Nthi 23 - ÎVUKU RÎA ÛVORO MWARO

Uuge wa Gatandatû

¹ Ûngîkara nthî metharî mûrîcanîre na mûthamaki, menyerera mûno ndûkariganîrwe nî ûrîa mûrî nake.

² Ethîrwa nîwendete kûrîa mûno, îmenyerere ndûkarîe na ûkoroku.

³ Ndûkerirîrie irio ciake nîûndû nî mbaro, nwa kwîthîrwa nî cia gûkûveenereria.

Uuge wa Mûgwanja

⁴ Ndûkenogie ûgîcaria ûtonga, gîa na ûûgî na ûtige kwîthînia.

⁵ Ûtonga ûthiraga ta kûminjia na kûminjûkia, takwa wagîa na mathagu wa rîmwe ûkînagûrûka ta nderi.

Uuge wa Kanana

⁶ Ndûkarîe irio cia mûndû mûthunu, kana wîrirîrie irio ciake mbaro,

⁷ nîûndû agaakwîra atîrî, “Rîa na ûnyue!” Nwatî ke ndethagîrwa agîgwîciria, ethagîrwa agîîciria kîrîa ûrarîa.

⁸ Ûgaatavîka irio irîa ûrarîte, na ciugo ciaku cia kûmûgathîrîria igaatuîka cia mana.

Uuge wa Kenda

⁹ Ndûkaarie maûndû ma ûûgî kûrî kîrimû, nîûndû gîkaanyarara ûûgî wa ciugo ciaku.

Uuge wa Îkûmi

¹⁰ Ndûkagendagendie mûkûmbû kuuma varîa ûtûûraga, kana woce mûgûnda wa ciana cia ndigwa.

¹¹ Ngai-Mûnene arî vinya na nîke ûmagitagîra, mûgîcira nao nîke ûkaamacirîrîra.

Uuge wa Îkûmi na ûmwe

¹² Thikagîrîria ûrîa ûrathomithua, thikagîrîria ciugo cia ûmenyo.

Uuge wa Îkûmi na Îîrî

¹³ Ndûkarege kûverithia mwana, ûngîmûriva na kîthanju ndangîkua.

¹⁴ Ûngîmûriva na kîthanju, nîûkaamûvonokia ndakathiî kwa arîa akuû.

Uuge wa Îkûmi na Îthatû

¹⁵ Mwana wakwa ûngîtuîka mûndû mûûgî, wananie nîngaakena.

¹⁶ Ngoro yakwa nîgaacanjamûka rîrîa ngegua ûkîaria ûrîa kwagîrîrîte.

Uuge wa Îkûmi na Kana

¹⁷ Ndûkeguîre andû evia wîru, nwatî ûtûûre wîtigîrîte Ngai-Mûnene vîndî cionthe.

¹⁸ Nama, vuvarî kûrî na kîîrîgîrîro, na kîîrîgîrîro gîaku gîtigaatuîka Kîam mana.

Uuge wa Îkûmi na Gatano

¹⁹ Mwana wakwa, thikîrîria na ûgîe na ûûgî, na wîcirie mûno ûvoro wîgiî mûtûûrîre waku.

²⁰ Ndûkegwatanie na andû arîa manyunyaga ndivei mûno makarîwa, kana arîa akorokeru irio.

²¹ Andû arîa manyunyaga ndivei mûno makarîwa na arîa akoroku magaatuîka athîni, nake mûndû ûrîa ûrîcaga akînamama ekagîra matangari.

Uuge wa Îkûmi na Gatandatû

²² Thikagîrîria aguo ûrîa wagûciarire, na ndûkanyarare nyûkwe vîndî îrîa agaakûra.

²³ Gûra ûma na ndûkawendie, gûra ûûgî, kîrîra na ûmenyo.

²⁴ Îthe wa mwana mûthingu nîakenaga mûno, mûciari arî na mwana mûûgî nîakenagua nîke.

²⁵ Tûma aguo na nyûkwe makene nîwe, tûma nyûkwe ûrîa wagûciarire acanjamûke.

Uuge wa Îkûmi na Mûgwanja

²⁶ Mwana wakwa, nthikîrîria, na ûrûmîrîre mîthiîre yakwa.

²⁷ Mûmaraa nîta îrima îrikîru, mûndûmûka mûtangatangi nîta kîthima gîceke.

²⁸ Ekaraga etererete ta mûcunani, na nîatûmaga arûme eengî methîrwe matarî evokeku.

Uuge wa Îkûmi na Inyanya

²⁹ Nîûrîkû ûrî na thîna? Nî ûrîkû ûrî na kîeva? Nîûrîkû ûrî na ngucanio? Nîûrîkû ûrateta? Nîûrîkû ûtivîtue vatarî na gîtûmi? Nîûrîkû ûrî na metho matuune?

³⁰ Nî arîa matindaga makînyua ndivei, arîa mathiîcaga magîcamaga ndivei cia mîthemba yonthe.

³¹ Ndûkerirîrie ndivei wona ûrîa îtunîvîte, vîndî îrîa îravenavenia îrî gîkomberî, na ûrîa îmerûkaga waro îkînyuwa.

³² Mûthiiarî îrûmaga ta njoka, na îrathaga ta kîmbuva kîrîa kîrî ûrogi.

³³ Metho maku makoonaga indo marundurundu, na ûkaaragia maûndû ma waganu.

³⁴ Ûkethîrwa wîkariî ta mûndû amamîte îriarî gatagatî, ta mûndû amamîrîte mûtî wa meri.

³⁵ Nîûkaauga atîrî, “Nîmaraningire, nwatî ndinagurara, nîmarandivire, nwatî ndinamenya. Ngaaûkîra rî? Nîngûthiî gûcaria ndivei îngî.”