Ntha 30 - ÎVUKU RÎA ÛVORO MWARO

Metha ya Kîgongoona ya Kûvîvîria Ûbani

¹ Ngai-Mûnene nîwerire Musa atîrî, “Ndumîra metha ya kîgongoona ya mûtî wa mûgaa ya kûvîvîria ûbani.

² Metha ya kîgongoona îthîrwe îgananîte mîena yonthe. Ûraca wayo wîthîrwe ûrî wa cendimita mîrongo îna na ithano na wariî wa cendimita mîrongo îna na ithano. Ûraca wayo na îgûrû wîthîrwe ûrî wa cendimita mîrongo kenda. Îgûrû rîayo yumue mîtî yumîrîte ta mvîa mîthiiarî. Mîtî îo îthîrwe înyitanîte na metha ya kîgongoona.

³ Ûkaamîvaka thaavu ntheri îgûrû rîayo, mîenarî îna yayo, vamwe na mîtî îo yumîrîte na wîkîre mûcivi wa thaavu ûmîthiûrûrûkîrîtie.

⁴ Ûmîrûthîre icûvî igîrî cia thaavu cia kûmîkuua na ûimundîrîre mîenarî îîrî ya metha ya kîgongoona ngurumo ya mûcivi ûrîa wa thaavu. Icûvî icio nî cia gûtonyia mîtî îrîa îgaakuua metha ya kîgongoona.

⁵ Rûtha mîtî îo ya gûkuua metha ya kîgongoona na mîtî ya mûgaa na ûmîvake thaavu.

⁶ Wige metha îo ya kîgongoona nja ya gîtambaa kîrîa gîcûrîte mbere ya îthandûkû rîa kîrîkanîro. Vau nîvo ngaakwarîria nîrî.

⁷ Aroni akaavîvagîria ûbani mûnungi waro îgûrû rîa metha ya kîgongoona iraûko cionthe rîrîa agûka gwakia taa.

⁸ Na vîndî îrîa agûka gwakia taa kîvwaî nwanginya avîvie ûbani. Matega mama ma kûvîvia ûbani nîmatûûra marutagwa nî njiarwa ciaku cionthe.

⁹ Ndûkarutîre îgûrû rîa metha îno ya kîgongoona ûbani ûtarî mûtheru, kana nyamû, irio kana wîtûrûra ndivei ya îtega îgûrû rîayo.

¹⁰ Aroni akaarûthaga mambura ma kûtheria metha ya kîgongoona riita rîmwe wa mwaka. Akaamîtheragia na njîra ya gwîkîra mîtî îrîa yumîrîte ya metha ya kîgongoona nthakame ya nyamû îrîa îrutîtwe nîûndû wa îgongoona rîa kûtheria mevia. Îgongoona rîu nîrîtûûra rîrutagwa riita rîmwe wa mwaka nî njiarwa ciaku cionthe. Metha îno ya kîgongoona nî ntheru viû na nî nyamûrîre Ngai-Mûnene.”

Gooti ya îgema rîa Ngai-Mûnene

¹¹ Ngai-Mûnene nîwerire Musa atîrî,

¹² “Rîrîa ûgaatara andû a Isiraeli, wa mûndû nîakaarîva kîndû gîa kûtheria mwoyo wake kûrî Ngai-Mûnene nîguo rîrîa ûkethîrwa ûkîmatara matikanyitwe nî mûthiro.

¹³ Mûndû wa wonthe ûgaatarwa nwanginya akaarîva mwîgana wa mbeca irîa ikendekana ithimîtwe na kîthimi kîrîa kîtheru gîtîkanîrie. Mûndû wonthe nwanginya akaarîva îrîvi rîu rîrî îtega kûrî nie, Ngai-Mûnene.

¹⁴ Mûndû wa wonthe ûgaatarwa na arî na ûkûrû wa mîaka mîrongo îîrî kûthiî na mbere, nîakaarutîra Ngai-Mûnene matega.

¹⁵ Andû arîa atongu matikaaruta nyîngî makîria nao arîa athîni matikaaruta nini makîria ya kîthimi kîrîa gîtîkanîrîtue kîrî îtega rîa kûtheria mwoyo wake kûrî Ngai-Mûnene.

¹⁶ Ûkaaûngania mbeca icio kuuma kûrî andû a Isiraeli na ûivûthîre na wîra wa kûmenyerera îgema rîa Ngai-Mûnene. Îrîvi rîu nî rîa kûtheria mîoyo ya andû a Isiraeli nanie nîngaaririkana kûmagitîra.”

Kîraî kîa gîcango

¹⁷ Ngai-Mûnene nîwerire Musa atîrî,

¹⁸ “Ûkaarûtha kîraî Kîam gîcango gîa kwîthambîria na kîrî na gîtina Kîam gîcango. Ûkaaiga kîraî kîu gatagatî ka îgema rîa Ngai-Mûnene na metha ya kîgongoona na wîkîre manjî kuo.

¹⁹ Aroni na avîcî ake nîmakaavûthîra manjî mau kwîthambia njara na magûrû.

²⁰ Vîndî cionthe rîrîa magûtonya îgemarî rîa Ngai-Mûnene, kana rîrîa makûthiî metharî ya kîgongoona kûrutîra Ngai-Mûnene matega ma kûvîvua, nîmethambagie na manjî mau nîguo matigakue.

²¹ Makethambagia njara na magûrû nîguo matigakue. Ûyû nîguo watho ûrîa ûgûtûûra ûrûmagîrîrwa nî Aroni, avîcî ake, vamwe na njiarwa ciake.”

Maguta ma kwamûrana

²² Ngai-Mûnene nîwacokire akîra Musa atîrî,

²³ “Oca mînyamû mînungi waro: kilo ithathatû cia manjî ma mûtî wa mare, kilo ithatû cia mûtî mûnungi waro wîtagwa cinamoni, kilo ithatû cia mûthanje mûnungi waro,

²⁴ na kilo ithathatû cia mûtî mûnungi waro wîtagwa Kasia, (ûithimîte cionthe na kîthimi kîrîa gîtîkanîrie), ûcoke ûitukanie na lita inya cia maguta ma mîtî ya mîtamaiyû îrîa îciaraga matunda.

²⁵ Watukania indo icio cionthe igaatuîka maguta matheru ma kwamûrana.

²⁶ Ûkaavaka maguta mau îgema rîa Ngai-Mûnene, îthandûkû rîa kîrîkanîro,

²⁷ metha na indo cionthe ciayo, vandû va kwigîrîrwa taa na indo cia vo, metha ya kîgongoona ya kûvîvîria ûbani,

²⁸ na metha ya kîgongoona ya matega ma kûvîvua na indo ciayo cionthe, kîraî gîa kwîthambîria na vandû va gûkigîrîra.

²⁹ Ûguo nîguo ûkaamûra indo icio, nacio nîikaathera viû. Na mûndû wa wonthe kana kîndû wa kîonthe gîkaaivutia nîgîgaatuîka kîtheru.

³⁰ Ûcoke wîtîrîrie Aroni na avîcî ake maguta ûmamûre nîguo mandungatagîre marî athînjîri-Ngai.

³¹ Na wîre andû a Isiraeli atî, ‘Maguta mama makwa nî matheru na nîmo magaatûûra matûmagîrwa nî njiarwarî ciaku cionthe vîndî ya kwamûrana.

³² Maguta mama matiagîrîrwe nî gwîtîrîrua andû matarî athînjîri-Ngai, na ndwagîrîrwe nî kûrûtha mengî ta mo matarî ma kwamûrana, nîûndû nî matheru na mwagîrîrwe nî kûmatua matheru.

³³ Mûndû wa wonthe ûkaarûtha maguta ta mama kana mavakwe mûndû ûtarî mûthînjîri-Ngai ndagaacoka gûtuîka ta ûmwe wa andû akwa.’ ”

Ûbani

³⁴ Ngai-Mûnene nîwerire Musa atîrî, “Oca ithimo ciîganene cia mînyamû mînungi waro cia sitakiti, onîka na galibanumu na maguta manungi waro.

³⁵ Tûmîra indo icio kûrûtha ûbani, ûtukanîtue ta maguta marîa manungi waro. Ûcoke wongerere cumbî nîguo ûtuîke mûtheru na mwamûre.

³⁶ Kimakima ûmwe ûtuîke mûtutu, na ûkaûminjaminje mbere ya îthandûkû rîa kîrîkanîro îgemarî rîa Ngai-Mûnene varîa ngaacemania namue. Nîmwagîrîrwe nî gûûtua mûtheru mûno.

³⁷ Mûtigatûmîre njîra ta îo kûrûtha ûbani ta ûcio wenyu mue ene. Ûndû ûcio mûûtue mûtheru na mwamûrîre Ngai-Mûnene.

³⁸ Ethîrwa kûrî mûndû ûkaarûtha wîkariî ta guo wa gûtûmîra ûrî maguta manungi waro, ndagaacoka gûtuîka ûmwe wa andû akwa.”