Nthi 17 - ÎVUKU RÎA ÛVORO MWARO

¹ Nîkava kûrîa tûirio tûnini andû marî na thayû, gûkîra kûrîa kîrugo na andû marî na ngucanio.

² Ndungata îrîa mbûgî nîkaatha mwana wa mwathi wayo ûrîa wîkaga maûndû ma gîconoko, na nîkaagaa kîndû ta ûmwe wa ciana cia mwathi wake.

³ Thaavu na sîlûva itheragua na mwaki, nake Ngai-Mûnene nîke ûthimaga ngoro cia andû.

⁴ Andû arîa acûku mathikagîrîria maûndû marîa macûku, nao arîa maveenanagia mathikagîrîria maûndû ma maveeni.

⁵ Mûndû ûrîa ûthekagîrîra mûthîni ethagîrwa akîruma Ngai ûrîa waûmbire mûndû ûcio. Mûndû ûrîa ûkenaga rîrîa mûndû wîngî arî thînarî, nwanginya akaaverithua.

⁶ Andû arîa akûrû nî makenaga rîrîa makwona ciana cia ciana ciao, wata ûrîa ciana ikenaga ikîona aciari a cio.

⁷ Andû arîa ave gîtîîo mativeenanagia, na irimû itiaragia ûndû wa vata.

⁸ Mûndû ûrîa ûvakanaga eciragia îvaki rîrutaga wîra ta ngûnga, etîkîtie atî nwa rîtûme maûndû monthe marîa ekaga mavue.

⁹ Mûndû ûrîa wovanagîra mevia nîatumaga ûrata na andû. Nwatî mûndû ûrîa wîkaraga akîririkanaga mavîtia marîa ekîtwe nî andû nîaûragaga ûrata.

¹⁰ Mûndû mûûgî akanîtue nîanyitaga ûndû ûcio na njîra ndikîru, gûkîra mûndû mûritu arivîtwe maita îgana.

¹¹ Mûndû mwaganu endaga tu wa kûregana na Ngai, nake mûndû ta ûcio atûmagîrwa mûnjaama mwaganu akamûverithie.

¹² Nîkava gûcemania na ngatûnyi ya nga îcuunîtwe twana twayo, kûrî gûcemania na mûndû kîrimû akiuruga ûrimû wake.

¹³ Ûngîrîvia wega na ûcûku, thîna ndîkaathira gwaku mûciî.

¹⁴ Kîambîrîria Kîam ngucanio nîta gûtemera manjî mûkaro, kwoguo rigîrîria ngucanio mbere ya yumîra.

¹⁵ Mûndû ûrîa ûverithagia mûndû mûthingu na mûndû ûrîa ûrekagîrîria mûndû mwaganu, Ngai-Mûnene nîamathûrîte wa oîrî.

¹⁶ Gûtirî vata wa gûtûmîra mbia kûthomithia kîrimû, nîûndû ndarî vata wa kûgîa naguo.

¹⁷ Mûrata wa ma nî wa vîndî cionthe. Andû arîa maciaranîrîtue vamwe nîmatethanagia vîndî ya thîna.

¹⁸ Mûndû mûûgî nderanagîra ûndû, na ndarûngamagîrîra thirî wa mûndû ûrîa wîngî.

¹⁹ Mûndû ûrîa wendete ngucanio nîendete mevia, na mûndû ûrîa mwîtîi acaragia thîna.

²⁰ Mûndû ûrîa wîciragia maûndû macûku ndathatûkagwa, na mûndû ûrîa waragia maveeni nîagûcaga thînarî.

²¹ Mwana kîrimû atûûragia îthe na kîeva, na îthe wa mwana kîrimû ndarî gîkeno.

²² Mwîrî wa mûndû mûkeni wîkaraga ûrî na vinya, nwatî mwîrî wa mûndû ûrîa wîkaraga na kîeva nîûthiraga vinya.

²³ Mûndû mwaganu ocaga îvaki na nthitho, nîguo ndakarûmîrîre kîvooto.

²⁴ Mûndû mûûgî eciragia maûndû na ûûgî, nwatî mûndû kîrimû, eciragia maûndû atarî na mworoto.

²⁵ Mwana kîrimû atûûragia îthe na kîeva, na agatûûria ng'ina ûrîa wamûciarire na marûrû.

²⁶ Gûtiagîrîrîte kûverithia mûndû ûtarî na mavîtia, rîrîa andû matarî na mavîtia makûverithua, kîvooto gîtirûmagîrîrwa.

²⁷ Mûndû mûûgî ndaragia mûno, na mûndû mûûgî nîakiragîrîria.

²⁸ Wana mûndû mûritu akirîte onekanaga arî mûûgî, na rîrîa atakwaria onekanaga arî na ûûgî.