Nthi 20 - ÎVUKU RÎA ÛVORO MWARO

¹ Ndivei îretage înegene na njovi ndûrû îretage ngucanio, na mûndû ûrîa ûinyunyaga nî kîrimû.

² Mûthamaki arî mûrakaru nîta mûnyambû ûkîrarama, mûndû ûrîa ûmûrakaragia ecaragîria gîkuû ke mwene.

³ Andû arîa aritu mekaraga vîndî cionthe magîkararanagia, mûndû ûrîa ûragîra ngucanio nîavecagwa gîtîîo.

⁴ Mûndû kîgûûta ndavotaga kûvarîria mûgûnda wake kavinda karîa kagîrîru, vîndî ya maketha yakinya ndagaaketha kîndû.

⁵ Meciria ma mûndû nîta manjî marî kîthimarî kîrikîru, nwatî mûndû mûûgî nwa avote kûmatava.

⁶ Andû eengî metucaga atî nî aro, nwatî mûndû mwîvokeku angîuma kû?

⁷ Mûndû mûthingu ûrîa ûtûûraga na mîtugo mîagîrîru, njiarwa ciake nîikaarathimwa.

⁸ Rîrîa mûthamaki ekarîra gîtî Kîam ûnene agîtwithania ciira nîathuurûkanagia maûndû monthe macûku kuuma kûrî marîa maro.

⁹ Nû ûngiuga nama atî thamiri yake nî ntheru, na atî ndarî na mevia?

¹⁰ Ngai-Mûnene nîathûrîte andû arîa matûmagîra ithimi irîa îtarî mbagîrîru.

¹¹ Wana ciana imenyekaga ûrîa ciîkariî na njîra ya ciîko ciacio, ethîrwa ûrîa mekaga nî mwaro kana nî mûcûku.

¹² Ngai-Mûnene aaûmbire metho nîguo twonage namo, na matû nîguo twîgucage namo.

¹³ Ndûgatûmagîre mavinda maku na kûmama nîguo ndûgatuîke mûthîni, vingûra metho na nîûkaagîa na irio nyîngî.

¹⁴ Mûgûri wa kîndû vîndî cionthe atetaga atî thogora wa indo ûrî îgûrû mûno, nwatî acokaga kûthiî agîîtîaga ûrîa anyivanyivîrua thogora.

¹⁵ Kûrî thaavu na mathiga ma goro meengî, nwatî ciugo cia ûûgî irî goro makîria.

¹⁶ Oca nguo ya mûndû ûrîa ûrûngamîrîrîte mûndû mûgeni nîûndû wa thirî, na wîkare nayo nginya rîrîa mûndû ûcio mûgeni akaarîva thirî ûcio.

¹⁷ Kîndû kîrîa mûndû anyitîte na njîra ya maveeni nîagîkenagîra, nwatî vuvarî kîthagîrwa gîcûkîte ta kanyua karî na mûthanga.

¹⁸ Caria ûtaaro nîguo mîvango yaku îtuîke mîaro, ndûkambîrîrie mbaara ûtavoete ûkûrû.

¹⁹ Mûndû wa njukû ndaigaga nthitho, kwoguo ndûkanyitanîre na mûndû ûrîa waragia ûrimû.

²⁰ Mûndû ûrîa ûrumaga îthe kana ng'ina, ûtûûro wake ûthiraga ta taa îvorete vîndî ya nduma.

²¹ Ûtonga ûgîtwe na îvenya, ûthiraga wa na îvenya.

²² Wekwa ûndû mûcûku nî mûndû ndûkerîvîrîrie, îîvoke Ngai-Mûnene na nîagaagûtethia.

²³ Ngai-Mûnene nîathûrîte ithimi irîa itarî mbagîrîru, ithimi cia maveeni tî mbaro.

²⁴ Ngai-Mûnene nîke ûmenyaga mûtûûrîre wonthe wa mûndû, kwoguo gûtirî mûndû ûngîmenya ûrîa mûtûûrîre wake ûkeethîrwa wîkariî.

²⁵ Mbere ya kwîranîra kîrîa ûkûrutîra Ngai-Mûnene ambaga gwîciiria waro, nîguo vuvarî ndûgacoke kwîricûkwa.

²⁶ Mûthamaki mûûgî nîathuuranagia andû arîa aganu, na akamaverithia atarî na ntha.

²⁷ Thamiri ya mûndû nîta ûtheri kuuma kûrî Ngai-Mûnene, îrîa îtuîragia ngoro yake.

²⁸ Ûma na wîvokeku nîcio igitagîra mûthamaki, wathani wake ûtûûragua nî kîvooto.

²⁹ Riiri wa andû ethî nî vinya wao, nacio mbuî nî ûthaka wa andû arîa akûrû.

³⁰ Ndivo nene nîithiragia maûndû marîa macûku, ivoko nîirûngaga mîtugo ya mûndû.