Nthi 15 - ÎVUKU RÎA ÛVORO MWARO

¹ Gûcokia ûndû na ûvoreri nî kûthiragia marakara, nwatî kûgûkia mûndû kûretage marakara.

² Andû aûgî maragia maûndû marî na ûmenyo, nwatî irimû ciaragia maûndû matarî vata.

³ Ngai-Mûnene onaga kûndû kuonthe; nîonaga rîrîa andû mareka maûndû macûku na rîrîa mareka maûndû maro.

⁴ Ciugo cia ûvoreri nîta mûtî wa mwoyo, nwatî ciugo cia waganu nîitûmaga mûndû akue ngoro.

⁵ Mûndû kîrimû nîareganaga na kîrîra Kîam îthe; nwatî mûndû ûrîa wîtîkagîra rîrîa akûrutwa mavîtia nî ethagîrwa arî mûûgî.

⁶ Andû arîa athingu nîmaigaga ûtonga wao, nwatî indo cia andû arîa aganu nîithiraga rîrîa thîna yaûka.

⁷ Andû arîa aûgî maragia maûndû marî na ûmenyo, nwatî tî arîa irimû.

⁸ Ngai-Mûnene nîakenagua nî mavoya ma andû arîa athingu, nwatî nîathûrîte magongoona marîa arutagîrwa nî andû arîa aganu.

⁹ Ngai-Mûnene nîathûrîte mîthiîre ya andû arîa aganu, nwatî nîendete arîa mekaga maûndû ma ûthingu.

¹⁰ Andû arîa matiganagîria njîra îrîa ya ma nîmakaaverithua mûno; mûndû ûrîa ûtendaga kûrutwa mavîtia nîagaakua.

¹¹ Ethîrwa Ngai-Mûnene nîonaga ûrîa kwa arîa akuû gwîkariî, na ma nîonaga ûrîa ngoro cia andû ciîkariî.

¹² Andû arîa etîi matiendaga kûrutwa mavîtia; matiûragia ûtaaro kûrî andû arîa aûgî kûrî o.

¹³ Andû marî na gîkeno, nî mathekaga, nwatî marî arakaru monekaga marî na kîeva.

¹⁴ Andû arîa aûgî nîmacaragia ûmenyo, nwatî andû arîa irimû meganagîra na ûrimû wao.

¹⁵ Andû arîa athîni vîndî cionthe matûûraga na thîna, nwatî andû arîa akenu vîndî cionthe matûûraga ta marî na kîrugo.

¹⁶ Nîkava kwîthîrwa ûrî mûthîni na wîtigîrîte Ngai-Mûnene, gûkîra gûtonga na wîthîrwe na thîna.

¹⁷ Nîkava kûrîcanîra manyenyi andû marî na wendo, gûkîra kûrîcanîra ndegwa noru andû marî na ûthû.

¹⁸ Mûndû wa kûrakara na îvenya nîatûmaga kûgîe na ngucanio, nwatî mûndû ûrîa ûtarakaraga na îvenya nîathiragia ngarari.

¹⁹ Mûndû kîgûûta ethagîrwa ecûrîtwe nî mathîna, nwatî mûndû mwîvokeku ndonaga thîna.

²⁰ Mwana mûûgî nîatûmaga îthe akene, nwatî mwana kîrimû nîanyararaga ng'ina.

²¹ Mûndû kîrimû nîakenagua nî ûrimû wake, nwatî mûndû mûûgî ekaga maûndû marîa magîrîru.

²² Mîvango nîcûkaga varîa vatarî na ûtaarani, nwatî varîa varî na ataarani eengî mîvango nîîvucaga.

²³ Kuga ûndû ûrîa mwagîrîru nî gûtûmaga mûndû agîe na gîkeno, na kuga ûndû vîndî îrîa mbagîrîru nî ûndû mwaro.

²⁴ Njîra ya andû arîa aûgî îmaviraga mwoyorî, nîguo maûrîre gûtonya kwa arîa akuû.

²⁵ Ngai-Mûnene nîomomoraga mîciî ya andû arîa etîi, nwatî nîagitagîra indo cia aka a ndigwa.

²⁶ Ngai-Mûnene nîathûrîte meciria ma andû arîa aganu, nwatî nîakenagua nî ciugo cia andû arîa atheru.

²⁷ Andû arîa mendaga kûgîa ûtonga na njîra îtarî mbagîrîru matûmaga mîciî yao îgîe na thîna, nwatî andû arîa mathûrîte mavaki nî matûûraga îvinda îraca.

²⁸ Andû arîa athingu nîmeciragia mbere ya mauga ûndû. Nwatî andû arîa aritu maragia matambîte gwîciiria.

²⁹ Ngai-Mûnene nîwîgucaga mavoya ma andû arîa athingu, nwatî ndathikagîrîria andû arîa aganu.

³⁰ Ûthiû mûkenu nîûtûmaga ngoro îcanjamûke, nayo ndûmîrîri mbaro nîîtûmaga mûndû egue waro.

³¹ Mûndû ûrîa ûthikagîrîria rîrîa akûrutwa mavîtia nîekaranagia na andû arîa aûgî.

³² Mûndû ûrîa ûregaga gûtaarwa enyararaga ke mwene, nwatî mûndû ûrîa wîtîkagîra kûrutwa mavîtia nîagîcaga na ûmenyo.

³³ Gwîtigîra Ngai-Mûnene nî kûgîa na ûûgî, na kwînyivia nîkuo gûtûmaga mûndû agîe na ngumo mbaro.