Nthi 21 - ÎVUKU RÎA ÛVORO MWARO

¹ Ngai-Mûnene nîke wathaga meciria ma mûthamaki, nîamerekagîria kûrîa akwenda.

² Mûndû onaga mîthiîre yake yonthe îrî mîagîrîru, nwatî Ngai-Mûnene athimaga ngoro.

³ Gwîka ûndû ûrîa mwagîrîru na wa kîvooto, nî gûkenagia Ngai-Mûnene gûkîra îgongoona.

⁴ Mwîtîîo, na mwîgatho nîcio itongoragia andû arîa aganu, na ûcio nî wîvia.

⁵ Mîvango ya mûndû ûrîa ûrutaga wîra na kîîo nîîtûmaga agîe indo nyîngî, nwatî mûndû ûrîa wîkaga maûndû na îvenya ndagîcaga na indo cia kwîgana.

⁶ Ûtonga ûgîtwe na njîra îtarî ya ma, ûmbûkaga ta ndogo na nî mûtego wa gîkuû.

⁷ Waganu wa andû arîa aganu nîguo ûkaamacûkangia, nîûndû nîmaregaga gwîka ûrîa kwagîrîrîte.

⁸ Mîthiîre ya andû arîa evia tî mîrûngarû, nwatî mîtugo ya andû arîa evokeku nî mîrûngarû.

⁹ Nîkava kûmama rûgitorî rwa nyomba, gûkîra kûmama nyombarî îmwe na mûndûmûka wa înegene.

¹⁰ Andû arîa aganu meriragîria gwîka naaî tu, matirî ntha na andû arîa engî.

¹¹ Rîrîa mûndû wa îtherû averithua, kîrimû nîkîûvîgaga, rîrîa mûndû mûûgî athomithua, nîagîcaga na ûmenyo.

¹² Ngai nîonaga ûrîa mîciî ya andû aganu îkariî, na nîakaamathiria.

¹³ Mûndû ûrîa ûtathikagîrîria mûthîni rîrîa akûmûkaîra, wa nake ndakoona wa kûmûthikîrîria agîkaya.

¹⁴ Marakara mathiragua na kîveo kîvecanîtwe na njîra ya nthitho, na îvaki rîvecanîtwe na njîra ya nthitho nîrîthiragia marakara.

¹⁵ Kîvooto kîrûmîrîrîtwe, andû arîa athingu nîmakenaga, nwatî andû arîa aganu nîmanyitagwa nî kîeva.

¹⁶ Mûndû ûrîa ûtiganaga na mîtugo îrîa mîaro, arîkagîrîria kwa arîa akuû.

¹⁷ Mûndû ûrîa wendaga ikeno agaatûûra arî mûthîni, na mûndû ûrîa wendaga kûnyua ndivei na kûrîa irio cia goro ndagaatonga.

¹⁸ Andû arîa aganu nîo manyitagwa nî maûndû macûku marîa mavangagîra andû arîa athingu.

¹⁹ Nîkava gûtûûra werûrî ûrî wenga, gûkîra gûtûûra na mûndûmûka wa îteta na ûteganagîra.

²⁰ Mûciî wa mûndû mûûgî wîthagîrwa ûrî na indo cia goro, nwatî mûndû mûritu atûmagîra indo ciake naaî ikathira.

²¹ Mûndû ûrîa wîkaga maûndû ma ûthingu na kwîgucanîra ntha, nîagaatûûra îvinda îraca na atîwe nî andû.

²² Mûndû mûûgî nwa anyite îtûûra rînene rîgitîrîtwe nî andû marî vinya, na nwa omomore nthingo irî na vinya irîa andû acio mevokete imagitîre.

²³ Mûndû ûrîa ûmenyagîrîra ûrîa akwaria, nîaûragîra thîna.

²⁴ Ndûrîka nî mûndû ûrîa mwîtîi na mwîyambi, ekaga maûndû na mwîtîîo.

²⁵ Kîgûûta kîûragagwa nî kwîrirîria, nîûndû gîtiîtîkagîra kûruta wîra.

²⁶ Andû arîa aganu vîndî cionthe meriragîria ûrîa mangîgîa, nwatî andû arîa athingu mavecanaga na ûtaana.

²⁷ Ngai-Mûnene nîathûrîte îgongoona rîa mûndû mwaganu, na makîria rîrutîtwe na ngoro îtarî ntheru.

²⁸ Ûira wa mûndû wa maveeni ndûthikagîrîrua, nwatî ciugo cia mûndû ûrî matû nîithikagîrîrua.

²⁹ Mûndû mwaganu onanagia ûrîa aicî maûndû, nwatî mûndû mûthingu ekaga ûndû ambîte gwîciiria.

³⁰ Gûtirî ûûgî, ûtaûku, kana kîrîra, kîngîgûtethia angîthîrwa Ngai-Mûnene ndarî vamwe nawe.

³¹ Mbarathi nwa îvarîrîrue nîûndû wa mbaara, nwatî Ngai-Mûnene nîke ûvotithanagia kûvootana.