Ntha 8 - ÎVUKU RÎA ÛVORO MWARO

Ciûra

¹ Ngai-Mûnene nîwacokire akîra Musa atîrî, “Thiî kûrî mûthamaki na ûmwîre Ngai-Mûnene augîte atîrî, ‘Tiga andû akwa mathiî nîguo makangooce.

² Ethîrwa nîûkûrega, nîngûverithia vûrûri waku na njîra ya gûtûma wîcûrwe nî ciûra.

³ Ciûra nîigeecûra rûnjîrî rwa Nailo na imwe ciume kuo ithiî gwaku nyomba. Nyomba yaku ya kûmama, ûrîrî waku, nyomba cia anene aku na cia andû aku, wana nginya kûrîa kûrugagîrwa irio na indorî irîa ikimagîrwa mûtu nîigeecûrwa nî ciûra.

⁴ We andû aku, anene onthe aku nîmûkaarûgagîrwa nî ciûra ikamûtamba.’ ”

⁵ Ngai-Mûnene nîwerire Musa atîrî, “Îra Aroni oce mûragi wake na aûkîrîrie îgûrû rîa nyûnjî, mîtaro ya manjî na maria ma manjî atûme ciûra ciume rûnjîrî ithiî ciîcûre vûrûri wonthe wa Misiri.”

⁶ Kwoguo Aroni nîwakûnjûrire njara agîûkîrîria mûragi wake îgûrû rîa manjî monthe ma Misiri, nacio ciûra nîciaumire igîcûra vûrûri wonthe wa Misiri.

⁷ Nwatî andû arîa maringaga ciama nîmaaringire ciama wa nao na magîtûma ciûra igîe kûu vûrûrirî wa Misiri.

⁸ Nake mûthamaki nîwacokire agîta Musa na Aroni na akîmera atîrî, “Thaithani Ngai-Mûnene arute ciûra ino kuuma kûrî nie na kûrî andû akwa, nanie nî ngûrekereria andû a Isiraeli mathiî makarutîre Ngai-Mûnene kîgongoona.”

⁹ Musa nîwacokerie mûthamaki atîrî, “Nie nîngûkena ngîvoya nîûndû waku. Uga nî vîndî îrîkû ûkwenda ngaamûthaitha nîûndû waku, anene aku na andû aku. Nacio ciûra cionthe nîikaathengutua kûrî mue itigare rûnjîrî rwa Nailo tu.”

¹⁰ Mûthamaki nîwacokirie atîrî, “Ûkaamvoera rûyû.” Musa nîwacokire akiuga atîrî, “Nîngeka ûrîa waûria na nîûkaamenya atî gûtirî Ngai wîngî tiga Ngai-Mûnene, Ngai wetû.

¹¹ We, anene aku wana andû aku, ciûra cionthe nîikauma kûrî mue, nwatî nîigaatigara rûnjîrî rwa Nailo.”

¹² Kwoguo Musa na Aroni nîmaathiîre makiuma kûrî mûthamaki na Musa akîvoya Ngai-Mûnene athengutie ciûra irîa aaretithîrîtie mûthamaki.

¹³ Nake Ngai-Mûnene nîwekire ûrîa Musa aamûvoire. Ciûra cionthe irîa ciarî nyomba na irîa ciarî nja na mîgûndarî igîkua.

¹⁴ Nao andû a Misiri nîmaaicokanîrîrie vamwe irûndo nene, na vûrûri wonthe ûkînunga nîûndû wacio.

¹⁵ Nwatî rîrîa mûthamaki oonire atî ciûra nîikuîte, nîwaûmire ngoro rîngî wata ûrîa Ngai-Mûnene aaugîte na akîrega kûthikîrîria Musa na Aroni.

Rwagî

¹⁶ Ngai-Mûnene nîwacokire akîra Musa atîrî, “Îra Aroni aringe nthî na mûragi wake, nîguo rûkûngû ruonthe rwa vûrûri wa Misiri rûtuîke rwagî.”

¹⁷ Kwoguo Aroni nîwaringire nthî na mûragi wake. Naruo rûkûngû ruonthe rwa vûrûri wa Misiri rûkîgarûrûka rûgîtuîka rwagî na rûkîûmbîrîra andû na nyamû.

¹⁸ Nao andû arîa maarî na ûûgî wa kûringa ciama a Misiri, nîmaageririe ciama ciao nîguo kûgîe rwagî nwatî makîremwa. Rwagî rwecûrîte kûndû kuonthe.

¹⁹ Nao andû acio maaringaga ciama a Misiri nîmeerire mûthamaki atîrî, “Nî Ngai wîkîte ûndû ûyû.” Na wata ûrîa Ngai-Mûnene aaugîte, mûthamaki nîwatuîkire mûmû ngoro na akîrega kûthikîrîria Musa na Aroni.

Ngi

²⁰ Ngai-Mûnene nîwacokire akîra Musa atîrî, “Rûyû kîraûko tene ûgaaûkîra ûthiî weterere mûthamaki wa Misiri akîthiî rûnjîrî na ûmwîre atîrî, ‘Tiga andû akwa mathiî nîguo makangooce.

²¹ Na ethîrwa tîwîtîkîra, nîngûkûretithîria ngi nyîngî mûno. Nacio ngi icio ikûmbîrîre na ciûmbîrîre anene aku wana andû aku na icoke itonye nyombarî ciaku na nyombarî cia andû a Misiri na vûrûri wonthe wîcûrwe nî ngi.

²² Nwatî Gosheni kûrîa andû akwa matûûraga, gûtikethîrwa kûrî na ngi. Ûndû ûcio nîguo ûgaatûma ûmenye atî Nie Ngai-Mûnene nînie nîraruta wîra vûrûrirî ûyû.

²³ Rûyû nîrîo ngeekîra ngûrani îno kûrî andû a Misiri na andû akwa.’ ”

²⁴ Nake Ngai-Mûnene nîwatûmire mîrumbî mînene ya ngi nyomba kwa mûthamaki na nyombarî cia anene ake na cia andû ake. Naguo vûrûri wonthe wa Misiri nîwacûkangire nîûndû wa ngi.

²⁵ Mûthamaki wa Misiri nîwacokire agîtûmana Musa na Aroni metwe. Nake nîwamerire atîrî, “Thiî mûkarutîre Ngai wenyu kîgongoona mûrî gûkû vûrûrirî ûyû.”

²⁶ Nake Musa nîwacokerie mûthamaki atîrî, “Gûtiagîrîrîte kûrutîra Ngai-Mûnene, Ngai îgongoona andû a Misiri makîonaga nîûndû nwa marakare. Andû a Misiri mangîrakara nî îgongoona rîu nwa matûrive na mathiga tûgakua.

²⁷ Tue nwanginya tûthiî rûgendo rwa mîthenya îthatû werûrî nîguo tûkarutîre Ngai-Mûnene, Ngai wetû îgongoona ta ûrîa ke aatwathire.”

²⁸ Kwoguo mûthamaki wa Misiri nîwamerire atîrî, “Nîngûmwîtîkîria mûthiî mûkarutîre Ngai-Mûnene, Ngai wenyu îgongoona werûrî ethîrwa tîmûthiî kûraca. Mvoerani.”

²⁹ Nake Musa nîwaugire atîrî, “Nathiî nîngûvoya Ngai-Mûnene atî rûyû ngi ikaauma kûrî we, kûrî anene aku na ciume kûrî andû aku. Nwatî ndûgatûvenie rîngî na ndûkaagirie andû a Isiraeli mathiî kûrutîra Ngai-Mûnene îgongoona.”

³⁰ Kwoguo Musa nîwaumire kwa mûthamaki, akîthiî na akîvoya Ngai-Mûnene.

³¹ Nake Ngai-Mûnene nîwekire wata ûrîa Musa aamûvoire. Nacio ngi nîciaumire kûrî mûthamaki, kûrî anene ake na kûrî andû ake. Gûtirî ngi wana îmwe yatigarire.

³² Nwatî mûthamaki wa Misiri nîwaûmirie ngoro. Îvinda rîu wa narîo nîwaregire gwîtîkîria andû a Isiraeli mathiî.