Ntha 39 - ÎVUKU RÎA ÛVORO MWARO

Gûtuma Nguo cia Athînjîri-Ngai

¹ Bezaleli na Oholiabu nîmaatûmîre ndigi cia rangi wa vururu, njambarawe, na rangi ndune gûtuma nguo mbaro mûno cia gwîkîragwa nî athînjîri-Ngai vîndî îrîa megûtungata marî vandû varîa vatheru. Maatumire nguo cia Mûthînjîri-Ngai Aroni wata ûrîa Ngai-Mûnene aathîte Musa.

² Nîmaatumire efodi ya gîtambaa Kîamro Kîam ndigi cia rangi wa vururu, njambarawe, ndune, na ndigi cia thaavu.

³ Nîmaaturire mavati ma thaavu na makîmatinangia tûmîcivi tûceke twa gûtumîrîrwa nguorî îrîa mbaro na ndigi cia rangi wa vururu, njambarawe na ndune.

⁴ Nîmaacokire magîtuma mîcivi ya gûcuria efodi ituro na makîmîtumîrîra mîenarî îîrî ya efodi.

⁵ Naguo mûcivi mwaro ûrîa watumîtwe waro na ndigi cia thaavu, vururu, njambarawe na ndune nîwatumîrîrwe efodirî wata ûrîa Ngai-Mûnene aathîte Musa.

⁶ Nîmoocire mathiga ma goro mûthemba wa karineli makîmamundîrîra vandû vamwe vaarûthîtwe na thaavu. Mathigarî mau maaumirue nî mûndû warî na wara na makîandîkwa marîîtwa îkûmi na maîrî ma avîcî a Isiraeli.

⁷ Nao nîmaamatumîrîre mîcivirî ya efodi ya ituro nîguo methagîrwe marûngamîrîrîte mîvîrîga îrîa îkûmi na îîrî ya avîcî a Isiraeli wata ûrîa Ngai-Mûnene aathîte Musa.

Gûtuma nguo ya kîthûri

⁸ Mavundi nîmaatumire nguo ya kîthûri mbaro na indo ta irîa ciatumire efodi.

⁹ Ûraca wayo na wariî nîcieganene. Îrî ngûnje yarî na ûraca wa cendimita mîrongo îîrî na igîrî (22), na wariî wa cendimita mîrongo îîrî na igîrî (22).

¹⁰ Nîmaamîtumîrîre mîvari îna ya mathiga ma goro. Mûvari wa mbere warî wa mathiga ma wakiki îrîa ndune, yakuti, na mbaregathu.

¹¹ Mûvari wa kaîrî warî wa mathiga ma thumarati, yakuti ya vururu, na alimathi.

¹² Mûvari wa kathatû warî wa mathiga ma wakiki ya vururu, yacimu, na amethuthito.

¹³ Mûvari wa kana warî wa mathiga ma thumarati îrîa ntheru, onigithi, na Jathibi. Mathiga mau ma goro maamundîrîrwe tûnyamûrî twa kûmanyitîrîra twa thaavu.

¹⁴ Mathiga mau ma goro monthe maarî îkûmi na maîrî. Na wa îthiga rîandîkîtwe rîîtwa ta mûvûûri kûringana na avîcî îkûmi na aîrî a Isiraeli.

¹⁵ Nîmaarûthire mûkathî wa nguo ya kîthûri wa thaavu ntheri wokothetwe ta mîkanda.

¹⁶ Nîmacokire makîrûtha tûnyamû twîrî twa kûnyitîrîra twa thaavu na icûvî igîrî cia thaavu, na magîtumîrîra icûvî icio mîthiiarî îîrî ya îgûrû ya nguo ya kîthûri.

¹⁷ Nîmaacokire makîoverera mîkathî ya thaavu icûvîrî irîa igîrî irî mîthiarî ya nguo ya kîthûri.

¹⁸ Nayo mîthiia îrîa îngî îîrî ya mîkathî ya thaavu nîmaamîoverere tûnyamûrî tûrîa twîrî twa thaavu twa kûnyitîrîra mathiga ma goro. Ûguo nîguo maatwoverere mîcivirî ya ituro ya efodi mwena wa mbere.

¹⁹ Nîmaarûthire icûvî igîrî cia thaavu na magîitumîrîra mîthiiarî ya ngurumo ya nguo ya kîthûri na mwena wa ndaarî vakuvî na efodi.

²⁰ Nîmaacokire makîrûtha icûvî ciîngî igîrî cia thaavu. Nîmacioverere mwena wa mbere wa mîcivi ya ituro, mwena wa ngurumo vakuvî na varîa mîcivi îrîa mîtume waro înyitithanîrîtue na efodi.

²¹ Nîmaanyitithanirie icûvî cia nguo ya kîthûri na icûvî cia efodi na mûkumbû wa vururu wata ûrîa Ngai-Mûnene aathîte Musa. Kwoguo nguo ya kîthûri nîyamamîre mûcivi ûrîa mûtume waro wa efodi nîguo ndîkaaregere.

Gûtuma nguo ciîngî cia Athînjîri-Ngai

²² Nîmaacokire magîtuma nguo îngî ya rangi wa vururu ya gwîkagîrwa rungu rwa efodi.

²³ Nîmaatumire îrima rîa gûtonyia kîongo rîrî na muno wa kûrigîrîria ndîgatembûke.

²⁴ Munorî wa nguo wa ngurumo nîmaarûthire ngûngûmanga cia gîtambaa Kîamro gîatumîtwe na ndigi cia rangi wa vururu, njambarawe, na ndune.

²⁵ Nîmaatumîrîre ngengere cia thaavu ntheri gatagatî ka ngûngûmanga icio munorî wa nguo.

²⁶ Ciatumagîrîrwa irûmanîrîrîte, wa ngengere îkarûmîrîrwa nî ngûngûmanga, îgacoka îkarûmîrîrwa nî ngengere îngî kûthiûrûrûkîria nguo yonthe munorî wa ngurumo wa nguo ya ûtungata, wata ûrîa Ngai-Mûnene aathîte Musa.

²⁷ Nîmaacokire magîtuma nguo ndaca cia gîtambaa Kîamro cia Aroni na avîcî ake,

²⁸ na magîtuma kîremba, ngovia, na thuruvarî cia gwîkagîra rungu rwa nguo icio ndaca cia gîtambaa Kîamro,

²⁹ na mûcivi wa gîtambaa Kîamro ûtumîtwe na ndigi cia rangi wa vururu, njambarawe, na ndune, wata ûrîa Ngai-Mûnene aathîte Musa.

³⁰ Nîmaacokire makîrûtha kîvengere Kîam thaavu ntheri na makîandîka kîvengererî kîu, “Kîamûrîrîtwe Ngai-Mûnene”.

³¹ Nîmooverere kamûkumbû ka rangi wa vururu îgûrû rîa kîremba kîu nîûndû wa gûkînyinyagia, wata ûrîa Ngai-Mûnene aathîte Musa.

Kûrîkia wîra

³² Wîra wonthe wa gûtuma îgema rîa Ngai-Mûnene nîwathirire. Andû a Isiraeli nîmeekire wata ûrîa Ngai-Mûnene aathîte Musa.

³³ Nîmaaretire îgema rîa Ngai-Mûnene kûrî Musa na indo cionthe ciarîo. Indo icio ciarî: icûvî, mbaû cia kûnyitîrîra, mîkîgo, itugî, na itina ciacio,

³⁴ gîkunîko Kîam rûûo rwa ndûrûme rûrindîtwe rangirî ndune, gîkunîko Kîam rûûo rûtanduke. Nîmaacokire makîreta gîtambaa gîa gûkunîkîra îthandûkû,

³⁵ îthandûkû rîa kîrîkanîro rîrî na ivengere cia maathani mîtî yarîo, gîkunîko Kîam rîo,

³⁶ metha na indo cionthe ciayo, na mûgate ûrîa mwamûrîre Ngai.

³⁷ Nîmaaretire vandû va kwigîrîrwa taa varûthîtwe na thaavu ntheri, taa, indo cionthe ciavo, na maguta ma gwakia taa icio.

³⁸ Nîmaaretire metha ya kîgongoona ya thaavu, maguta ma kwamûrana, ûbani mûnungi waro, gîtambaa Kîam mûromo wa îgema,

³⁹ metha ya kîgongoona ya gîcango na gîcungi Kîam gîcango Kîamyo, mîtî yayo na indo cionthe ciayo, karaî ga kwîthambîria na vandû va gûkaigîrîra,

⁴⁰ itambaa cia kûrigicîria kîvaro Kîam îgema, itugî na itina ciacio, gîtambaa Kîam mûromo wa gûtonya kîvarorî na mîkanda yakîo, nthugî cia îgema, indo cionthe cia gûtûmîra îgemarî rîa Ngai-Mûnene,

⁴¹ nguo itumîtwe waro cia gwîkîrwa nî athînjîri-Ngai marî vandû varîa vatheru, nguo ntheru cia Aroni, mûthînjîri-Ngai na cia avîcî ake.

⁴² Kwoguo andû a Isiraeli nîmaarutire wîra wonthe wata ûrîa Ngai-Mûnene aathîtwe Musa.

⁴³ Musa nîwaroririe wîra wonthe na akîona atî nîwarutîtwe wata ûrîa Ngai-Mûnene aathanîte. Kwoguo Musa nîwamarathimire.