Ntha 40 - ÎVUKU RÎA ÛVORO MWARO

Kûrûngamia îgema rîa Ngai-Mûnene na kûrîamûra

¹ Ngai-Mûnene nîwerire Musa atîrî,

² “Mûthenya wa mbere wa mweri wa mbere ûkaarûngamia îgema rîa Ngai-Mûnene.

³ Îgemarî rîu ûkaaiga îthandûkû rîa kîrîkanîro na ûcurie gîtambaa mbere ya îthandûkû rîa kîrîkanîro.

⁴ Ûkaareta metha na ûvange indo ciayo waro îgûrû rîayo, na ûkaareta vandû va kwigîrîrwa taa na wigîrîre taa icio îgûrû rîa vo.

⁵ Ûkaaiga metha ya thaavu ya kîgongoona ya kûvîvîrua ûbani mbere ya îthandûkû rîa kîrîkanîro, na ûcurie gîtambaa gîa kûvinga mûromo wa gûtonya îgemarî.

⁶ Nayo metha ya kîgongoona ya kûvîvîrua matega ûkaamiga mbere ya mûromo wa îgema rîa Ngai-Mûnene.

⁷ Gatagatî ka îgema rîa Ngai-Mûnene na metha ya kîgongoona ûkaaiga kîraî gîa kwîthambîria na wîkîre manjî kuo.

⁸ Ûkaairiga kûthiûrûrûkîria îgema na ûgaacuria gîtambaa mûromorî wa gûtonya kîvarorî.

⁹ “Ûgaacoka woce maguta ma kwamûrana na wamûre îgema wa vamwe na indo cia rîo cionthe. Îgema rîu nîrîgaatuîka rîtheru.

¹⁰ Ûcoke wamûrîre Ngai-Mûnene metha ya kîgongoona ya kûvîvîrua matega wa vamwe na indo ciayo cionthe. Metha îo nîgaatuîka ntheru mûno.

¹¹ Ûtherie kîraî gîa kwîthambîria wanakîo na vandû va gûkigîrîra wata guo.

¹² “Ûcoke wîre Aroni na avîcî ake maûke mûromorî wa îgema rîa Ngai-Mûnene na methambie na manjî,

¹³ na wîkîre Aroni nguo cia ûthînjîri-Ngai ûmwamûre na ûmûtherie nîguo andungatagîre arî mûthînjîri-Ngai.

¹⁴ Ûkaareta avîcî ake wa nao na ûmekîre nguo ndaca.

¹⁵ Ûcoke ûmamûre wata ûrîa wamûrire îthe, nîguo mandungatagîre marî athînjîri-Ngai. Wamamûra magatûûraga mandungatagîra marî athînjîri-Ngai nginya njiarwa ciao cionthe.”

¹⁶ Musa nîwekire maûndû monthe wata ûrîa Ngai-Mûnene aamwathîte.

¹⁷ Kwoguo mûthenya wa mbere wa mweri wa mbere mwakarî wa kaîrî, îgema rîa Ngai-Mûnene nîrîarûngamirue.

¹⁸ Musa nîwarûngamîrîre wîra wa kûrûngamia îgema rîa Ngai-Mûnene, agîkîra itina na agîkîra mîtî yarîo ya kûnyitîrîra, agîkîra mîkîgo na akîrîrûngamia na itugî ciarîo.

¹⁹ Nîwakunîkire îgema rîa Ngai-Mûnene wata ûrîa Ngai-Mûnene aamwathîte.

²⁰ Nîwacokire agîoca ivengere irîa igîrî cia mathiga na agîciîkîra îthandûkûrî rîa kîrîkanîro. Agîkîra mîtî ya gûkuua îthandûkû icûvîrî ciarîo na akigîrîra gîkunîko îgûrû rîarîo.

²¹ Nîwatonyirie îthandûkû rîa kîrîkanîro îgemarî rîa Ngai-Mûnene agîcuria gîtambaa akîgaania varîa rîarî wata ûrîa Ngai-Mûnene aathîte Musa.

²² Nîwaigire metha îgemarî rîa Ngai-Mûnene mwena wa rûgûrû nja ya gîtambaa.

²³ Nîwacokire akiga mûgate ûrîa wategeretwe Ngai-Mûnene îgûrû rîa metha ya kîgongoona, wata ûrîa Ngai-Mûnene aathîte Musa.

²⁴ Nîwaigire vandû va kwigîrîrwa taa îgemarî rîa Ngai-Mûnene mwena wa îveti, cierekanîrîte na metha ya kîgongoona,

²⁵ na akîmundia taa arî mbere ya Ngai-Mûnene wata ûrîa aamwathîte.

²⁶ Nîwaigire metha ya kîgongoona ya thaavu ndaarî ya îgema rîa Ngai-Mûnene mbere ya gîtambaa

²⁷ na akîvîvîria ûbani mûnungi waro vau metharî ya kîgongoona wata ûrîa Ngai-Mûnene aathîte Musa.

²⁸ Nîwacokire agîcuria gîtambaa mûromorî wa îgema rîa Ngai-Mûnene.

²⁹ Nîwaigire metha ya kîgongoona ya kûvîvîrua matega vau mbere ya mûromo wa îgema rîa Ngai-Mûnene. Nîwacokire akîrutîra matega ma kûvîvua metharî îo na matega ma irio cia mûgûnda wata ûrîa Ngai-Mûnene aamwathîte.

³⁰ Nîwaigire kîraî gîa kwîthambîria gatagatî ka îgema rîa Ngai-Mûnene na metha ya kîgongoona na agîkîra manjî kuo.

³¹ Musa, Aroni, na avîcî ake nîmeethambagîria njara na magûrû kîraîrî kîu

³² rîrîa rîonthe meethagîrwa magîtonya îgemarî rîa Ngai-Mûnene, kana makîthiî metharî ya kîgongoona, wata ûrîa Ngai-Mûnene aamwathîte.

³³ Musa nîwairigîre kîvaro kîrîa Kîamthiûrûrûkîrîtie îgema rîa Ngai-Mûnene vamwe na metha ya kîgongoona na agîcuria gîtambaa mûromorî wa gûtonya kîvarorî, kwoguo akîrîkia wîra wonthe.

Îtu nîrîakunîkîre îgema rîa Ngai-Mûnene

³⁴ Îtu nîrîacokire rîgîkunîkîra îgema rîa Ngai-Mûnene, naguo riiri wa Ngai-Mûnene ûgîcûra kuo.

³⁵ Nake Musa nîwaremirwe nî gûtonya îgemarî rîu rîa Ngai-Mûnene nîûndû wa riiri ûcio wa Ngai-Mûnene.

³⁶ Rîrîa rîonthe îtu rîathengutua îgemarî rîa Ngai-Mûnene nîrîo andû a Isiraeli meethagîrwa makîthiî mbere na rûgendo rwao ng'endorî ciao cionthe.

³⁷ Nwatî îtu rîarega kûthengutua vo matiathiîcaga mbere na rûgendo rwao nginya rîrîa rîkaathengutua.

³⁸ Kwoguo ng'endorî cionthe ciao, andû a Isiraeli îtu rîa Ngai-Mûnene rîrî îgûrû rîa îgema rîa Ngai-Mûnene mûthenya, na ûtukû nîmoonaga mwaki ûrî îgûrû rîarîo.