Nthi 3 - ÎVUKU RÎA ÛVORO MWARO

Mataaro kûrî andû ethî

¹ Mwana wakwa, ndûkariganîrwe nî kîrîra gîakwa, igaga maathani makwa ngororî yaku.

² Nîûndû nîmagaatûma mîthenya yaku yongerereke, na ûtûûre mîaka mîîngî ûrî mûthatûke.

³ Ndûkareke wathîki na wîvokeku ciume kûrî we; ciovagîrîre ngingorî ta mûkathî, na ûciandîke ngororî yaku.

⁴ Weka ûguo, ûkaavewa gîtîîo na wendwe nî Ngai na andû.

⁵ Îîvoke Ngai-Mûnene na ngoro yaku yonthe, na ndûkevoke meciria maku we mwene.

⁶ Ririkanaga Ngai-Mûnene maûndûrî maku monthe, nake nîakaarûngaria njîra ciaku.

⁷ Ndûkeyone we mwene ûrî mûûgî; îîtigîre Ngai-Mûnene, na ûtigane na maûndû macûku.

⁸ Gwîka ûguo, gûkethîrwa îrî ta ndawa ya mwîrî waku, na vinya wa mavîndî maku.

⁹ Tîîaga Ngai-Mûnene na indo ciaku, na ûmûrutagîre maketha ma mbere ma indo cionthe cia mîgûnda yaku.

¹⁰ Weka ûguo, makûmbî maku nîmagecûra maketha, na mîtûngi yaku îcûre na yune ndivei ya kûvivwa warîo.

¹¹ Mwana wakwa, ndûkanyarare îvera rîa Ngai-Mûnene kana ûnoge rîrîa agûkûrûnga,

¹² nîûndû Ngai-Mûnene arûngaga mûndû ûrîa endete, wata ûrîa îthe wa mûndû arûngaga mwana ûrîa endete.

¹³ Gûkena nî mûndû ûrîa ûgîcaga na ûûgî, mûndû ûrîa ûgîcaga na ûtaûku,

¹⁴ nîûndû ûûgî ûrî maciaro meengî gûkîra sîlûva, na ûrî umithio mwîngî gûkîra thaavu.

¹⁵ Ûûgî ûrî goro gûkîra mathaga, na gûtirî kîndû ûngîîrirîria kîngîringithanua naguo.

¹⁶ Ûûgî ûvecaga mûndû ûtûûro mûraca, na nîûvecaga mûndû ûtonga na gîtîîo.

¹⁷ Njîra cia ûûgî nîikenagia mûndû, na cierekagîra kûrîa kûrî thayû.

¹⁸ Ûûgî nîta mûtî wa mwoyo kûrî arîa magîcaga naguo, arîa megwatîrîte guo na kinyi marî gîkeno.

¹⁹ Ngai-Mûnene aaûmbire nthî na njîra ya ûûgî; na akîûmba îgûrû na ûmenyo wake.

²⁰ Ûmenyo wake nîwatûmire nyûnjî ciume nthî, na matu maurithie mbura.

²¹ Mwana wakwa, îkaraga na ûûgî wa ma na kîrîra. Ndûkanareke ikûthame.

²² Nacio nîigaakûva mwoyo, na ikûgemie ta mathaga marî ngingorî yaku.

²³ Ûgaacoka ûthiîcage ûtagwîtigîra na ûkaathiîcaga ûtakûvîngwa.

²⁴ Rîrîa wîkarîte nthî, ndûgetigagîra; na wathiî kûmama, ûkaamamaga toro mbaro.

²⁵ Ndûgetigîre ûndû wa kûmakania ûrîa ûngîûka wa rîmwe, kana ivuvûkanio irîa ingîtharîkîra andû arîa aganu na vinya.

²⁶ Nîûndû Ngai-Mûnene agaakûgitagîra, na agaakûmenyagîrîra ndûkagwe mûtegorî.

²⁷ Ndûkarege gûtethia mûndû ûrîa ûrî na ûvatari, ethîrwa ûrî na ûvoti wa kûmûtethia.

²⁸ Ndûkere mûndû wîngî agaaûka rûyû, nîguo ûmûnengere kîndû, angîthîrwa nwa ûmûnengere ûmûnthî.

²⁹ Ndûkavange gwîka mûndû ûrîa mûriganîtie nake ûndû mûcûku, atûûraga vakuvî nawe akwîvokete.

³⁰ Ndûgatetanie na mûndû vatarî na gîtûmi, rîrîa gûtarî ûndû mûcûku agwîkîte.

³¹ Ndûkerirîrie maûndû ma mûndû mwaganu, kana wîcirie gwîka ûndû wanarî ûmwe wa marîa ekaga.

³² Nîûndû Ngai-Mûnene nîathûrîte mûndû ûrîa mwaganu, nwatî nîatucaga mûndû ûrîa mwîvokeku mûrata wake.

³³ Kîrumi Kîam Ngai-Mûnene nîkînyitaga mîciî ya andû arîa aganu, nwatî nîarathimaga mîciî ya andû arîa athingu.

³⁴ Nîathekagîrîra andû arîa mathekanagîrîra, nwatî nîekaga andû arîa menyivagia maûndû maro.

³⁵ Andû arîa aûgî nîmakagaa gîtîîo, nwatî irimû nîigaaconorithua.