Nthi 2 - ÎVUKU RÎA ÛVORO MWARO

Iveo irîa ciumanaga na Ûûgî

¹ Mwana wakwa, rûmagîrîra ciugo ciakwa, na wige maûndû marîa ngwathaga ngororî.

² Thikagîrîria ciugo cia ûûgî na ûgeragie kûgîa na ûmenyo.

³ Îtana nîguo ûvewe ûmenyo, na ûthaithane nîguo ûvewe ûtaûku,

⁴ ûcarie ta sîlûva na ûûcarie ta kîndû Kîam goro kîrî kîthithe;

⁵ weka ûguo nîrîo ûkaamenya gwîtigîra Ngai-Mûnene na ûgîe na ûmenyo wa Ngai.

⁶ Nîûndû Ngai-Mûnene nîke ûvecanaga ûûgî; ûmenyo na ûûgî umaga kûrî ke.

⁷ Ngai-Mûnene nîagaagîra andû arîa athingu mûthithû wa ûûgî; nîagitagîra arîa marî mîthiîre mîkinyanîru.

⁸ Nîagitagîra arîa marûmagîrîra kîvooto, na nîamenyagîrîra arîa mamwîtîkîtie.

⁹ Ûngîrûmîrîra ciugo ciakwa, nîûkaamenya maûndû ma ûthingu na ma kîvooto na waragania, nîûkaamenya ûndû wonthe ûrîa mwagîrîru.

¹⁰ Nîûkaagîa na ûûgî ngororî yaku, na ûmenyo ûtûme ûgîe na gîkeno.

¹¹ Ûkaagitagîrwa nî mîvango yaku mîaro; ûmenyo ûgaakûmenyagîrîra;

¹² na ûkûgiragîrîrie kuuma kûrî maûndû macûku, na kuuma kûrî andû arîa marî mîario ya kûvîtithia andû.

¹³ Andû acio nî mareganaga na mîthiîre mîkinyanîru na makarûmîrîra njîra cia nduma,

¹⁴ nîmakenaga rîrîa magwîka maûndû marîa macûku, na magakenagîrîra maûndû ma waganu marîa mavîtithagia andû,

¹⁵ andû arîa matarî mîthiîre mîrûngîrîru, na matangîîvokwa.

¹⁶ Ûmenyo ûgaakûvonokia kuuma kûrî mûndûmûka mûmaraa, na kuuma kûrî ciugo ciake cia gûkûgucîrîria,

¹⁷ mûndûmûka ûrîa ûtiganaga na mûndûmûrûme ûrîa wamûvikirie arî mwîthî, na akariganîrwa nî mîvîtwa îrîa evîtire mbere ya Ngai wake.

¹⁸ Nîûndû gûtonya nyomba yake, nîta gûtonya gîkuûrî, njîra ciake ithiîcaga kwa arîa akuû.

¹⁹ Gûtirî mûndû ûthiîcaga kûrî ke acoka, wana kana acoka rîngî njîrarî ya mwoyo.

²⁰ Kwoguo ûkaarûmagîrîra njîra cia andû arîa aro, na ûthiîcagîrîre njîrarî cia andû arîa athingu.

²¹ Nîûndû andû arîa athingu nîmagaatûûra gûkû nthî, na arîa matarî ûcuuke matikaauma kuo.

²² Nwatî andû arîa acûku nîmakaathirua kuuma gûkû nthî, na andû arîa mavangaga maûndû macûku nîmagaakûrwa kuo.