Nthi 5 - ÎVUKU RÎA ÛVORO MWARO

Gûkaanua maûndû ma ûtharia

¹ Mwana wakwa, thikagîrîria kîrîra gîakwa, tega gûtû gwaku wîgue mataaro makwa;

² nîguo ûvotage gûtaûkîrwa nî maûndû, na mîario yaku îkonanagia ûrî na ûmenyo.

³ Nîûndû mîromo ya mûndûmûka mûmaramaru îrî mûrîo ta ûûkî, ciugo ciake nî nyoroku gûkîra maguta.

⁴ Nwatî mûthiiarî atigaga mathîna na ûrûrû ta wa nyongo, ta wa rûviû rûrû rûûgî mîena yoîrî.

⁵ Magûrû make mamûviraga gîkuûrî, arûmagîrîra njîra îrîa îthiîcaga kwa arîa akuû.

⁶ Ndarûmagîrîra njîra ya mwoyo, aûrûraga na ndamenyaga akîûra.

⁷ Na rîu we mwana wakwa, nthikîrîria, na ndûkariganîrwe nî ciugo ciakwa.

⁸ Îkaraga varaca na mûndûmûka ta ûcio! Ndûkathiî vakuvî na mûromo wa nyomba yake!

⁹ Weka ûguo, ûkathiria gîtîîo kîrîa andû makûveete, na ûtûûro waku ûthûkue nî arîa matarî ntha.

¹⁰ Nao ageni nîmagooca ûtonga waku wonthe, na indo irîa ûthithinîrîte ikaathiî na mûgeni.

¹¹ Rîrîa ûkethîrwa ûrî vakuvî gûkua nîûgacaa, rîrîa mwîrî waku ûkaavûrûrûka na ûthire vinya;

¹² na uge atîrî, “Ûûi, na ûrîa nathûrîte gûkaanua, ndiendaga kûrûngwa!

¹³ Ndiathikagîrîria arîa maanthomithagia, kana nthikîrîria kîrîra Kîam arîa maandaaraga.

¹⁴ Rîu nîrî vakuvî gûcûkanga viû nîrî mbere ya andû onthe.”

¹⁵ Mûkaguo nîta kîthima Kîam manjî matheru; nyunyaga manjî ma kîthima gîaku kîonga.

¹⁶ Kûrî na vata ûrîkû kûnyagia mbeû yaku kûndû kuonthe, na kûthiragîria vinya waku na kûu njîrarî?

¹⁷ Kîthima kîu nî gîaku wî wenga, na ndûgetîkîrie mûndû wîngî akunde manjî ma kîo.

¹⁸ Tiga îtherûkîro rîa rûnjî rwaku rîrathimwe, na ûkenague nî mûkaguo ta ûrîa aagûkenagia arî mwîthî.

¹⁹ Nî mûthaka na mwaro ta nthiia, wendo wake ûrogûkenagia, na ûkûrîcage ta njovi vîndî cionthe.

²⁰ Mwana wakwa, nîndûî gîgûtûma merirîria ma mûndûmûka mûmaramaru makûrîa ta njovi? Nîndûî gîgûtûma ûgucîrîrua nî wendo wa mûndûmûka wene?

²¹ Ngai-Mûnene ethagîrwa aroretie mîthiîre ya mûndû, na nîonaga njîra ciake cionthe.

²² Mevia ma mûndû ûrîa mwaganu mamûnyitaga ta mûtego, na anyitagwa nîguo wa akîvagia.

²³ Akucaga nîûndû ndarî mîtugo mîaro, ûrimû wake mwîngî nîguo ûtûmaga aûre.