Ntha 4 - ÎVUKU RÎA ÛVORO MWARO

Ngai nîwavere Musa vinya wa kûringa ciama

¹ Musa nîwacokerie Ngai-Mûnene atîrî, “Ethîrwa andû a Isiraeli tîmambîtîkia na tîmathikîrîria ûrîa ngûmera na mauge ndûnanyumîrîra, nie ngeka atîa?”

² Nake Ngai-Mûnene nîwaûririe Musa atîrî, “Nî ndûî ûnyitîte?” Nake Musa nîwacokirie atîrî, “Nî karûthanju.”

³ Nake Ngai-Mûnene nîwamwîrire atîrî, “Gaikie nthî.” Rîrîa Musa aagaikirie nthî, nîkaagarûrûkire na gagîtuîka njoka. Nake Musa nîwaûrire akiuma varî njoka îo.

⁴ Ngai-Mûnene nîwacokire akîra Musa atîrî, “Înamîrîria na ûmîoce ûmînyitîte mûkiia.” Kwoguo Musa nîwenamîrîre, akîmîoca na îgîtuîka karûthanju rîngî.

⁵ Ngai-Mûnene nîwacokire akîra Musa atîrî, “Thiî wîke ûguo kûrî andû a Isiraeli nîguo mamenye atî Ngai-Mûnene na nîke Ngai wa methe mao ma tene, Ngai wa Iburahimu, Isaka na Jakovu nîakumîrîrîte.”

⁶ Ngai-Mûnene nîwerire Musa rîngî atîrî, “Igîrîra njara yaku kîthûrirî gîaku.” Nake nîwamigîrîre. Na vîndî îrîa aamîrutire, njara îo yacerûvîte ta îra ta mûndû ûrwarîte mûrimû mûcûku wa ngothi.

⁷ Nake Ngai-Mûnene nîwerire Musa rîngî atîrî, “igîrîra njara yaku rîngî kîthûrirî gîaku.” Nake nîwekire guo. Na rîrîa aamîrutire vîndî îo njara îo yarî na vinya na nîyonekaga îkariî ta mwîrî ûcio wîngî.

⁸ Ngai-Mûnene nîwerire Musa atîrî, “Ethîrwa matigagwîtîkia wana kana metîkîre Kîamma kîrîa ûringire mbere, magetîkia gîkî gîa kaîrî.

⁹ Na ethîrwa matigagwîtîkia na njîra ya ciama icio igîrî na marege gûkûthikîrîria, nîûgaatava manjî kuuma rûnjîrî rwa Nailo na ûcoke ûmetûrûre nthî. Manjî mau nîmakaagarûrûka matuîke nthakame.”

¹⁰ Nwatî Musa nîwaugire atîrî, “Ngai-Mûnene, we Mwathani wakwa, ndûkandûme nie. Ndicî kwaria waro kuuma tene, wana kuuma vîndî îrîa wambîrîrie kûmbarîria na nînyenyaga.”

¹¹ Nake Ngai-Mûnene nîwerire Musa atîrî, “Nî ûrîkû ûvecaga mûndû ûvoti wa kwaria. Nî ûrîkû ûtûmaga mûndû aremwe nî kwaria na kwîgua. Nî ûrîkû ûtûmaga avote kwona kana atuîka mûtumumu? Anga tî nie, Ngai-Mûnene?

¹² Thiî rîu! Nîngaagûtethia kwaria na nîngaakwîra ûrîa ûkaauga.”

¹³ Nwatî Musa nîwacokirie atîrî, “We Mwathani wakwa, nîngûkûthaitha ûtûme mûndû wîngî.”

¹⁴ Nake Ngai-Mûnene nîwarakarire nî Musa akîmûria atîrî, “Na kinthî mûrwanyûkwe Aroni ûrîa Mûlawi ndarî vo? Nîmbicî atî nwa amenye kwaria waro. Ke nî aûkîte gûgûtûnga na akwona nî agûkena.

¹⁵ Aria nake na ûmwîre ûrîa akauga. Nîngaamûtethia muorî kwaria na nîngaamwîra ûrîa mûgeeka.

¹⁶ Aroni nîke ûkaarîria andû vandûrî vaku. Nawe ûgaatuîka ta Ngai na ûmwîrage ûrîa akuga.

¹⁷ Oca mûragi ûyû ûthiî naguo, nîûndû nîguo ûkaaringa ciama naguo.”

Musa nîwacokire Misiri

¹⁸ Nake Musa nîwacokire kûrî mûthoniwe Jethiro na akîmwîra atîrî, “Nîngûkûria ûreke nthiî Misiri kûrî andû etû ngone kana marî wa mwoyo.” Nake Jethiro nîwetîkîre na akîmugîra ûvoro.

¹⁹ Musa arî wa kûu Midiani nîwarîrue nî Ngai-Mûnene akîrwa atîrî, “Coka Misiri nîûndû andû arîa maagûcaragia makûrage nîmakuîte.”

²⁰ Kwoguo Musa nîwocire mûka na ciana ciao cia anake na akîmatwîthia mvundarî makîthiî vûrûrirî wa Misiri. Nake Musa nîwakuuire mûragi ûrîa eerîtwe nî Ngai agaakuua.

²¹ Ngai-Mûnene nîwerire Musa rîngî atîrî, “Wona wacoka Misiri, ûkaaringa ciama cionthe irîa nie ngûvete vinya ûringe mbere ya mûthamaki. Nwatî Nîngaaûmia ngoro ya mûthamaki na ndageetîkîra andû a Isiraeli mathiî.

²² Nawe nwanginya wîre mûthamaki, Ngai-Mûnene augîte atî, ‘Isiraeli nî îrikithathi rîakwa rîa mwanake.

²³ Nie naakwîrire ûreke andû akwa mathiî nîguo makangooce, nwatî nîwaregire. Rîu nîngûraga mwanake waku wa îrikithathi.’ ”

²⁴ Marî vandû varîa maararîrîrîte njîrarî ya kûthiî Misiri, Ngai-Mûnene nîwathiîre kûrî Musa na akîgeria kûmûraga arî varîa aamamîte.

²⁵ Nake Zipora mûka wa Musa nîwavinyûrire na agîoca kathiga kaavana ta kîenji na akîruithia mûvîcî, agîcoka akîvutia magûrû ma Musa na nyama îo aatinirie aruithia mûvîcî. Nîûndû wa mîtugo ya kîndûîre ya kûrua, Zipora nîwerire Musa atîrî, “Na ma we wî mûthuuri wakwa na njîra ya nthakame.”

²⁶ Kwoguo Ngai-Mûnene ndaaûraga Musa, nîwatiganire nake nîûndû Zipora nîwaugîte, mûthuuri wakwa na njîra ya nthakame nîûndû wa kûrua.

²⁷ Vîndî wa îo Ngai-Mûnene nîwerîte Aroni atîrî, “Thiî werûrî mûgatûngane na Musa.” Kwoguo Aroni nîwathiîre na nîmaatûnganire nake kîrîmarî kîrîa kîtheru. Matûngana, Aroni nîwakethirie Musa na ngethi cia kûmumunyana.

²⁸ Nake Musa nîwerire Aroni maûndû monthe marîa Ngai-Mûnene aamwîrîte vîndî îrîa aamwîrire acoke Misiri. Nîwacokire akîra Aroni ûvoro wîgiî ciama irîa Ngai-Mûnene amwathire aringe.

²⁹ Nao Musa na Aroni nîmaathiîre Misiri na makîûngania atongoria a Isiraeli vamwe.

³⁰ Aroni nîwamerire maûndû monthe marîa Ngai-Mûnene eerîte Musa. Nake Musa nîwaringire ciama cionthe irîa eerîtwe andû makîonaga.

³¹ Nao atongoria acio nîmeetîkirie. Na vîndî îrîa maamenyire atî Ngai-Mûnene nîamenyete ûrîa maarî na mathîna, nîmaaturumithirie ciongo ciao nthî na makîgooca Ngai-Mûnene.