Nthi 26 - ÎVUKU RÎA ÛVORO MWARO

¹ Kîrimû gîtiagîrîrwe nî gûkumua, nîta mbaravu vîndî ya riûa kana mbura vîndî ya maketha.

² Kîrumi gîtagîrîrîte gîtinyitaga mûndû, gîkariî ta nthûngûrûrû îrîa îgûrûkaga îtakûgwa vandû.

³ Mbarathi îrivagwa na kîvoko, mvunda yovagwa na mûkanda, nakîo kîrimû kîrivagwa na kîthanju.

⁴ Ûngîcokeria kîrimû kîûria gîake Kîam ûrimû, wanawe ûrî kîrimû wa take.

⁵ Cokeria kîrimû kûringana na ûrimû wa kîo, nîguo gîtikeyone kîrî kîûgî.

⁶ Mûndû ûrîa ûtûmaga kîrimû na ndûmîrîri, nîta gwîtinia etinagia magûrû, na nîeretagîre thîna.

⁷ Nthimo yarîtue nî mûndû mûritu nî ya mana, nîta magûrû ma mûndû arî kîonje macunjurîte.

⁸ Kûva kîrimû gîtîîo, nîta gwikia îthiga na gîkûtha.

⁹ Mûndû mûritu akîgeria gûtûmîra nthimo, nîta mûrîu akîgeria gwîkûûra mwîgua njara.

¹⁰ Kwandîka kîrimû kana mûrîu arute wîra, nîta mûguîmi ûrîa ûguraragia wa mûndû ûrîa ethîrîria.

¹¹ Kîrimû kîrîa gîcokagîra ûrimû wakîo, gîkariî ta ngui îrîa îcokagîra matavîka ma yo.

¹² Nî kava kîrimû gûkîra mûndû ûrîa wîtucaga atî ke nî mûûgî.

¹³ Mûndû kîgûûta augaga atî ke ndakuuma nyomba, egwatagia atî nja kûrî na mûnyambû.

¹⁴ Kîgûûta kîthiûrûrûkaga kîrî ûrîrî, wata ûrîa mûrango ûthiûrûrûkaga vandû vamwe ûnyitîtwe nî irenji.

¹⁵ Mûndû kîgûûta nwa avote kûrûma irio kuuma thaanirî na njara yake, nwatî nîaremagwa nî gwîyakîria irio icio.

¹⁶ Mûndû kîgûûta eciragia atî ke nî mûûgî gûkîra andû eengî arîa macokagia maûndû na ûmenyo.

¹⁷ Mûndû ûrîa wîtonyagia ngararirî itamûkoniî ekariî ta mûndû ûrîa ûcemanagia na ngui njîrarî akamînyita matû.

¹⁸ Mûndû ûrîa ûveenagia mûndû ûrîa wîngî akînamwîra atî nîkwa akûthakaga,

¹⁹ nîta mûndû wa ngoma akîthaka na mwaki kana mîguî îrî na ûvai.

²⁰ Rîrîa ngû ciathira mwaki nîkwa ûvoraga; na kûrîa gûtarî ngutû, îteta nîrîthiraga.

²¹ Wata ûrîa makara na ngû matûmaga mwaki wîkare ûgîakanaga, nwata guo mûndû wa înegene atûmaga kûgîe na ngucanio.

²² Ciugo cia mûndû wa ngutû nîta irio irî na mûcamo mwaro, imerûkaga waro igatonya îvu ndaarî.

²³ Ciugo mbaro ciarîtue nî mûndû ûtarî mwîvokeku, nîta ta sîlûva îvakîtwe nyûngûrî ya yûmba.

²⁴ Mvinga îkunîkagîra ûvinga wa yo na ciugo mbaro, na ngororî yake ethagîrwa akîveenania.

²⁵ Rîrîa mvinga îkwaria waro, ndûkamîtîkie, nîûndû îthagîrwa îcûrîtwe nî ûvinga ngororî yayo.

²⁶ Wana îngîgeria gûkunîkîra ûvinga wayo, ûcûku wayo nîûkaamenyekana nî andû onthe.

²⁷ Mûndû ûrîa wînjagîra ûrîa wîngî îrima nîke ûgûcaga kuo, na mûndû ûrîa ûvingiritagia îthiga nîke ûtombooragwa nîrîo.

²⁸ Mûndû ûrîa ûveenagia mûndû ûrîa wîngî nîamûmenete, na mîario ya kînyûrûri nî ya gûcûkangia.