Nthi 14 - ÎVUKU RÎA ÛVORO MWARO

¹ Mûndûmûka mûûgî nîatumaga mûciî wake, nwatî mûndûmûka kîrimû atharagia mûciî wake na njara ciake ke mwene.

² Mûndû ûrîa ûrî mîthiîre mîrûngîrîru nîetigîrîte Ngai-Mûnene; nwatî ûrîa ûtarî mwîvokeku nîamûnyararaga.

³ Mîario ya mûndû kîrimû nîyo îmûverithagia, nwatî mîario ya andû aûgî nîîmagitagîra.

⁴ Mûciî ûtarî ndegwa cia kûrîma makûmbî matiîthagîrwa marî na irio, nwatî mûciî ûrîa ûrî ng'ombe cia kûrîma kûrî irio nyîngî.

⁵ Mûira mwîvokeku vîndî cionthe aragîa ûvoro wa ma, nwatî mûira ûtarî mwîvokeku aragia maveeni matheri.

⁶ Andû arîa etîi macaragia ûûgî na matiwonaga, nwatî andû arîa aûgî mataûkagîrwa nî maûndû na îvenya.

⁷ Thengutîra kîrimû; nîûndû gûtirî ûndû ûngîmenya kuumana na kîo.

⁸ Mûndû mûûgî nîamenyaga ûrîa angîka, nwatî kîrimû kîîvenagia na ngoro atî nîgîcî.

⁹ Andû arîa irimû matimakaga rîrîa mevîtie, nwatî Ngai nîarathimaga andû arîa agîrîru.

¹⁰ Mûndû nîke ûmenyaga thîna wake ke mwene. Gûtirî mûndû ûngîmenya ûrîa mûndû wîngî akwîgua.

¹¹ Mûciî wa mûndû mwaganu nîûkomomorwa, nwatî mûciî wa mûndû mwagîrîru nîûgîcaga vinya.

¹² Kûrî njîra mûndû onaga takwa îrî mbagîrîru, nwatî mûthiiarî îviraga mûndû gîkuûrî.

¹³ Mîtheko nîîthithaga kîeva ngororî, nwatî rîrîa gîkeno Kîamthira kîeva nî gîtigagwa.

¹⁴ Andû arîa acûku makaarîvwa na kîrîa kîmagîrîrîte. Nao andû arîa aro makaarîvwa kûringana na ciîko ciao.

¹⁵ Mûndû kîrimû etîkagia maûndû monthe, nwatî mûndû mûûgî nîaroragia kûrîa athiîte.

¹⁶ Mûndû mûûgî nîwîmenyagîrîra na nîaûragîra maûndû macûku, nwatî mûndû kîrimû ndamakaga na ekaga maûndû na îvenya.

¹⁷ Mûndû ûrîa ûrakaraga na îvenya arûthaga maûndû na ûrimû, nwatî mûndû mûûgî nî akiragîrîria.

¹⁸ Andû arîa irimû magaaga ûrimû, nwatî andû arîa aûgî nîmavecagwa ûmenyo.

¹⁹ Andû arîa acûku nîmakenamîrîra mbere ya andû arîa athingu, na nîmakaavoya ûtethio kuuma kûrî o.

²⁰ Mûndû mûthîni nîamenetwe nginya nî andû arîa mariganîtie nake, nwatî gîtonga kîrî arata eengî.

²¹ Mûndû ûrîa ûnyararaga mûndû ûrîa mariganîtie nake nî mwîvia, nwatî mûndû ûrîa wîgucagîra mûthîni ntha nîarathimagwa.

²² Andû arîa mavangaga gwîka maûndû macûku nî mavîtagia. Arîa mavangaga gwîka maûndû maro nî mavecagwa gîtîîo na makevokwa nî andû.

²³ Kûruta wîra wa wonthe na kîîo nî kûretage umithio, nwatî mîario mîtheri îretage ûthîni.

²⁴ Andû arîa aûgî nîmavecagwa ûtonga, nwatî andû arîa irimû mamenyekaga nî ûrimû wao.

²⁵ Mûndû ûrîa ûvecanaga ûira wa ma nîavonokagia mîoyo, nwatî mûndû ûrîa waragia maveeni nî mûcukanîrîri.

²⁶ Mûndû ûrîa wîtigîrîte Ngai-Mûnene ndetigagîra, nacio ciana ciake nîikaagîa na kûndû gwa kûûrîra.

²⁷ Gwîtigîra Ngai-Mûnene nîta kîthima Kîam mwoyo, na nî gîtûmaga mûndû aûrîre mîtego ya gîkuû.

²⁸ Riiri wa mûthamaki wonanagua nî wîngî wa andû arîa athaga, nwatî atarî nao ûthamaki wake nîkwa ûthiraga.

²⁹ Mûndû ûrîa ûtarakaraga na îvenya arî ûtaûku mwîngî, nwatî mûndû ûrakaraga na îvenya onanagia ûrîa arî mûritu.

³⁰ Meciria marî na thayû matûmaga mwîrî ûgîe na ûgima, nwatî wîru nîta woru ûrî mavîndîrî.

³¹ Mûndû ûrîa ûvinyagîrîria athîni nîarumaga Ngai ûrîa wamaûmbire, nwatî mûndû ûrîa wîgucagîra athîni ntha nîakumagia Ngai.

³² Andû arîa aganu macûkangagua nî ciîko ciao njûku, nwatî andû arîa athingu magitagîrwa nî wîvokeku wao.

³³ Ûûgî ûtûûraga meciriarî ma andû arîa marî ûmenyo, nwatî ûûgî ndwîcîkene nî andû arîa aritu.

³⁴ Ûthingu nîûtûmaga vûrûri ûgîe îgweta, nwatî mevia nî maconorithagia vûrûri wa wonthe.

³⁵ Mûthamaki nîakenagua nî ndungata irîa irutaga wîra na ûûgî, nwatî nîaverithagia ndungata irîa irutaga wîra ûrîa ûtagîrîrîte.