Nthi 28 - ÎVUKU RÎA ÛVORO MWARO

¹ Mûndû mwaganu aûraga wana atarî mûvinyûrie nî mûndû, nwatî ûrîa mûthingu ethagîrwa aûmîrîrîtie ta mûnyambû.

² Rîrîa andû mevia vûrûri wao nîûgîcaga na athani eengî, nwatî vûrûri ûrî na athani aûgî na marî na ûtaûku nîûgîcaga na vinya na ûgekindîria.

³ Mûtongoria ûrîa ûvinyagîrîria mûthîni, ekariî ta mbura îrîa yuraga îgatiga yacûkangia irio irî mîgûndarî.

⁴ Andû arîa mareganaga na watho makumagia andû arîa aganu, nwatî arîa mathîkagîra watho nîmareganaga na andû arîa aganu.

⁵ Andû arîa eki naaî matitaûkagîrwa nî kîvooto, nwatî arîa magoocaga Ngai-Mûnene nîmataûkagîrwa viû.

⁶ Nîkava mûndû mûthîni ûrîa ûtûûraga arî mwîvokeku, gûkîra gîtonga kîrîa gîtûûraga ûtûûro ûtarî wa kwîvokeka.

⁷ Mwana ûrîa wathîkagîra watho ethagîrwa arî mûûgî, nwatî ûrîa ûtumaga ûrata na arîa akoroku nîaconorithagia îthe.

⁸ Mûndû ûrîa wongagîrîra ûtonga wake na njîra ya gwîtia maciaro, ûtonga ûcio wake ûthiîcaga na ûrîa ûrî ntha na andû arîa athîni.

⁹ Mûndû ûrîa ûregaga kwathîkîra watho, Ngai ndakenagua nî mavoya make.

¹⁰ Mûndû ûrîa ûveenagîrîria mûndû mwîvokeku nîguo eke naaî, agûcaga mûtegorî wake ke mwene, nwatî mûndû ûrîa ûtarî na mavîtia nîakagaa maûndû maro.

¹¹ Gîtonga gîciragia atî kîo nî kîûgî, nwatî mûthîni ûrî na ûtaûku nîamenyaga atî gîtonga tî kîûgî.

¹² Rîrîa andû arîa athingu matuîka athani, andû nîmakûngûagîra, nwatî andû arîa aganu matuîka athani, andû nîmaûraga nî o.

¹³ Mûndû ûrîa ûthithaga mevia make ndangîgîa na mûtûûrîre mwaro, nwatî mûndû ûrîa umbûraga na agatiga mevia make nîakeguîrwa ntha nî Ngai.

¹⁴ Gûkena nî mûndû ûrîa wîtigagîra Ngai-Mûnene vîndî cionthe, nwatî mûndû wa ngoro nyûmû arîkagîrîria thînarî.

¹⁵ Mûthamaki mwaganu akîatha athîni, nîta mûnyambû ûkîrarama kana ngatûnyi îkîtharîkîra kîndû.

¹⁶ Mûthamaki ûtarî na ûûgî nîavinyagîrîria andû, nwatî ûrîa ûthûrîte indo cia ungumania athanaga kavinda karaca.

¹⁷ Mûndû ûrîa ûraganîte atûûraga aûrûraga nginya rîrîa agaakua, mûndû ta ûcio ndagîrîrwe nî gûtethua.

¹⁸ Mûndû ûrîa ûthiîcaga na mîthiîre mîkinyanîru nîakaavonokua, nwatî mûndû wa mîthiîre mîcûku nîakaagwa wa rîmwe.

¹⁹ Andû arîa marutaga wîra na kîîo mîgûndarî yao nîmagîcaga irio cia kwîgana, nwatî arîa matecaga mavinda na maûndû matarî vata nîmatûûra marî athîni.

²⁰ Mûndû mwîvokeku nîakaagîa na irathimo nyîngî, nwatî ûrîa wendaga gûtonga na îvenya nîakaaverithua.

²¹ Kûgîa na kîmenyano tî waro, nwatî andû nîmavîtagia nîûndû wa kwamûkîra îvaki wana rîrî înini.

²² Mûndû mûkoroku endaga gûtonga na îvenya, na ndamenyaga atî akaarîkîrîria na ûthîni.

²³ Ûngîruta ûrîa wîngî mavîtia vandû va kûmûnyûrûria, vuvarî nîakenaga.

²⁴ Mûndû ûrîa wîaga indo cia îthe kana ng'ina akînauga atîrî, “Mau tî mavîtia;” ndarî ngûrani na aîi arîa engî.

²⁵ Mûndû mwîyendi nîatûmaga kûgîe na ngucanio, nwatî ûrîa wîvokete Ngai-Mûnene nîarathimagwa.

²⁶ Mûndû ûrîa wîvokaga meciria make ke mwene nî mûritu, nwatî ûrîa ûrûmagîrîra ûûgî nîavonokaga thînarî.

²⁷ Mûndû ûrîa ûvecaga arîa athîni ndagaaturaga kîndû, nwatî ûrîa ûregaga gûtethia athîni nîakaarumwa nî andû eengî.

²⁸ Rîrîa andû arîa aganu matuîka athani, andû nîmaûraga nî o, nwatî rîrîa mauma wathanirî, andû arîa athingu nîmongererekaga.