Nthi 13 - ÎVUKU RÎA ÛVORO MWARO

¹ Mwana mûûgî nîathikagîrîria rîrîa agûtaarwa nî îthe, nwatî mûndû mwîtîi ndathikagîrîria rîrîa akûrutwa mavîtia.

² Mûndû mwaro anyitaga maûndû maro nîûndû wa ciugo irîa aragia, nwatî acukanîrîri meriragîria gwîka andû arîa engî naaî.

³ Mûndû ûrîa ûmenyagîrîra mîario yake nîagitagîra mwoyo wake. Mûndû ûrîa ûtamenyagîrîra mîario yake ecûkangagia ke mwene.

⁴ Kîgûûta kîîriragîria kîndû na gîtikîonaga, nwatî mûndû ûrî kîîo nîagîcaga na indo nyîngî.

⁵ Andû arîa athingu nîmathûrîte maveeni, nwatî andû arîa aganu mekaga maûndû ma nthoni na gîconoko.

⁶ Ûthingu nîûgitagîra mûndû ûrîa ûrî mîthiîre mîagîrîru, nwatî mevia nîmagwîthagia andû arîa aganu.

⁷ Andû amwe metucaga itonga, nwatî matirî kîndû. Engî metucaga athîni, nwatî marî ûtonga mwîngî.

⁸ Gîtonga gîtûmagîra ûtonga wakîo kûgitîra mwoyo wakîo, nwatî mûthîni ndarî kîndû angîgitîra mwoyo wake nakîo.

⁹ Andû arîa athingu mekariî ta ûtheri ûrîa ûkengaga mûno, nwatî andû arîa aganu mekariî ta taa îkîvora.

¹⁰ Andû arîa etîi matûmaga kûgîe na ngucanio. Nwatî arîa mathikagîrîria mataaro nîmagîcaga ûûgî.

¹¹ Ûtonga wa kûgîa na îvenya ûthiraga na îvenya, nwatî indo irîa mûndû agîîte kavora kavora nîithiîcaga na mbere kwongerereka.

¹² Mwîrîgîrîro ûngîkara mûno ûtarî mûvingu mûndû nîathiragwa nî vinya, nwatî mwîrîgîrîro ûngîvinga nîwîkagîra mûndû gîkeno.

¹³ Mûndû ûrîa wîraga mataaro ecaragîria thîna ke mwene, nwatî mûndû ûrîa ûtîîaga maathani ma Ngai nîavecagwa kîveo.

¹⁴ Kîrîra Kîam mûndû mûûgî nîta kîthima Kîam mwoyo, nî gîtûmaga mûndû aûrîre mîtego ya gîkuû.

¹⁵ Ûûgî nîûvecagwa gîtîîo, nwatî andû arîa matarî evokeku marî njîrarî ya kûthira.

¹⁶ Mûndû mûûgî arûthaga maûndû na njîra ya ûûgî, nwatî mûndû kîrimû athiîcaga akîonanagia ûrimû wake.

¹⁷ Mûnjaama mûcûku atûmaga andû matonye thînarî, nwatî mûnjaama mwîvokeku nîatûmaga kûgîe na thayû.

¹⁸ Ûthîni na gîconoko inyitaga mûndû ûrîa ûregaga kîrîra. Mûndû ûrîa ûthikagîrîria akîrutwa mavîtia nî atîîagwa.

¹⁹ Mûndû nîakenaga rîrîa anyita kîrîa erîgîrîrîte; nwatî andû arîa aritu nîmaregaga gûtiga maûndû marîa macûku.

²⁰ Mûndû ûrîa ûthiîcanagia na andû aûgî nîaûvîgaga, nwatî kûgîa ûrata na irimû kûviraga mûndû thînarî.

²¹ Mathîna marûmanagîrîra na mwîvia kûndû kuonthe, nwatî andû arîa athingu nîmakaarîvwa na maûndû maro.

²² Mûndû mwaro nîatigagîra njiarwa ciake îgai, nwatî ûtonga wa andû arîa evia ûthiîcaga na andû arîa athingu.

²³ Mîgûnda ya andû arîa athîni nwa yume irio nyîngî, nwatî andû arîa matarûmagîrîra kîvooto nîmagiragia îrîmwe.

²⁴ Mûndû ûrîa ûtaverithagia mwana wake, ndamwendete, nwatî ûrîa wendete mwana wake nîamûverithagia.

²⁵ Andû arîa athingu methagîrwa marî na irio cia kwîgana, nwatî andû arîa aganu vîndî cionthe methagîrwa marî avûtu.