Nthi 25 - ÎVUKU RÎA ÛVORO MWARO

Nthimo ciîngî cia Solomoni

¹ Ino wa nacio nî nthimo cia Solomoni. Ciandîkirwe nî anene a Hezekia, mûthamaki wa Juda.

² Ngai akumagua nîûndû wa kûthitha maûndû, nwatî athamaki makumagua nîûndû wa maûndû marîa maumbûraga.

³ Ta ûrîa maturî kûracavîte na îgûrû, nakuo nthî gûkarikîra, ûguo nwaguo meciria ma mûthamaki matangîmenyeka.

⁴ Thengutia gîko kuuma kûrî sîlûva, na mûturi wa indo cia cuuma nîagûkûrûthîra kîndû Kîamro.

⁵ Thengutia andû arîa aganu vakuvî na mûthamaki, na ûthamaki wake nîûkeevanda maûndûrî ma kîvooto.

⁶ Ndûkeyendithie kûrî mûthamaki, kana wîtue mûndû wa vata ûrî mbere ya anene.

⁷ Nîkava kwîrwa atîrî, “Ûka wîkare ava mbere,” gûkîra kwîrwa wîrûkîre gîtî kîu nîguo gîkarîrwe nî mûndû wîngî wa gîtîîo kûrî we. Ûndû ûrîa wonete na metho,

⁸ ndûkavinyûre kûûvira îgootirî; nîûndû mûthiiarî mûndû wîngî angîruta ûira wa kwonania atî we ûrî na mavîtia, ûgaacoka wîke atîa?

⁹ Ûngîvîtania na mûndû ûrîa wîngî îgucanani muoîrî, na ndûkaumbûre nthitho ya mûndû ûrîa wîngî.

¹⁰ Nîûndû andû mangîmenya atî ndwîcî kûthitha maûndû, ndûkaavewa gîtîîo rîngî.

¹¹ Ûndû warîtue vîndî îrîa mbagîrîru, wîkariî ta îtunda rîa thaavu rîrî mbakûrirî ya sîlûva.

¹² Mûndû mûûgî akaanîtie mûndû ûkûthikîrîria, ekariî ta gîcûvî Kîam thaavu kana mathaga ma thaavu ntheri.

¹³ Mûnjaama mwîvokeku nîakenagia ûrîa ûmûtûmîte, ta ûrîa manjî ma mvevo makenagia mûndû kûrî na ûrugarî vîndî ya maketha.

¹⁴ Mûndû ûrîa wîkumagia atî nîakûvecana kîveo na ndavecane, ekariî ta rûkûngi na matu gûtarî na mbura.

¹⁵ Gûkirîrîria nwa gûtûme mûthamaki etîkîre ûndû, na mîario ya ûvoreri nwa îtûme thîna ûthire.

¹⁶ Ûngîona ûûkî, rîa ûrîa ûkwîganîte, ûngîrîa ûkî mwîngî mûno nwa ûtûme ûtavîka.

¹⁷ Ndûgaceragîre mûndû ûrîa wîngî vîndî cionthe; nîûndû nwa anogue nîwe na akûthûûre.

¹⁸ Mûndû ûrîa ûrutaga ûira wa maveeni îgûrû rîgiî mûndû ûrîa wîngî, ekariî ta njokoma ya mbaara, kana rûviû, kana mûguî mûûgî.

¹⁹ Gwîtîkia mûndû ûtarî mwîvokeku vîndî ya thîna, nîta kûrîa irio na îgego yoru kana kûrûngama na kûgûrû kûrî na wonje.

²⁰ Kwinîra mûndû arî na kîeva nyîmbo, nîta kûmûruta nguo kûrî na mvevo, kana kûvaka kîronda cumbî.

²¹ Ethîrwa nthû yaku îrî mvûtu, mîve irio îrîe; na ethîrwa îrî nyondu, mîkundie manjî înyue;

²² nîûndû weka ûguo nîûgaatûma îgîe na gîconoko kînene, na nîta kûmigîrîra makara ma mwaki kîongorî Kîam yo, nake Ngai-Mûnene nîagaakûva kîveo.

²³ Rûkûngi rwa mwena wa rûgûrû rûretaga mbura, nacio njukû iretaga marakara.

²⁴ Nîkava kûmama rûgitorî rwa nyomba, gûkîra kûmama nyombarî îmwe na mûndûmûka wa înegene.

²⁵ Wîguîte ûvoro mûgeni kuuma vûrûri wa kûraca, nîta kûnyua manjî ma mvevo ûrî mûnyondu ûkang'arûka.

²⁶ Mûndû mûthingu ûrîa ûrûmagîrîra mûndû mwaganu, ekariî ta îtherûkîro rîa manjî rîrî riunjuge kana kîthima kîrî na gîko.

²⁷ Kûrîa ûûkî mwîngî mûno tî waro, nîûndû nîta kwenda gûkumua mûno.

²⁸ Mûndûmûrûme ûtangîvota kwînyitia arî na marakara, nîta îtûûra rîtharîkîrîtwe rîgatigwa rîtarî ririgîre.