgûcaria, nîrarî na vata mûno nawe, na nînakwona.

¹⁶ Nîmbarîte ûrîrî wakwa na cuka, cuka mbaro na ng'emie kuuma Misiri.

¹⁷ Nî minjaminjîrîtie ûrîrî wakwa na mînyamû mînungi waro ya mûtî wa mare, mînyamû mînungi waro na cinamoni.

¹⁸ Ûka tûthiî gwakwa tûkamame, na tûkenerere wendo wetû nginya rûyû.

¹⁹ Nîûndû mûthuuri wakwa ndarî mûciî, nîathiîte rûgendo kûndû kûraca.

²⁰ Nîwakuire mbeca nyîngî, na agaacoka vuva wa ciumia igîrî.”

²¹ Mûndûmûka ûcio nîwathaîrîrie mwanake ûcio na ciugo, nîwamûringîrîrie na ciugo ciake nyoroku.

²² Wa rîmwe mwanake ûcio nîwarûmîrîre mûndûmûka ûcio, ta ndegwa îthiîte kûthînjwa, kana ta ngûrûngû înyitîtwe nî mûtego,

²³ nginya îkarathîrwa vo na mûguî ûgatûrîkania nginya mararî; wata ûrîa gîconi kîvinyûraga mûtegorî wa rîmwe; mwanake ûcio ndaamenyaga atî nwa ate mwoyo wake.

²⁴ Rîu mue ciana ciakwa, nthikîrîriani, thikîrîriani ûrîa ngûmwîra.

²⁵ Mûtikanetîkîre kûvîtithua nî mûndûmûka ta ûcio, na mûtikarûmîrîre njîra ciake.

²⁶ Nîûndû nîagwîthîtie arûme eengî mûno, na agatûma andû eengî mûno makue.

²⁷ Nyomba yake nî njîra ya kûthiî kwa arîa akuû, nî njîra ya kûthiî mbîrîrarî.