Ntha 6 - ÎVUKU RÎA ÛVORO MWARO

¹ Nwatî Ngai-Mûnene nîwerire Musa atîrî, “Rîu nîûkwona ûrîa ngwîka mûthamaki wa Misiri. Nîûndû wa ûvoti wakwa nîakûrekereria andû akwa mathiî. Nîngûtûma amarutûrûre vûrûrirî wake na vinya.”

Ngai nîwetire Musa

² Nake Ngai nîwerire Musa atîrî, “Nie nî nie Ngai-Mûnene.

³ Nînaumîrîre Iburahimu, Isaka na ngiumîrîra Jakovu ta Ngai Mwene Vinya Wonthe, nwatî ndiemenyithania kûrî o na njîra ya rîîtwa rîakwa rîrîa rîtheru, Ngai-Mûnene.

⁴ Wana nînarûthire kîrîkanîro nao ngiuga nîngaamava vûrûri wa Kanaani, vûrûri ûrîa maatûûraga ta ageni.

⁵ Rîu nîmbîguîte mûcayo wa andû a Isiraeli arîa matuîtwe ngombo nî andû a Misiri. Nîndirikanîte kîrîkanîro gîakwa.

⁶ Kwoguo îra andû a Isiraeli nie nîramera atî, ‘Nie nî Nie Ngai-Mûnene. Nie nîngûmûvonokia na nîmûrekererie muume ûkomborî wa andû a Misiri. Nîngeka ûndû mûnene na vinya wakwa nîguo ndetere andû a Misiri îvera, na nîngaamûvonokia.

⁷ Nîngaamûtua andû akwa, nanie nduîke Ngai wenyu. Mue nîmûkaamenya atî nie nî nie Ngai-Mûnene, Ngai wenyu vîndî îrîa ngaamûruta ûkomborî vûrûrirî wa Misiri.

⁸ Nanie nîngaamûvira vûrûrirî ûrîa nerîîre Iburahimu, Isaka na Jakovu atî nîngaamava na nîngaamûva guo ûtuîke wenyu. Nie nî Nie Ngai-Mûnene.’ ”

⁹ Nake Musa nîwerire andû a Isiraeli maûndû mau monthe, nwatî matiamûthikîrîria, nîûndû nîmaathirîtue vinya nî ûkombo mûcûku ûrîa maarî naguo.

¹⁰ Nake Ngai-Mûnene nîwacokire akîra Musa atîrî,

¹¹ “Thiî wîre mûthamaki wa Misiri atî nwanginya arekererie andû a Isiraeli mathiî maume vûrûrirî wake.”

¹² Nwatî Musa nîwacokirie atîrî, “Ethîrwa andû a Isiraeli tîmanthikîrîria, nake mûthamaki angînthikîrîria atîa? Nie ndiîcî kwaria waro.”

¹³ Nwatî Ngai-Mûnene nîwathire Musa na Aroni akîmera atîrî, “Îrani andû a Isiraeli na mûthamaki wa Misiri atî nie nînîmwathîte mûtongorie andû a Isiraeli maume Misiri.”

Mûtaratara wa andû a nyomba ya Musa na Aroni

¹⁴ Mama nîmo marîîtwa ma atongoria a nyomba cia Aisiraeli. Reubeni nîke warî îrikithathi rîa Jakovu. Reubeni aarî na anake ana. Nao nî: Hanoku, Palu, Hezoroni, na Karîmi. Acio nîo marî methe ma tene ma mîvîrîga îrîa îtanîtue na marîîtwa mao.

¹⁵ Simeoni aarî na anake atandatû. Nao nî: Jemueli, Jamini, Ohadi, Jakini, Zohari na Shauli. Shauli aarî mwanake wa mûndûmûka ûrîa warî Mûkanaani, nao nîo maarî methe ma tene ma mîvîrîga îrîa îtanîtue na marîîtwa mao.

¹⁶ Lawi aarî na anake athatû. Nao maarî: Gerishoni, Kohathu, na Merari. Acio nîo maarî methe ma tene ma mîvîrîga îrîa îtanîtue na marîîtwa mao. Lawi atûûrire mwoyo mîaka îgana rîmwe rîa mîrongo îthatû na mûgwanja (137).

¹⁷ Gerishoni aarî na anake aîrî. Nao nî: Libuni, na Shimei, kûringana na mîvîrîga yao.

¹⁸ Kohathu aarî na anake ana. Nao nî: Amuramu, Iziharu, Heburoni, na Uzieli. Kohathu atûûrire mwoyo mîaka îgana rîmwe rîa mîrongo îthatû na îthatû (133).

¹⁹ Merari aarî na anake aîrî. Nao maarî Mahili na Mushi. Îno nîyo mîvîrîga ya Lawi kûringana na njiarwa ciao.

²⁰ Amuramu nîwavikirie Jokibedi mwarwang'ina na îthe, na nîwaciarire Aroni na Musa. Amuramu atûûrire mwoyo mîaka îgana rîmwe rîa mîrongo îthatû na mûgwanja (137).

²¹ Iziharu aarî na anake athatû. Nao maarî: Kora, Nefegi, na Zikiri.

²² Uzieli nake aarî na anake athatû. Nao nî: Mishaeli, Elizafani, na Sithiri.

²³ Aroni nîwavikirie Elisheba, mwarî wa Aminadabu na aarî mwarwang'ina na Nahashoni. Nake nîwaciarire Nadabu, Abihu, Eliazaru, na Ithamaru.

²⁴ Kora aarî na anake athatû. Nao maarî: Asiru, Elikana, na Abiasafu. Aya nîo methe ma tene ma mwîrîga wa Kora.

²⁵ Eliazaru, ûmwe wa anake a Aroni nîwavikirie mwîrîtu ûmwe wa erîtu a Putieli. Mwîrîtu ûcio nîwaciarire Finehasi. Aya nîo maarî atongoria a nyomba na mîvîrîga ya mbarî ya Lawi.

²⁶ Aroni na Musa nîo Ngai-Mûnene eerire atîrî, “Tongoriani andû a Isiraeli maume vûrûri wa Misiri.”

²⁷ Nwa o meerire mûthamaki wa Misiri arekererie andû a Isiraeli.

Ngai-Mûnene nîwathire Musa na Aroni

²⁸ Rîrîa Ngai-Mûnene aarîrie Musa arî vûrûrirî wa Misiri,

²⁹ nîwamwîrire atîrî, “Nie nî Nie Ngai-Mûnene. Îra mûthamaki wa Misiri maûndû monthe marîa ngûkwîra.”

³⁰ Nwatî Musa nîwacokerie Ngai-Mûnene atîrî, “We nîwicî atî nie ndicî kwaria waro na mûthamaki tîanthikîrîria.”