Nthi 22 - ÎVUKU RÎA ÛVORO MWARO

¹ Nîkava kûgîa na ngumo mbaro gûkîra ûtonga, gîtîîo nî Kîamro kûrî sîlûva kana thaavu.

² Arîa atongu na arîa athîni megananîtue nî ûndû ûmwe, Ngai-Mûnene nîke wamaûmbire onthe.

³ Mûndû mûûgî onaga thîna îgîûka akamîûrîra, nwatî mûndû mûritu eviraga thînarî akanyitwa nîyo.

⁴ Kîveo Kîam wînyivia na gwîtigîra Ngai-Mûnene nî ûtonga, gîtîîo na ûtûûro mûraca.

⁵ Njîra ya arîa aremi îrî mîgua na mîtego, mûndû ûrîa wîmenyagîrîra nîamîîthemaga.

⁶ Thomithia mwana njîra îrîa agîrîrwe nî kûthiîra, na wana akûra ndakaariganîrwa nîyo.

⁷ Itonga ciathaga arîa athîni, ûrîa ûkombaga nî ngombo ya ûrîa ûkombithanagia.

⁸ Mûndû ûrîa ûtarûmagîrîra kîvooto nîanyitagwa nî thîna, na kûvinyanîrîria gwake nîgûkinyaga mûthiia.

⁹ Mûndû mûtana nîarathimagwa, nîûndû nîagaanaga irio ciake na athîni.

¹⁰ Îngata mûndû wa îtherû, na ngucanio nîikûûra, ngarari na irumi nîikûthira.

¹¹ Mûndû ûrî ngoro ntheru na mîario ya ntha, mûthamaki nîagaatuîka mûrata wake.

¹² Ngai-Mûnene nîamenyagîrîra andû arîa marî ûmenyo, nwatî ndathikagîrîria arîa matarî evokeku.

¹³ Kîgûûta kiugaga atîrî, “Ndingiuma nja; kûu kûrî na mûnyambû na nîûkûmbûraga!”

¹⁴ Ciugo cia mûndûmûka kîmaramari nî ta îrima îrikîru, rîgûcaga mûndûmûrûme ûrîa ûrakarîtie Ngai-Mûnene.

¹⁵ Ciana irî mîtugo ya ûrimû, nwatî kûmariva na kîthanju nîkûthiragia mîtugo ya ûrimû kûrî ciana.

¹⁶ Mûndû ûrîa ûvinyagîrîria mûthîni nîguo ongerere ûtonga wake kana akava itonga, ke mwene arîkagîrîria na kûthîna.

¹⁷ Vingûra matû wîgue ciugo cia arîa aûgî, thikîrîria wîgue mataaro makwa.

¹⁸ We nîûgaakena ethîrwa ûkaamaririkanaga, na ûmagwetage vîndî cionthe.

¹⁹ Nîrenda gûkûmenyithia mo ûmûnthî, nîguo wîvokage Ngai-Mûnene.

²⁰ Anga ndikwandîkîrîte nthimo mîrongo îthatû, irî na kîrîra na ûmenyo,

²¹ nîguo ikûthomithie maûndû marîa magîrîrîte na ma ma, nîguo ûcokerie arîa maagûtûmire ûvoro wa ma.

Uuge wa Mbere

²² Ndûgacune mûthîni kîndû nîûndû atî ke ndarî na ûvoti, kana ûvinyîrîrie mûndû ûtarî na mûmûtethia cirarî,

²³ nîûndû Ngai-Mûnene nîakaamacirîrîra, na nîagaacuna arîa macunaga athîni na amacune wana mîoyo yao.

Uuge wa Kaîrî

²⁴ Ndûgatume ûrata na mûndû ûrîa ûrakaraga na îvenya, kana ûthiîcanie na mûndû wa mang'ûrîka.

²⁵ Wavota kûthoma mîtugo yake, na wîkare take.

Uuge wa Kathatû

²⁶ Ndûgatuîke ûmwe wa arîa meranagîra maûndû, arîa marûngamagîrîra mathiirî.

²⁷ Ethîrwa ndûrî na kîndû gîa kûrîva thirî nakîo, wana nwa ûcuunwe ûrîrî ûrîa ûmamagîra.

Uuge wa Kana

²⁸ Ndûkagendagendie mûkûmbû kuuma varîa ûtûûraga, ûrîa wekîrirwe nî methe menyu.

Uuge wa Gatano

²⁹ Nîkûrî na mûndû mwara wîrarî wake? Ûcio nîagaatungatîra athamaki, ndagaatungatîra andû matarî îgweta.