Ntha 35 - ÎVUKU RÎA ÛVORO MWARO

Mawatho ma thavatû

¹ Musa nîwerire andû onthe a Isiraeli magomane vamwe na akîmera atîrî, “Mama nîmo maûndû marîa Ngai-Mûnene amwathîte mwîkage.

² Mûrî na mîthenya îtandatû ya kûruta wîra wenyu wonthe, nwatî mûthenya wa mûgwanja ûkethagîrwa ûrî mûthenya mûtheru wa thavatû na wa kûvurûka wamûrîrîtwe Ngai-Mûnene. Mûndû wa wonthe ûkaaruta wîra wana ûrîkû mûthenya ûcio nî akaaûragwa.

³ Mûtigaakie mwaki kwenyu mîciî mûthenya wa thavatû.”

Matega ma îgema rîtheru

⁴ Musa nîwerire andû a Isiraeli onthe atîrî, “Mama nîmo maûndû marîa Ngai-Mûnene atwathîte.

⁵ Rutagîrani Ngai-Mûnene matega. Mûndû wa wonthe ûrî na wendi wa gwîka ûguo nîaretagîre Ngai-Mûnene matega ma thaavu, sîlûva, na gîcango,

⁶ itambaa mbaro, na ndigi cia rangi wa vururu, na wa njambarawe, na cia rangi ndune, na itambaa itumîtwe na guoya wa mbûri,

⁷ njûo cia ng'ondu ivakîtwe rangi ndune, njûo irîa mbaro, na mbaû cia mîtî ya mîgaa.

⁸ Na mûrutage maguta ma gwakia taa, na mînyamû mînungi waro ya gwîkîra magutarî ma kwamûrana na ya gwîkîra ûbanirî mûnungi waro,

⁹ mathiga ma goro ma rangi ndune na mathiga mengî ma goro ma gwîkîra efodirî ya Mûthînjîri-Ngai mûnene na nguorî yake ya kîthûri.

Indo cia îgema rîa Ngai-Mûnene

¹⁰ “Andû onthe gatagatîrî kenyu arîa marî na ûvoti nîmaûke matume indo cionthe irîa Ngai-Mûnene atwathîte:

¹¹ îgema na gîkunîko Kîam rîo, icûvî cia kûrînyitîrîra na mbaû ciarîo cia kûrînyitîrîra, mîkîgo, itugî na itina ciacio,

¹² îthandûkû rîa kîrîkanîro na mîtî yarîo, na gîkunîko Kîam rîo na gîtambaa gîa kûrîkunîkîra.

¹³ Na matume metha na mîtî yayo, na indo cionthe cia metha, na marûthe mîgate îrîa yamûrîrîtwe Ngai,

¹⁴ na matume vandû va kwigîrîrwa taa nîûndû wa ûtheri na indo ciayo, taa na maguta ma cio,

¹⁵ na metha ya kîgongoona ya kûvîvîria ûbani na mîtî yayo, maguta ma kwamûrana, na ûbani ûrîa mûnungi waro, na gîtambaa Kîam mûrangorî wa îgema.

¹⁶ Nî matume metha ya kîgongoona ya kûvîvîrua matega na gîcungi gîa gîcango kînyitanîtue nayo, mîtî ya metha ya kîgongoona, indo cionthe ciayo, na karaî ga gîcango ga kwîthambîria na vandû va gûkaigîrîra,

¹⁷ itambaa cia kûrigicîria kîvaro, itugî na itina ciacio, na gîtambaa Kîam mûromo wa kîvaro.

¹⁸ Na marûthe nthugî cia îgema na cia rwago rûrîa rûthiûrûrûkîrîtie kîvaro vamwe na mîkanda ya nthugî icio,

¹⁹ na matume nguo mbaro mûno cia gwîkagîrwa nî athînjîri-Ngai rîrîa magûtungata marî vandû varîa vatheru. Nguo icio nî irîa ntheru cia Aroni na cia avîcî ake cia gwîkagîra rîrîa magûtungata.”

Andû nîmaaretire matega mao

²⁰ Andû onthe a Isiraeli nîmaacokire makiuma varî Musa.

²¹ Na mûndû wonthe ûrîa wegucaga arî na wendi wa gwîka ûguo nîwaretire matega ma gûtuma îgema rîa Ngai-Mûnene. Nao nîmaaretire indo cionthe irîa ciendekaga cia gûtûmîrwa vîndî ya kûgooca na cia gûtuma nguo cia ûthînjîri-Ngai.

²² Kwoguo andû onthe arîa maarî na ngoro irî na wendi arûme na aka nîmaaretire indo cia mîthemba mîîngî cia thaavu ta mindo, mbete, mîkathî na mathaga ma mîthemba yonthe ma thaavu na magîciamûrîra Ngai-Mûnene.

²³ Mûndû wonthe warî na itambaa mbaro, na ndigi cia rangi wa vururu, njambarawe kana cia rangi ndune, na itambaa cia guoya wa mbûri, kana njûo cia ng'ondu ivakîtwe rangi ndune wana kana njûo mbaro nîwairetire.

²⁴ Nao arîa onthe maavotire kûrutîra Ngai-Mûnene sîlûva kana gîcango nîmaaretire. Na arîa onthe maarî na mîtî ya mîgaa îrîa ingîatûmîrirwe nîûndû wa wîra wa wonthe nîmaamîretire.

²⁵ Aka onthe arîa maarî na ûûgî wa gûtuma nîmaaretire ndigi cia gûtuma gîtambaa Kîamro na ndigi cia rangi wa vururu, njambarawe na cia rangi ndune irîa maarûthîte.

²⁶ Wana nîmaarûthire ndigi cia guoya wa mbûri.

²⁷ Nao atongoria a andû a Isiraeli nîmaaretire mathiga ma goro ma rangi ndune na mathiga mengî ma goro ma gwîkîrwa efodirî na nguorî ya kîthûri,

²⁸ mînyamû mînungi waro, maguta ma taa, maguta ma kwamûrana na ma gûtukania na ûbani mûnungi waro.

²⁹ Andû onthe a Isiraeli arîa maarî na wendi wa kûvecana nîmaarutire matega ma Ngai-Mûnene nîûndû wa wîra wonthe ûrîa Ngai-Mûnene aathanîte na njîra ya Musa ûrutwe.

Andû a gûtuma îgema rîa Ngai-Mûnene

³⁰ Musa nîwerire andû a Isiraeli atîrî, “Ngai-Mûnene nî athuurîte Bezaleli mûvîcî wa Uri. Uri aarî mûvîcî wa Huri wa mûvîrîga wa Juda.

³¹ Ngai-Mûnene nîwecûririe Bezaleli vinya wake, akûmûva ûvoti, ûûgî na wara wa mawîra monthe.

³² Aarî na ûvoti wa gûcora na njîra mbaro, na kûrûtha indo na thaavu, sîlûva na gîcango,

³³ na gûtema mathiga ma goro ma kûmundîrîrwa vandû, na kumia mîtî, na kûruta wîra wonthe wa ûvundi.

³⁴ Ngai-Mûnene nîwavere Bezaleli na Oholiabu mûvîcî wa Ahisamaki wa kuuma mûvîrîgarî wa Dani ûvoti wa kûthomithia andû arîa engî wara ûcio.

³⁵ Ngai-Mûnene nî amavete wara wa mawîra monthe marîa marutagwa nî andû arîa marûthaga indo, na gûcora, na marî na ûvoti wa gûtuma itambaa mbaro na kûrûtha ndigi cia rangi wa vururu, njambarawe, na cia rangi ndune, na itambaa ciîngî. Marî na wara wa kûruta mawîra ma mîthemba yonthe na marî na ûgî wa gûcora.