Nthi 29 - ÎVUKU RÎA ÛVORO MWARO

¹ Mûndû ûrîa ûkaanagua ûndû maita meengî akîûmagia kîongo, agaacûkangua wa rîmwe ûndû atangîvona.

² Rîrîa andû arîa athingu marathana, andû nî makenaga, nwatî rîrîa andû arîa aganu marathana, andû nîmacaaga.

³ Mûndû ûrîa wendete ûûgî nîatûmaga îthe akene, nwatî mûndû ûrîa ûnyitanagîra na maraa atûmagîra mbeca ciake na ûrimû.

⁴ Rîrîa mûthamaki aratûmîra kîvooto, vûrûri nîwîkindagîria, nwatî mûthamaki ûrîa wîciragia wa ûvoro wa mbeca nîacûkangagia vûrûri wake.

⁵ Mûndû ûrîa ûnyûrûragia mûndû ûrîa wîngî, aigaga mûtego wa kwînyita ke mwene.

⁶ Mûndû mûcûku anyitagwa nî mevia make ke mwene, nwatî mûndû mûthingu ainaga arî na gîkeno.

⁷ Mûndû mûthingu nîamenyaga ivooto cia athîni, nwatî mûndû mwaganu ndamenyaga maûndû mau.

⁸ Andû arîa aritu matûmaga îtûûra rîakane mwaki, nwatî andû arîa aûgî nî mathiragia marakara.

⁹ Rîrîa mûndû mûûgî agûcira na mûndû mûritu, mûndû ûcio mûritu arumanaga na akatheka atagûtigithîrîria.

¹⁰ Aûragani mathûrîte andû arîa evokeku, nwatî andû arîa athingu magitagîra ûtûûro wao.

¹¹ Mûndû mûritu onanagia marakara make cararûkû, nwatî mûndû mûûgî nîathithagîrîra marakara na agakirîrîria.

¹² Mûthamaki angîthikagîrîria maûndû ma maveeni, anene ake onthe matuîkaga aganu.

¹³ Mûthîni na mûndû ûrîa ûvinyanagîrîria megananîtue nî ûndû ûmwe; naguo nî atî, oîrî maaverwe metho nî Ngai-Mûnene.

¹⁴ Mûthamaki ûrîa ûtucagîra mûthîni na kîvooto, ûthamaki wake nî wîvandaga tene na tene.

¹⁵ Kûverithua na gûkaanua nî gûtûmaga mûndû aûvîge, nwatî mwana ûrîa ûrekagîrîrua eke wa ûrîa akwenda nîaconorithagia ng'ina.

¹⁶ Rîrîa andû arîa aganu marathana, waganu nîwongererekaga, nwatî andû arîa athingu nîmonaga andû acio makîgwa.

¹⁷ Thomithia mwana waku mîtugo mîaro na nîagaatûma ûgîa na thayû; ke nîagaatûma ûkene.

¹⁸ Andû matarûmagîrîra ûrîa Ngai endaga matirî mîtugo mîaro, kûrathimwa nî mûndû ûrîa wathîkagîra watho wa Ngai.

¹⁹ Ndungata ndîrûngagwa na ciugo ntheri, nîûndû wana amenya ûrîa erwa ndathîkaga.

²⁰ Kûrî kîîrîgîrîro kûrî kîrimû gûkîra mûndû ûrîa wîciragia nî mûûgî na tî mûûgî.

²¹ Mûndû ûrîa ûvecaga ndungata yake kîrîa kîonthe endaga kuuma arî mûnini, mûthiiarî ndungata îo nîîkaamûgaa.

²² Mûndû wa mang'ûrîka nîatûmaga kûgîe na ngucanio, na mûndû wa marakara nîatûmaga kûgîe na mathîna meengî.

²³ Mwîtîîo nîûtûmaga mûndû agwa, nwatî mûndû ûrîa mwînyivia nî avecagwa gîtîîo.

²⁴ Mûndû ûrîa ûnyitanagîra na mwîi acûkangagia ûtûûro wake ke mwene, nîegucaga irumi cia ûrîa ûrarumwa, na ndetîkagîra kumbûra.

²⁵ Gwîtigîra andû nî gwîtonyia mûtegorî we mwene, nwatî mûndû ûrîa wîvokaga Ngai-Mûnene ethagîrwa arî mûgitîre.

²⁶ Andû eengî nîmeyendithagia kûrî mûthamaki, nwatî mûndû anyitaga kîvooto kuuma kûrî Ngai-Mûnene.

²⁷ Andû arîa athingu nî mathûrîte arîa aganu, nao andû arîa aganu nî mathûrîte arîa athingu.