Ntha 31 - ÎVUKU RÎA ÛVORO MWARO

Andû a gûtuma îgema rîa Ngai-Mûnene

¹ Ngai-Mûnene nîwerire Musa atîrî,

² “Nînthurîte Bezaleli, mûvîcî wa Uri kuuma mûvîrîgarî wa Juda. Uri aarî mûvîcî wa Huri.

³ Nîndûmîte ecûrwe nî roho wakwa, na agîe na ûvoti, ûmenyo na wara wa kûrûtha indo cia mîthemba yonthe

⁴ nîguo avote kûgîa na ûgî wa gûcora na kûrûtha indo na thaavu, sîlûva, na gîcango,

⁵ na nînîmwîcûrîtie roho wakwa nîguo agîe na ûgî wa kûrûtha tûthiga twa kûmundîrîrwa, ûgî wa kumia indo cia mîtî, na wara wa kûrûtha indo cia mîthemba yonthe.

⁶ Nînthurîte Oholiabu mûvîcî wa Ahisamaki wanake nîguo marutithanie wîra nake. Oholiabu nî wa kuuma mûvîrîgarî wa Dani. Nîmvete ûvoti mwîngî andû arîa engî onthe marî na wara wa kûruta wîra nîguo mavote kûrûtha indo cionthe irîa naakwathire.

⁷ Indo icio nî îgema rîa Ngai-Mûnene, îthandûkû rîa kîrîkanîro na gîkunîko Kîam rîo, na indo cionthe cia gwîkîra kûu îgemarî,

⁸ metha na indo ciayo, vandû va kwigîrîrwa taa varûthîtwe na thaavu ntheri na indo ciavo cionthe, metha ya kîgongoona ya kûvîvîria ûbani,

⁹ metha ya kîgongoona ya matega ma kûvîvua na indo cionthe ciayo. Na marûthe kîraî gîa kwîthambîria Kîam gîcango na vandû va gûkigîrîra,

¹⁰ nguo cia ûthînjîri Ngai cia Aroni irîa itumîtwe waro, nguo cia avîcî ake cia gwîkagîra rîrîa magûtungata marî athînjîri-Ngai.

¹¹ Macoke marûthe maguta ma kwamûrana, na ûbani ûrîa ûrî mûtararûko mwaro nîûndû wa vandû varîa vatheru. Makîrûtha indo icio cionthe, mageeka wata ûrîa naakwathire.”

Thavatû, mûthenya wa kûvurûka

¹² Ngai-Mûnene nîwerire Musa

¹³ ere andû a Isiraeli atîrî, “Menyagîrîrani mûthenya wakwa wa thavatû, nîûndû rûu nîruo rûûri gatagatî gakwa namue vamwe na njiarwa cienyu cionthe. Rûûri rûu nî rwa kûmûmenyithia atî Nie, Ngai-Mûnene nînîmûtuîte andû akwa.

¹⁴ Kwoguo nî mwagîrîrwe nî kûmenyagîrîra mûthenya wa thavatû, nîûndû nî mwamûre. Mûndû wa wonthe ûkaarega gûtîîa mûthenya wa thavatû nîakaaûragwa, mûndû wa wonthe ûkaaruta wîra mûthenya wa thavatû nîakaamûranua na andû akwa.

¹⁵ Mûkaarutaga wîra mîthenya îtandatû, nwatî mûthenya wa mûgwanja nî thavatû ya kûvurûka na wamûrîrîtwe Ngai-Mûnene. Mûndû wa wonthe ûkaaruta wîra wana ûrîkû mûthenya wa thavatû nî akaaûragwa.

¹⁶ Kwoguo njiarwa cionthe cia andû a Isiraeli nîmatûûra mamenyagîrîra mûthenya wa thavatû rûrî rûûri rwa kîrîkanîro.

¹⁷ Mûthenya wa thavatû nî rûûri rwa gûtûûra tene na tene gatagatî gakwa na andû a Isiraeli, nîûndû Nie, Ngai-Mûnene naaûmbire îgûrû na nthî mîthenya îtandatû. Mûthenya wa mûgwanja nînatigire kûruta wîra na ngîvurûka.”

¹⁸ Rîrîa Ngai aarîkirie kwarîria Musa kîrîmarî Kîam Sinai îgûrû, nîwanengerire Musa ivengere igîrî cia mathiga irî na maathani. Maathani mau nî Ngai ke mwene wamandîkîte.