Nthi 6 - ÎVUKU RÎA ÛVORO MWARO

Maûndû mengî marîa makaananîtue

¹ Mwana wakwa, ûngîrûngamîrîra mûndû ûrîa mûtûûranîrîte nake agîkova kîndû, ûngîthîrwa wîranîrîte atî nîûkûrûngamîrîra mûndû ûcio agîkova kîndû;

² ethîrwa wîyovete na mîario yaku, ûkenyitithia na ciugo ciaku;

³ mwana wakwa, nîguo wîvonokie, wagîrîrwe nî gwîka atîrî: nîûndû ûrî rungu rwa watho wa mûndû ûcio ûkovete kîndû, îîvîke ûthiî kûrî ke, na ûmûthaithe akûrekererie.

⁴ Ndûkamame kana ûgocerera.

⁵ Îîvonokie ta nthiia îkiuma kûrî mûguîmi, kana ta gîconi gîkiuma kûrî mûtegi.

Îîthomithie kuumana na nthigiriri

⁶ Mue igûta, thomani kuumana na nthigiriri roriani ûrîa irutaga wîra, na nî mûkûûvîga,

⁷ nthigiriri itirî mûtongoria, mûnene, kana mûrûngamîrîri,

⁸ nthigiriri ciîigagîra irio ciacio vîndî ya riûa, na ciûnganagia irio ciacio vîndî ya maketha.

⁹ We kîgûûta gîkî, nîûtûûra ûmamîte vau nginya rî? Ûkaaramûka rî?

¹⁰ We ugaga, “Kanjoke toro vanini, ka mamamame vanini, ka nyambe nogoke vanini.”

¹¹ Ûthîni ûgaaûka kûrî we ta mûcunani, ûkaatharîkîrwa nî ûthîni ta mwîi arî na indo cia mbaara.

¹² Mûndû wa mana, mûndû mwaganu, aûrûraga akîaragia mîario ya kûvîtithia andû.

¹³ Aunaga metho make, akururagia magûrû nthî, akîorotaga na ciara.

¹⁴ Nîûndû ke arî ngoro ya kûvîtithia andû, avangaga maûndû marîa macûku, ambagîrîria thîna kûndû kuonthe.

¹⁵ Kwoguo mînyamaaro îkaamwîthîrîria wa rîmwe, agaacûkangua wa rîmwe athire.

¹⁶ Kûrî na maûndû matandatû marîa Ngai-Mûnene amenete, Ii nî mûgwanja marîa marî mûgiro kûrî ke:

¹⁷ varî mwîtîîo, rûrîmî rwaragia maveeni, njara irîa ciûragaga andû matarî na mavîtia,

¹⁸ ngoro îrîa îvangaga maûndû ma waganu, magûrû marîa mavinyûraga gwîka maûndû macûku,

¹⁹ mûruti ûira ûrîa waragia maveeni, na mûndû unjugaga andû a mûciî magîe na thîna.

Gûkaanua ûtharia

²⁰ Mwana wakwa, athîkagîra maathani ma aguo, na ndûgatiganîrie kîrîra Kîam nyûkwe.

²¹ Vîndî cionthe maigage ngororî yaku, moverere ngingorî yaku.

²² Magaagûtongoragia rîrîa ûrî rûgendorî, magaakûgitagîra rîrîa ûmamîte, na magaagûtaaraga rîrîa waramûka.

²³ Nîûndû maathani mekariî ta taa, na kîrîra gîkariî ta ûtheri, gûkaanua na mîtugo mîaro nîcio itûmaga mûndû agîe na ûtûûro mwaro.

²⁴ Kîrîra kîu gîgaakûgitagîra kuuma kûrî aka arîa acûku, na kuuma kûrî mîario mînyoroku ya mûndûmûka wene.

²⁵ Ndûkerirîrie ûthaka wake, na akûveneria na metho make ndûkamûrûmîrîre.

²⁶ Mûmaraa nwa arîvwe na thogora wa thaani ya irio, nwatî kûtharia na mûndûmûka wene, gûtûmaga mûndû aûrwe nî indo ciake cionthe.

²⁷ Mûndû nwa akuue mwaki aigîrîrîte kîthûrirî gîake na nguo ciake irege kûvîa?

²⁸ Mûndû nwa athiîrîre îgûrû rîa makara marî na mwaki na ndavîe magûrû?

²⁹ Ûguo nîguo gwîkaraga kûrî mûndû ûrîa ûtharagia na mûka wene; mûndû wa wonthe wîkaga ûguo nîakaaverithua.

³⁰ Andû matinyararaga mwîi angîthîrwa aîîte irio nîûndû ararî mûvûtu.

³¹ Nwatî angînyitwa, nwanginya arîve indo icio aîîte maita mûgwanja, ke akaanenganîra indo cionthe irîa arî nacio.

³² Mûndû ûrîa ûtharagia ethagîrwa arî mûritu, mûndû ûrîa wîkaga ûguo ecûkangagia ke mwene.

³³ Mûndû ta ûcio nîakaagurarua na anyararwe nî andû, ke agaatûûra arî na gîconoko.

³⁴ Wîru nîûtûmaga mûndûmûrûme anyitwe nî marûrû, na ndarî ntha rîrîa akwîrîvîrîria.

³⁵ Ke ndangîtîkîra îrîvi wana rîrîkû, kana akenua nî kûvewa iveo nyîngî.