Ntha 7 - ÎVUKU RÎA ÛVORO MWARO

¹ Ngai-Mûnene nîwerire Musa atîrî, “Nie nîngûtua ta ûrî Ngai varî mûthamaki. Nake Aroni mûrwanyûkwe nîakaarîria mûthamaki ta arî mûrathi waku.

² Îra Aroni maûndû monthe marîa ngûkwatha, nake nîakeera mûthamaki wa Misiri areke andû a Isiraeli maume vûrûrirî wake.

³ Nwatî nîngûtûma ngoro ya mûthamaki yûme na wana nîngîringa ciama na monanie morirû meengî atîa kûu vûrûrirî wa Misiri.

⁴ Mûthamaki wa Misiri ndakaamûthikîrîria. Nanie nîngûretera andû a Misiri îvera rînene na ndongorie andû akwa ciana cia Isiraeli ciume vûrûri wa Misiri. Nîngeka maûndû manene nîguo nduîre vûrûri wa Misiri.

⁵ Rîrîa ngaakûnjûra njara yakwa îmaûkîrîre na ndute andû a Isiraeli vûrûrirî wao, nîrîo andû a Misiri makaamenya atî nie nînie Ngai-Mûnene.”

⁶ Nao Musa na Aroni nîmeekire ûrîa Ngai-Mûnene amaathîte meke.

⁷ Kavinda kau maaragia na mûthamaki wa Misiri Musa aarî na mîaka mîrongo înana nake Aroni aarî na mîaka mîrongo înana na îthatû.

Mûragi wa Aroni

⁸ Ngai-Mûnene nîwerire Musa na Aroni atîrî,

⁹ “Ethîrwa mûthamaki nwa ende mwîmenyithanie kûrî ke na njîra ya kûringa Kîamma, thiî ûkera Aroni oce mûragi wake na awikie vau nthî mbere ya mûthamaki. Mûragi ûcio nîûgaatuîka njoka.”

¹⁰ Kwoguo Musa na Aroni nîmaathiîre kûrî mûthamaki na magîka wata ûrîa Ngai-Mûnene amaathîte. Aroni nîwaikirie mûragi wake nthî vau mbere ya mûthamaki na anene ake. Naguo nîwagarûrûkire ûgîtuîka njoka.

¹¹ Nake mûthamaki nîwetire andû ake arîa aûgî na aringi ciama. Nao nîmaaringire ciama wata Aroni.

¹² Nîmaaikirie mîragi yao nthî vau mbere ya mûthamaki, nayo îkîgarûrûka îgîtuîka njoka. Nwatî mûragi wa Aroni nîwameririe mîragi yao.

¹³ Nwatî mûthamaki, eekarire aûmîtie ngoro na ndaathikîrîria Musa na Aroni wata ûrîa Ngai-Mûnene aaugîte.

Misiri nîkwagîre mathîna

¹⁴ Ngai-Mûnene nîwacokire akîra Musa atîrî, “Mûthamaki wa Misiri nîaûmîtie ngoro mûno na nîararega kûrekereria andû a Isiraeli mathiî.

¹⁵ Kwoguo rûyû kîraûko, ûgooca mûragi waku ûrîa wagarûrûkire ûgîtuîka njoka ûthiî naguo rûtererî rwa rûnjî rwa Nailo. Thiî ûgeeterera mûthamaki wa Misiri vau nîûndû nîakaathiî rûnjîrî rwa Nailo kîraûko.

¹⁶ Ûkeera mûthamaki atîrî, ‘Ngai-Mûnene, Ngai wa Ahibirania nîke ûndûmîte kûrî we nîguo ûrekererie andû ake mathiî, nîguo makamûgooce marî werûrî. Nwatî nginya rîu we ndûrî ûrathîka.

¹⁷ Ngai-Mûnene auga atî nîûkûmenya ke nîke ûû na njîra ya ûndû ûrîa agwîka. Nie nîngûringa manjî ma rûnjî rwa Nailo na mûragi ûyû na nîmakûgarûrûka matuîke nthakame.

¹⁸ Nthamaki irîa irî rûnjîrî rwa Nailo nîigûkua na rûnjî rwa Nailo rûnunge mûno, nao andû a Misiri matikaavota kûnyua manjî ma ruo.’ ”

¹⁹ Nake Ngai-Mûnene nîwerire Musa atîrî, “Îra Aroni oce mûragi wake na akûnjûre njara yake îgûrû rîa nyûnjî cionthe cia Misiri, mîtaro ya manjî, maria monthe nîguo matuîke nthakame. Nakuo nîgûkaagîa nthakame vûrûri wonthe wa Misiri, indorî irîa ciîkagîrwa manjî cia mbaû wana cia mathiga.”

²⁰ Musa na Aroni nîmeekire wata ûrîa Ngai-Mûnene amaathire. Methorî ma mûthamaki na anene ake, Aroni nîwaûkîrîrie mûragi wake na akîringa manjî ma rûnjî rwa Nailo na manjî monthe nîmaagarûrûkire magîtuîka nthakame.

²¹ Nthamaki irîa ciarî rûnjîrî rwa Nailo nîciakwire, na manjî makînunga naaî mûno. Nao andû a Misiri nîmaaremirwe nî kûnyua manjî kuuma rûnjîrî rwa Nailo. Kûndû kuonthe vûrûrirî wa Misiri gwecûrîte nthakame.

²² Nao andû arîa maarî na ûûgî wa kûringa ciama a mûthamaki nîmaaringire ciama wanao. Nake mûthamaki nîwaûmirie ngoro wata mbere. Mûthamaki nîwaregire kûthikîrîria Musa na Aroni.

²³ Vandû va ûguo, mûthamaki nîwagarûrûkire na akîthiî gwake nyomba atagwîciria ûvoro ûcio.

²⁴ Nao andû onthe a Misiri nîmeenjire ithima ndeererî cia rûnjî rwa Nailo nîûndû manjî kuuma rûnjîrî rwa Nailo matingîanyuîkire.

²⁵ Na mîthenya mûgwanja nîyathirire kuuma Ngai-Mûnene aringa rûnjî rwa Nailo.