Nthi 30 - ÎVUKU RÎA ÛVORO MWARO

Ciugo cia Aguri

¹ Ino nîcio ciugo cia Aguri, mûvîcî wa Jake wa kuuma Masa. Nî ciugo irîa ataarire Ithieli na Ukali nacio.

² Na ma nie nîrî mûritu mûno, na ndiîkariî ta mûndû, na ndiîciragia ta mûndû.

³ Nie ndianathoma ngîa na ûûgî, na ndiîcî ûrîa Ngai ekariî.

⁴ Nîûrîkû wanaunûkia îgûrû na agîcoka kûnyûrûrûka gûkû nthî? Nîûrîkû wanakumbatîria rûkûngi na ngundi yake? Nîûrîkû wanovania manjî na nguo? Nîûrîkû wathondekire mîthiia yonthe ya nthî? Etagwa atîa, na mûvîcî etagwa atîa? Mbîra na ma ethîrwa nîwicî!

⁵ Maûndû monthe marîa Ngai aragia nî ma ma; ke nî ngo kûrî andû arîa mathiîcaga kûrî ke nîguo amagitîre.

⁶ Ndûkongerere ûndû kûrî ûndû ûrîa augîte, nîguo ndagagûkaanie na wonekane ûrarîtie maveeni.

⁷ Ngai-Mûnene nîngûkûvoya maûndû maîrî na ndûkarege, tiga ngîe namo mbere ya ngua.

⁸ Nthengutîria mîario ya maveeni na kûrega kwîvokeka ndûgatûme nduîke mûthîni mûno kana mûtongu mûno, mvecaga irio cia kwîgana,

⁹ nîguo ndikavae ngûkaane, na mbûrie atîrî, “Ngai-Mûnene nîke û?” Kana nthîne na nthiî ngaîe njonorithie rîîtwa rîaku.

¹⁰ Ndûkarie maûndû macûku megiî ndungata kûrî mwathi wayo, nîguo ndungata ndîgakûrume na wîthîrwe ûrî na mavîtia.

¹¹ Kûrî andû marumaga methe na maticokagia ngatho kûrî aa ng'ina.

¹² Kûrî andû meyonaga marî atheru nwatî methagîrwa matarî atheru.

¹³ Kûrî andû meyonaga marî aro mûno, na kaî nîmeyonaga marî aro î!

¹⁴ Kûrî andû marî na magego mekariî ta mviû, magego mau mao mekariî ta tûviû; mendaga gûcûkangia andû arîa athîni mathire gûkû nthî, andû arîa matarî vinya mathire gatagatîrî ka andû.

¹⁵ Nthambara îrî na twana twîrî twa nga, na wa tuoîrî twîtagwa “Nengera.” Kûrî indo ithatû itavaaga na indo inya itaugaga, “Nîtwegania:”

¹⁶ kwa arîa akuû, mûndûmûka nthata, nthî nyûmû îvatarîte mbura, na mwaki ûrîa ûtavoraga.

¹⁷ Mûndû ûrîa ûnyararaga îthe, na akarega kwathîkîra ng'ina, akaarîwa nî ikûngûrû na ndiiû.

¹⁸ Kûrî maûndû mathatû mangegagia, na kûrî maûndû mana ndataûkagîrwa nî mo:

¹⁹ ûrîa nderi îthiîcagîrîra rîerarî, ûrîa njoka îthiîcagîrîra rûciararî rwa mathiga, ûrîa meri îthiîcagîrîra îriarî, na ûrîa mwanake mendanaga na mwîrîtu.

²⁰ Ûyû nîguo mûthiîre wa mûndûmûka mûtharia: atharagia, na akethambia, na akauga atîrî, “Gûtirî ûndû mûcûku mbîkîte!”

²¹ Kûrî maûndû mathatû matûmaga nthî inaine; kûrî maûndû mana marîa nthî îtangîûmîrîria:

²² rîrîa ngombo îtuîkîte mûthamaki, na rîrîa kîrimû kîrîte irio gîkavaa.

²³ Rîrîa mûndûmûka mûmene agîa na mûthuuri, na ndungata ya mûndûmûka îtuîkîte mûka wa mwathi wa yo.

²⁴ Kûrî ciûmbe inya nini mûno gûkû nthî, nwatî nî mbûgî mûno;

²⁵ mûthûa nî tûnyamû tûtarî vinya, nwatî nî twîigagîra irio vîndî ya riûa.

²⁶ Mathiiî matirî vinya ta andû, nwatî nîmetumagîra gwa gûtûûra mîanyarî ya mathiga.

²⁷ Ngige itirî mûtongoria, nwatî cionthe ithiîcaga vamwe irî ikundi ikundi.

²⁸ Mîrikathi nî ciûmbe ûngînyita na njara, nwatî nwa ûcione mîciî kwa athamaki.

²⁹ Kûrî ciûmbe ithatû irî mîthiîre ya kwenda kwonwa, kûrî ciûmbe inya irî mîthiîre mîaro.

³⁰ Mûnyambû, ûrîa ûrî vinya gûkîra nyamû cionthe na ndwîtigagîra nyamû îngî wa yonthe;

³¹ njamba ya ngûkû îrîa îthiîcaga na mwîtîîo, nthenge, na mûthamaki akinyûkîtie arî mbere ya andû ake.

³² Ethîrwa ûrarî kîrimû na nîûretîîaga, na nîûravangaga maûndû macûku, kira na wambe wîcirie.

³³ Ûngîthukathuka îriia riumaga maguta, ûngîringa mûndû îniûrû, riuraga nthakame, ûngîtûma andû marakare, nî kûgîcaga ngucanio.