Ntha 32 - ÎVUKU RÎA ÛVORO MWARO

Mûvuanano wa ndegwa ya thaavu

¹ Rîrîa andû a Isiraeli moonire atî Musa nîwekara mûno atacokete kuuma kîrîmarî, nîmaagomanire varî Aroni na makîmwîra atîrî, “Ûkîra ûtûrûthîre ngai îrîa îgaatûtongoragia nîûndû tûtiîcî ûrîa gwîkîkîte kûrî Musa ûrîa watûrutire vûrûri wa Misiri.”

² Nake Aroni nîwamerire atîrî, “Rutani mindo cia thaavu irîa aka enyu, avîcî enyu, na erîtu enyu mekîrîte matû na mûmindîre cio.”

³ Kwoguo andû onthe nîmaarutire mindo cia thaavu irîa maarî nacio matû na makîvirîra Aroni.

⁴ Aroni nîwocire mindo icio kuuma kûrî o, akîirarûra na mwaki na akîrûtha mûvuanano wa ndegwa ya thaavu nacio. Nao nîmaaugire atîrî, “Andû a Isiraeli îno nîyo ngai yenyu îrîa yamûrutire vûrûri wa Misiri!”

⁵ Aroni nîwacokire agîtuma metha ya kîgongoona vau mbere ya mûvuanano wa ndegwa îo ya thaavu na akîmeera atîrî, “Rûyû nî gûkaagîa na kîrugo nîguo tûkumie Ngai-Mûnene.”

⁶ Kîraûko tene mûthenya ûcio wîngî andû nîmaarutire matega ma kûvîvua, na matega ma thayû. Nîmaacokire magîkara nthî makîrîa na makînyua. Nîmaarûngamire na makîambîrîria kwîinia makinaga nyîmbo cia waga nthoni.

⁷ Ngai-Mûnene nîwerire Musa atîrî, “Nyûrûrûka narua nîûndû andû aku arîa warutire vûrûri wa Misiri nîmevîtie na makaregana nanie.

⁸ Nîmagarûrûkîte na magatiga njîra îrîa namaathire marûmagîrîre. Nîmeerûthîrîte o ene mûvuanano wa njaû ya ndegwa ya thaavu ya kûrarûrwa na nîmaramîgooca makîmîrutagîra îgongoona, makiugaga atî îo nî ngai îrîa yamarutire vûrûri wa Misiri.

⁹ Nîmbîcî ûrîa andû aya maûmîtie ciongo.

¹⁰ Kwoguo rîu tigana nanie. Nîrî mûrakaru nîo, na nîngûmathiria. Nwatî we vamwe na njiarwa ciaku nîngaamûtua rûrîrî rûnene.”

¹¹ Nwatî Musa nîwathaithire Ngai-Mûnene, Ngai wake na akiuga atîrî, “Ngai-Mûnene, ûrarakara ûguo nîkî nî andû aku arîa warutire vûrûri wa Misiri na vinya na ûvoti mwîngî?

¹² Ndûkareke andû a Misiri mauga atî warutire andû a Isiraeli kuuma Misiri nîguo ûke ûmaûragîre gûkû irîmarî na ûmathirie viû. Tiga kûrakara, na ûgarûre meciria maku na ndûkarete mûthiro kûrî andû aku.

¹³ Ririkana ndungata ciaku Iburahimu, Isaka, na Jakovu arîa werîre we mwene na mwîvîtwa atî nîûkengîvia njiarwa ciao ta njata cia îgûrû, na ûve njiarwa cio vûrûri ûrîa wamerîre atî nîûgaatuîka wao tene na tene.”

¹⁴ Kwoguo Ngai-Mûnene nîwagarûrire meciria make na ndaaretera andû ake mûthiro ûrîa endeete kûmaretera.

¹⁵ Musa nîwanyûrûrûkire kuuma kîrîmarî akuîte ivengere cia mathiga ciandîkîtwe Maathani mîena yoîrî.

¹⁶ Ngai nîke warûthîte na nîke wandîkîte maathani mau ivengererî icio.

¹⁷ Rîrîa Joshua egwire înegene rîa andû makiugîrîria, nîwerire Musa atîrî, “Nînîregua înegene rîa mbaara varîa andû mambîte magema.”

¹⁸ Nwatî Musa nîwacokirie atîrî, “Înegene rîu tî ta rîa ûvootani kana rîa kûvootwa, nwatî nîregua makina.”

¹⁹ Rîrîa Musa aakuvîvîrie varîa maambîte magema na akîona njaû ya ndegwa na andû makîinagia nîwarakarire na agikia ivengere irîa aakuîte vau nthî ya kîrîma na ikîenyûkanga.

²⁰ Nîwocire njaû ya ndegwa îo maarûthîte akîmîvîvia na mwaki akîmîthîa îgîtuîka mûtutu. Nîwatukanirie mûtutu ûcio na manjî na agîtûma andû a Isiraeli maûnyue.

²¹ Musa nîwaûririe Aroni atîrî, “Andû aya maragwîkire atîa atî nîguo ûmarekererie meke wîvia mûnene ûguo?”

²² Aroni nîwamûcokerie atîrî, “Tiga kûrakara nînie mwathi wakwa. Nîwicî we mwene ûrîa andû aya mendete gwîka naaî.

²³ Maambîrire atîrî, ‘Tûticî ûrîa gwîkîkîte kûrî Musa ûrîa watûrutire kuuma vûrûri wa Misiri. Kwoguo tûrûthîre ngai cia gûtûtongoria.’

²⁴ Nînaamerire atî mûndû ûngîthîrwa arî na mindo cia thaavu arute anengere. Kwoguo arîa maarî nacio nîmaangerire cio nanie ngîcikia mwakirî na gûkiuma njaû îno ya ndegwa!”

²⁵ Musa nîwonire atî Aroni nîwatûmire andû matuîka aremi na magîtuîka irimû mbere nthû ciao.

²⁶ Kwoguo Musa nîwarûngamire kîvingorî Kîam varîa maambîte magema na akîugîrîria atîrî, “Mûndû ûrîa ûrî mwena wa Ngai-Mûnene nî aûke varî nie!” Nao Alawi onthe nîmaaûnganire varî Musa.

²⁷ Nake nîwamerire atîrî, “Ngai-Mûnene, Ngai wa Isiraeli augîte mûndû wonthe wa cienyu oce rûviû rwake na mûthiî kûndû kuonthe gûkû mwambîte magema na mûthiî mîîrîgarî yonthe. Mûndû nîaûrage mûrwang'ina, mûrata wake, na mûndû ûrîa mariganîtie nake.”

²⁸ Nao Alawi nîmeekire wata ûrîa meerirwe nî Musa na mûthenya ûcio nîmaaûragire andû ta ngiri ithatû (3,000).

²⁹ Musa nîwacokire akîra avîcî a Lawi atîrî, “Ûmûnthî nîmweyamûra mue ene nîguo mûtungatagîre Ngai-Mûnene. Wa mûndû eyamûra na njîra ya kûûraga mûvîcî kana mûrwang'ina, kwoguo Ngai-Mûnene nîwamûrathima ûmûnthî.”

³⁰ Mûthenya ûcio warûmîrîrîte Musa nîwerire andû atîrî, “Mue nîmwîkîte mevia macûku mûno. Nwatî rîu nîngunûkia kîrîmarî kûrî Ngai-Mûnene ngone kana Ngai-Mûnene nwa amwovere mevia menyu.”

³¹ Nake Musa nîwacokire kîrîmarî kûrî Ngai-Mûnene na akîmwîra atîrî, “Andû aya nîmekîte mevia manene mûno. Nîmerûthîrîte ngai ya thaavu na nîmamîgoocete.

³² Nakûthaitha ûmovere mevia mao. Narîo ethîrwa tî ûmovera, nîngîkûvoya ûvute rîîtwa rîakwa kuuma îvukuurî rîrîa wandîkîte marîîtwa ma andû aku.”

³³ Ngai-Mûnene nîwacokerie Musa atîrî, “Andû arîa meevirie nîo ngaavuta marîîtwa mao îvukuurî rîakwa.

³⁴ Rîu thiî ûgatongorie andû mathiî kûrîa naakwîrire. Ririkana, mûraika wakwa nîakaamûtongoria, nwatî kavinda nîgagaakinya rîrîa ngaaûka kûverithia andû aya nîûndû wa mevia mao.”

³⁵ Kwoguo Ngai-Mûnene nîwatûmire kûgîe na mûthiro kûrî andû nîûndû nîmaatûmire Aroni arûtha njaû ya ndegwa ya thaavu.