Nthi 12 - ÎVUKU RÎA ÛVORO MWARO

¹ Mûndû ûrîa ûkenaga rîrîa akûrutwa mavîtia nî mûûgî, nwatî mûndû ûrîa ûthûrîte kûrutwa mavîtia nî kîrimû.

² Ngai-Mûnene nîakenagua nî andû arîa aro, nwatî arîa mavangaga maûndû macûku nîamatucagîra atî nî evia.

³ Waganu ndûtûmaga mûndû ekindîrie, nwatî andû arîa athingu mekaraga matakwenyenya.

⁴ Mûndûmûka mwaro nî nthûmbî ya mûthuuriwe, nwatî mûndûmûka ûrîa ûconorithagia mûthuuriwe nîta woru ûrî mavîndîrî ma mûthuuriwe.

⁵ Meciria ma andû arîa athingu nî ma kîvooto; nwatî mataaro ma andû arîa aganu nî ma maveeni.

⁶ Ciugo cia andû arîa aganu nî cia ûûragani, nwatî ciugo cia andû arîa athingu nî cia kûvonokania.

⁷ Andû arîa aganu nîmacûkangagua makathira, nwatî mûciî wa arîa athingu nîwîvandaga.

⁸ Mûndû mûûgî nîakumagua nî andû arîa engî, nwatî mûndû kîrimû nîkwa anyararagwa.

⁹ Nî kava mûndû ûtarî indo nyîngî na nîwîyonagîra gîa kûrîa gûkîra mûndû ûrîa wîtucaga arî na indo na ndonaga gîa kûrîa.

¹⁰ Andû arîa athingu marî ntha na nyamû ciao irîa marîthagia, nwatî andû arîa aganu matirî ntha na nyamû ciao.

¹¹ Andû arîa marutaga wîra na kîîo mîgûndarî yao nîmagîcaga irio cia kwîgana, nwatî andû arîa marûmagîrîra maûndû matarî na umithio nî irimû.

¹² Andû arîa aganu meriragîria maûndû marîa maumanaga na maûndû macûku, nwatî andû arîa athingu mevandaga ki.

¹³ Andû arîa aganu manyitagwa nî ciugo ciao o ene, nwatî andû arîa athingu nîmaûragîra thîna.

¹⁴ Mûndû avecagwa kîveo kûringana na ûrîa aragia; na mûndû anyitaga kîrîa kîmwagîrîrîte kuumana na wîra wa njara ciake.

¹⁵ Vîndî cionthe andû arîa aritu meciragia mareka ûrîa kwagîrîrîte, nwatî andû arîa aûgî nîmathikagîrîria ûtaaro.

¹⁶ Irimû imenyekaga wa rîo, atî nî ndakaru, nwatî andû arîa aûgî matithikagîrîria irumi.

¹⁷ Mûndû ûrîa waragia ûma arutaga ûira wa ma, nwatî mûndû ûrîa ûrutaga ûira wa maveeni aragia maveeni.

¹⁸ Ciugo njûku iguraragia ta rûviû, nwatî ciugo cia mûndû mûûgî nîivonagia kîronda.

¹⁹ Ûma ûtûûraga tene na tene, nwatî maveeni mekaraga kavinda kanini.

²⁰ Andû arîa mavangaga maûndû macûku mecûrîtwe nî maveeni ngororî ciao, nwatî arîa mavangaga maûndû maro marî gîkeno.

²¹ Andû arîa athingu matinyitagwa nî maûndû macûku, nwatî arîa aganu methagîrwa mecûrîtwe nî mathîna.

²² Ngai-Mûnene nîathûrîte andû arîa mavenanagia, nwatî nîakenagua nî arîa evokeku.

²³ Andû arîa aûgî matiendaga kwonania atî nî aûgî, nwatî irimû nîcianagîrîra ûrimû wa cio.

²⁴ Andû arîa marutaga wîra na kîîo nîmakaathana, nwatî igûta nîikaarutithua wîra na vinya.

²⁵ Gûtangîka ngororî nîgûtûmaga mûndû athirwe nî gîkeno, nwatî kiugo Kîamro nîgîtûmaga mûndû akene.

²⁶ Mûndû mûthingu nîwonagîrîria mûndû ûrîa wîngî njîra, nwatî njîra ya mûndû mwaganu nîîmûvîtithagia.

²⁷ Mûndû kîgûûta ndanyitaga kîrîa akwenda, nwatî mûruti wîra na kîîo nîagîcaga na ûtonga.

²⁸ Ûthingu nî njîra ya gûtûûra mwoyo, nwatî waganu nî njîra ya gîkuû.